ރާއްޖޭގެ ޔުނިވަރސިޓީތަކުން ކިޔަވައިގެން ދީނީ ނަސޭހަތް ދިނުމުގެ ހުއްދަ ދިނުމަށް ސަރުކާރުން ވިސްނަމުންދާ ކަމަށް އިސްލާމީ ކަންތައްތަކަ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މި ވާހަކަ ވަޒީރު ވިދާޅުވީ މިއަދު ބޭއްވުނު ފަތުވާ ދިނުމުގެ ނިޒާމު ހަރުދަނާކުރުމާ ބެހޭ ގޮތުން ރާއްޖޭގައި ބޭއްވުނު ފުރަތަމަ މަހާސިންތާގެ އިފްތިތާހީ ޖަލްސާގައެވެ.
ވަޒީރު ޝަހީމް ވިދާޅުވި ގޮތުގައި، ރާއްޖެއިން ތައުލީމު ހާސިލުކޮށްފައިވާ މީހުންގެ ތެރޭގައި ދީނީ ނަސޭހަތް ދިނުމުގެ ޤާބިލުކަން ހުރި ގިނަ ބަޔަކު އެބަ ތިއްބެވެ. ނަމަވެސް، މިހާރު އޮތް ގަވާއިދުގެ ދަށުން ދީނީ ނަސޭހަތް ދިނުމުގެ ހުއްދަ ދެވެނީ ހަމައެކަނި ބޭރުގެ ޔުނިވަރސިޓީތަކުން ކިޔަވައިގެން ތިބި މީހުންނަށް ކަމަށް ވަޒީރު ފާހަގަކުރެއްވިއެވެ.
މީގެ އިތުރުން، ރާއްޖޭގައި ވައުޒާއި އިރުޝާދާއި ފަތުވާ ދިނުން ދަރަޖަކުރުމާމެދު އިލްމުވެރިންގެ މަޝްވަރާ ބޭނުންވާކަމަށާއި އަދި އިސްލާމީ ކަންކަން ހިންގުމުގައި އިލްމުވެރިން ދެއްވާ ލަފާ އަބަދުވެސް އިހުތިރާމުކުރާނެކަމަށް ވަޒީރު ޝަހީމް ވިދާޅުވިއެވެ.
އިސްލާމީ ފިޤުހުގައި ފަތުވާގެ މަޤާމަކީ ވަރަށް މަތިވެރި މަޤާމެއްކަން ފާހަގަކުރައްވަމުން، ޑރ. ޝަހީމް ވިދާޅުވީ ވަކި ކަމެއްގެ ޝަރުޢީ ހުކުމެއް ބަޔާންކުރުމުގެ ކުރިން އެކަމެއްގެ ހަޤީޤަތް ތަސައްވުރުކުރުމަކީ ޝަރުޢީ ގަވާއިދެއް ކަމުގައެވެ.
މިޒަމާނުގައި ކުރިމަތިވެފައިވާ ޒަމާނީ ފިޤުހީ މައްސަލަތަކުގައި ހުކުމްތައް ބަޔާންކުރުމުގައި ޖަމާޢީ ގޮތުން މަޝްވަރާކުރެވެންޖެހޭ ކަމަށްވެސް ވަޒީރު ވިދާޅުވިއެވެ. އަދި މިފަދަ ކަންކަމުގައި ފަރުދީ ގޮތުން ފަތުވާ ދިނުމަކީ އިސްލާމީ މުޖުތަމަޢު ބައިބައިވެގެން ހިނގައިދާނެ ކަމެއް ކަމަށްވެސް އެމަނިކުފާނު ވިދާޅުވިއެވެ.
