ޗައިނާއާ ދެކޮޅަށް ފިލިޕީންސުން ޗައިނާ ކަނޑުގައި ކުރަމުންދާ މަސައްކަތަށް ބައިނަލްއަގްވާމީ ގޮތުން ފިލިޕީންސަށް ތާއީދު ލިބެމުންދާ ކަމަށް ތަހުލީލު ކުރާ ފަރާތްތަކުން ބުނެ އެވެ.
ދެކުނު ޗައިނާ ކަނޑުގެ މައްސަލައަކީ ސަރަހައްދީ މައްސަލައެއް ކަމަށާއި އެމައްސަލައާ ގުޅުން ނެތް ސަރަހައްދުން ބޭރުގެ ފަރާތްތަކުން އެކަމުގެ ތެރެއަށް ނުވަނުމަށް ޗައިނާއިން ދަނީ އެމެރިކާއާއި އެހެން ފަރާތްތަކަށް އިންޒާރު ދެމުންނެވެ.
ޕެރޫގައި ބޭއްވި އޭޝިއާ ޕެސިފިކް އިކޮނޮމިކް ކޯޕަރޭޝަން ސަމިޓުގެ ހަވާސާގައި އެމެރިކާގެ ރައީސް ޖޯ ބައިޑަންއާ ބައްދަލުކުރައްވައި ރައީސް ޝީ ޖިންޕިން ވަނީ ދެގައުމުގެ ސލްހަވެރި ގުޅުން ދެމެހެއްޓުމަށް ޗައިނާއިން ޝައުގުވެރިވާ ކަމުގައި ވިދާޅުވެފައެވެ. ނަމަވެސް ދެފަރާތުންވެސް އަނެއް ފަރާތުގެ މަސްލަހަތަށް ރިއާޔަތް ކުރުމަށް އެދިވަޑައިގަތެވެ.
"ދެކުނު ޗައިނާ ކަނޑުގައި ހުރި ޚިޔާލުތަފާތުވުންތައް މެނޭޖްކުރުމަށް އަބަދުވެސް އެންމެ ރަނގަޅު ގޮތަކީ ކަމާބެހޭ ގައުމުތަކުގެ މެދުގައި މަޝްވަރާއާއި ވާހަކަ ދެއްކުން،" ޝީ ވިދާޅުވިއެވެ.
އަދި ސްޕަރޓްލީ އައިލެންޑްސްއަށް ބެއިޖިން ކިޔާ "ނަންޝާ ކުންޑައޯ" އާ ގުޅޭ މައްސަލަތަކުގައި އެމެރިކާއަށް ވެސް "ނުބެހެވޭނެ" ކަމަށް ޝީ ވިދާޅުވި އެވެ.
ދާދި ފަހުން މެނިލާގައި ބޭއްވި ދެކުނު ޗައިނާ ކަނޑުގެ މައްސަލައާ ބެހޭ ފޯރަމެއްގެ ތަޖުރިބާކާރުން ވިދާޅުވީ، ޗައިނާގެ މިފަދަ އިންޒާރުތަކުގެ ބާރު ގެއްލިގެންދާ ކަމަށާއި، ބައިނަލްއަގްވާމީ ފަރާތްތަކުން ދަނީ ފިލިޕީންސްގެ މައްސަލައަށް އިއްތިފާގު ވަމުން ކަމަށެވެ.
