ސެނެގާލްގައި ހުރި ފްރާންސްގެ އަސްކަރީ މަރުކަޒުތައް ބަންދުކުރުން ނޫން ގޮތެއް ފްރާންސަކަށް ނޯންނާނެ ކަމަށް ސެނެގޯލްގެ ރައީސް ބަޝީރު ޑިއޮމައި ފޭ އިއްޔެ ވިދާޅުވެއްޖެއެވެ. ފްރާންސްގެ ނޫސް އެޖެންސީއާ ވާހަކަ ދައްކަވަމުން އޭނާ ވިދާޅުވީ އިގްތިސާދީ ގުޅުން ބަދަހި ވުމުގެ މާނައަކީ ސިފައިން ބޭތިއްބުމެއް ނޫން ކަމަށެވެ. ސެނެގޯލްގެ އެންމެ ބޮޑު ވިޔަފާރި ބައިވެރިޔާއަކީ ޗައިނާ ކަމަށްވާއިރު ޗައިނާގެ އަސްކަރީ މަރުކަޒެއް ސެނެގޯލްގައެއް ނުހުންނަ ކަމަށް ބަޝީރު ވިދާޅުވިއެވެ.
އޭނާ ވިދާޅުވީ ފްރާންސްގެ އަސްކަރީ މަރުކަޒެއް ސެނެގޯލްގައި ހުރުމަކީ ސެނެގޯލްގެ ސިޔާދަތާއި މިނިވަންކަމާ ފުށުއަރާ ކަމެއް ކަމަށެވެ.
ރިޔާސީ ގަނޑުވަރުގައި ބޭއްވި އިންޓަވިއުގައި ބަޝީރު އިތުރަށް ވިދާޅުވީ، "ސެނެގޯލަކީ މިނިވަން ގައުމެއް، އަދި ސިޔާދަތު އޮންނަ ގައުމެއްގައި ބޭރުގެ އަސްކަރީ މަރުކަޒުތައް ހުރެގެން ނުވާނެ" ކަމަށެވެ.
ބަޝީރު ވެރިކަމަށް ވަޑައިގަތީ މިނިވަންކަމާއި ސިޔާސަތުގެ ޝިއާރުތަކާ އެކުގައެވެ. އޭޕްރީލް މަހު ވެރިކަމާ ހަވާލުވެވަޑައިގެންނެވި ބަޝީރު ވަނީ އޭނާގެ ގައުމުން ފްރާންސް ސިފައިން އައުޓު ކޮށްލައްވާނެ ކަމަށް ވިދާޅުވެފައެވެ.
ސެނެގޯލްގެ އިސްތިއުމާރީ ބާރަކީ ފްރާންސެވެ. ފްރާންސަކީ އެގައުމުން އިސްތިއުމާރު ކުރި ތަންތާނގައި ގަތުލުއާމުތައް ހިންގުމުގައި އަރާހުރި ގައުމެކެވެ.
ސެނެގޯލްގައި ޑިސެމްބަރު 1، 1944 ގައި ވެރިރަށް ޑަކާރު ކައިރީގައި އޮންނަ ތިއާރޯޔޭގައި ފްރާންސްގެ އިސްތިއުމާރީ ސިފައިން ގަތުލުއާންމެއް ހިންގިއެވެ. މިއަދާހަމައަށް އެކަމަށް އެއްބަސްވާ ދެކޮޅު ހެދުމަށްފަހު، މީގެ 3 ދުވަސްކުރިން، ބަޝީރުއަށް، މެކްރޮން ރައީސް ފޮނުއްވި ސިޓީއެއްގައި އޭނާގެ ކާބަފައިން ހަނގުރާމައިގެ ޖަރީމާ ހިންގާފައިވާ ކަމަށާއި އެކަމަށް މައާފަށް އެދިވަޑައިގަންނަވާ ކަމަށް ވިދާޅުވިއެވެ. އޭގެ ރައްދުގައި ބަޝީރު ވަނީ ފްރާންސް ސިފައިން ފައިބައިގެން ދިއުން ނޫން ގޮތެއް ދެން ނޯންނާނެ ކަމަށް ވިދާޅުވެފައެވެ.
ފްރާންސުން ކުރިން ބާރު ދައްކަމުން ދިޔަ ޤައުމުތަކުން ދަނީ ފްރާންސް ބޭރުކޮށްލަމުންނެވެ. އަދި އެޤައުމުތަކުން މިހާރު ބަލަމުން ދަނީ ރަޝިޔާގެ ތާއީދަށެވެ.
