ޗައިނާއިން އެމރިކާގެ ޓެލެކޮމް ސެކްޓަރއަށް ޖާސޫސީ ސައިބަރ ހަމަލަތަކެއް ދީފައިވާ ކަމަށް ބުނެ ވައިޓް ހައުސްގެ އިސް އޮފިޝަލުން ޓެލެކޮމިއުނިކޭޝަންގެ އެގްޒެކެޓިވުންނާ ބައްދަލުކޮށް ފިއެވެ.
"މި ދާއިރާއަށް އަމާޒުކޮށްގެން ކުރިއަށް ގެންދާ މުހިންމު ސައިބަރ ޖާސޫސީ ކެމްޕޭނެއް" ހިނގަމުންދާތީ އެކަމާ ގުޅިގެން ބާއްވާފައިވާ ބައްދަލު ވުމެއްކަމަށް ވައިޓްހައުސްއިން ބުނެއެވެ.
އެމެރިކާގެ ކަމާބެހޭ ފަރާތްތަކުން ބުނެފައި ވަނީ ޗައިނާއާ ގުޅުން ހުރި ހެކަރުން ވަނީ އެތަކެއް ޓެލެކޮމް ކުންފުނިތަކުގެ ވިއުގައަށް ވަދެ އެމެރިކާގެ ގާނޫނު ތަންފީޒުކުރާ އިދާރާތަކަށް ހާއްސަކޮށްގެން އުފައްދާފައިވާ ސަވައިލެންސް ޑޭޓާ ފާސްކޮށް ހަދައި ޖާސޫސްކޮށްފައި ކަމަށެވެ.
އެމެރިކާގެ ސެނެޓްގެ އިންޓެލިޖެންސް ކޮމިޓީގެ ޗެއާމަން ސެނެޓަރު މާކް ވާނަރ ވޮޝިންޓަން ޕޯސްޓަށް ވިދާޅުވީ މި ހާދިސާއަކީ، "އެމެރިކާގެ ތާރީޚުގައި ވެސް ދިމާވި އެންމެ ނޭދެވޭ ޓެލެކޮމް ހެކް ކުރުމުގެ ހާދިސާ" ކަމަށެވެ.
ވައިޓް ހައުސްގެ ބައްދަލުވުމުގައި ބައިވެރިވެވަޑައިގަތީ ގައުމީ ސަލާމަތާ ބެހޭ މުޝީރު ޖޭކް ސުލިވާން އާއި ސައިބަރ އަދި އިމަރޖިންގ ޓެކްނޮލޮޖީގެ ޑެޕިއުޓީ ނޭޝަނަލް ސެކިއުރިޓީ އެޑްވައިޒަރ އޭން ނޮއިބަރގާ އެވެ.
ވައިޓްހައުސްއިން ބުނިގޮތުގައި މި ބައްދަލުވުމަކީ ޓެލެކޮމް ވިއުގައަށް ދޭ ސައިބަރ ހަމަލާތަކާ ދެކޮޅަށް ހަރުކަށިކޮށް ފިޔަވަޅު އެޅުމަށް އެމެރިކާ ސަރުކާރާއި އަމިއްލަ ފަރާތްތަކާ ޕާޓްނަރޝިޕް ހަދައި ގެން ކުރިއަށް ދިއުމަށް އެހީތެރިވެދެވޭނެ ގޮތްތަކާ ބެހޭ ގޮތުން ޓެލެކޮމިއުނިކޭޝަން ދާއިރާގެ އެގްޒެކެޓިވުންނާ މަޝްވަރާ ކުރުމަށް ލިބުނު ފުރުސަތެއް ކަމަށެވެ.
އެ ބައްދަލުވުމުގައި ބައިވެރިވި ޓެލެކޮމިއުނިކޭޝަން ކުންފުނިތަކާއި އެގްޒެކެޓިވުންގެ ނަމެއް ވައިޓް ހައުސްއިން ހާމައެއް ނުކުރެއެވެ.
ބެއިޖިން އިން ވަނީ އެމެރިކާއިން ކުރާ ތުހުމަތުތަކަށް އިންކާރު ކޮށްފައެވެ.
