ކުރީގެ ބޮޑުވަޒީރު އިމްރާން ޚާންގެ ޕާޓީން މާދަމާ މުޒާހަރާއަށް ނިކުންނާނެ ކަމުގެ އިންޒާރު ދިނުމުން، ޕާކިސްތާނުން މިއަދު ވަނީ ވެރިރަށް އިސްލާމްއާބާދާއި ދިމާއަށް ދަތުރު ކުރާ ހައިވޭތައް ބަންދުކޮށް، ކޮންޓެއިނާތައް ބަހައްޓައި، އިންޓަނެޓާއި މޯބައިލްގެ ހިދުމަތް ބައެއް ތަންތަނުން ކަނޑާލައި ސެކިއުރިޓީ ވަރުގަދަކޮށްފަ އެވެ.
ސަރުކާރުން ވަނީ މުޒާހަރާ ފަސްކުރުމަށް ގޮވާލާފައެވެ. ނަމަވެސް ތަހުރީކޭ އިންސާފް ޕާޓީން އެކަމަށް އިޖާބަ ދީފައެއް ނުވެއެވެ. ސަރުކާރުން އެދިފައި ވަނީ ބެލަރޫސްގެ ވަފްދެއް އިސްލާމްއާބާދަށް ޒިޔާރަތް ކުރާތީ މިވަގުތަށް މުޒާހަރާ ނުކޮށް މަޑު ކޮށްލުމަށެވެ.
ތަހުރީކޭ އިންސާފުން މުޒާހަރާ ކުރަނީ 3 ކަމަކާ ދެކޮޅަށެވެ. އެއީ ގާނޫނުއަސާސީއަށް ބަދަލު ގެނަސް ފަނޑިޔާރުން އައްޔަން ކުރުމުގެ ބާރު ސަރުކާރުން ނަގާފައި ވުމާއި އިންތިޚާބުގައި މަކަރު ހަދައިގެން މޮޅުވުމާއި ޖުޑިޝަރީގެ ބާރު ކަނޑުވާލުމާ ދެކޮޅަށެވެ.
