އިންޓަރނޭޝަނަލް ކްރިމިނަލް ކޯޓުގެ ޕްރޮސެކިއުޓަރ ކަރީމް ޚާން ވަނީ، ރޮހިންޔާ މުސްލިމުންނާ މެދު ހަނގުރާމައިގެ ޖަރީމާތައް ހިންގިކަމަށް ބެލެވޭ ކަމަށް ވިދާޅުވެ، މިޔަންމާ ސިފައިންގެ ވެރިޔާ އަދި ވަގުތީ ރައީސް މިން އަންގް ހިއިންގް ހައްޔަރު ކުރުމުގެ އަމުރެއް ހޯދުމަށް ބައިނަލްއަގުވާމީ ކްރިމިނަލް ކޯޓަށް ހުށަހަޅަމުންދާ ކަމަށް އިއްޔެ ވިދާޅުވެފައެވެ.
"މިޔަންމާގެ ރާކައިން ސްޓޭޓްގައި 2016 އާއި 2017 ވަނަ އަހަރު ހިނގި އަނިޔާވެރިކަމުގެ ހަމަލަތަކާއި އޭގެ ފަހުން ރޮހިންޔާ މީހުން މިޔަންމާއިން ބަންގްލަދޭޝްއަށް ބޭރު ކުރި ކަމަށް ތުހުމަތު ކުރެވޭ ކުށްތައް ތަހުގީގު ކުރަން 14 ނޮވެމްބަރު 2019 އިން ފެށިގެން ކުރިއަށް ދަނީ" ކަރީމް ނެރުއްވި ބަޔާންގައި ވިދާޅުވި އެވެ.
"އެއްވެސް ފަރާތަކަށް ޖެހިލުމެއް ނެތި، އަޅުގަނޑުގެ އޮފީހުން ނިންމާފައި ވަނީ އިންސާނިއްޔަތާ ދެކޮޅަށް ހިންގާ ޖަރީމާތަކުގެ ޖިނާއީ ޒިންމާ މިޔަންމާގެ ޑިފެންސް ސާވިސަސްގެ ކޮމާންޑަރ އިން ޗީފް ސީނިއާ ޖެނެރަލް އަދި އެކްޓިން ރައީސް މިން އަންގް ހްލައިންގް އުފުއްލަވަން ޖެހޭނެ ކަމަށް ގަބޫލުކުރެވޭނެ ސަބަބުތަކެއް އެބަހުރި ކަމަށް" ކަރީމް ޚާން އިތުރަށް ވިދާޅުވިއެވެ.
އައިސީސީގެ ޕީޖީ ތުހުމަތު ކުރެއްވި ގޮތުގައި މި ޖަރީމާތައް ހިންގީ 25 އޮގަސްޓް 2017 އާއި 31 ޑިސެމްބަރު 2017 އާ ދެމެދު ފުލުހުންނާއި ބޯޑަރު ގާޑް ފުލުހުންގެ އިތުރުން ރޮހިންޔާ ނޫން އާންމުންގެ އެހީތެރިކަމާއެކު މިޔަންމާގެ ސިފައިން ކަމަށްވާ ޓަޓްމަޑޯ އިންނެވެ.
އޭނާ އިތުރަށް ވިދާޅުވީ މިޔަންމާގެ އެހެން އޮފިޝަލުންނާ ދެކޮޅަށް އަމުރު ނެރުމަށް އިތުރު ހުށަހެޅުންތަކެއް ވަރަށް އަވަހަށް ކުރިއަށްދާނެ ކަމަށެވެ.
