ބާރުގަދަ ތޫފާން "ފެންގަލް" އިންޑިޔާގެ ޓަމިލްނާޑޫގެ އައްސޭރިފަށަށް އަރައިފިއެވެ.
މި ތޫފާން އުފެދުނީ ބޭ އޮފް ބެންގަލްގައި އުފެދުނު ޑީޕް ޑިޕްރެޝަނުގެ ސަބަބުންނެވެ. ތޫފާން، ޓަމިލްނާޑޫގެ އައްސޭރިފަށަށް އެރުމާ ގުޅިގެން މޫސުމާ ބެހޭ އިދާރާއިން ވަނީ މަސްވެރިން ސަލާމަތާއި ރައްކާތެރިކަން ހޯދުމަށް އިލްތިމާސް ކޮށްފައެވެ. އަދި އެސަރަހައްދުގެ ސްކޫލްތައް ވަނީ މުއްދަތެއް ނެތް ގޮތަށް ބަންދުކޮށްފައެެވެ.
އިންޑިއާގެ މޫސުމާ ބެހޭ އިދާރާއިން ލަފާކޮށްފައިވަނީ ތޫފާނުގެ ސަބަބުން ގަޑިއަކު 70-80 ކިލޯމީޓަރު (43 މޭލާއި 50 މޭލާ ދެމެދުގެ ބާރުމިނުގައި) ވައި ޖެހޭނެ ކަމަށެވެ. އަދި ބޯކޮށް ވާރޭވެހި ބިންގަނޑު ކަނޑައިގެން ދިޔުމުގެ ހާދިސާތައް ހިނގާނެކަމަށްވެސް ވަނީ ލަފާކޮށްފައެވެ.
ތޫފާން "ފެންގަލް" ޓެމިލް ނާޑޫ ސްޓޭޓަށް މެންދުރުފަހު އަރާނެ ކަމަށް ލަފާކުރެވޭ ކަމަށާއި ގަޑިއަކު 70-80 ކިލޯމީޓަރު (43 މޭލާއި 50 މޭލާ ދެމެދުގެ ބާރުމިނުގައި) ވައި ޖެހޭނެ ކަމަށް ލަފާކުރެވޭ ކަމަށްވެސް މޫސުމާ ބެހޭ އިދާރާއިން ވަނީ ލަފާކޮށްފައެވެ.
ތޫފާނުގެ އަސަރު އެންމެ ބޮޑަށް ކުރާނެ ކަމަށް ލަފާކޮށް އިންޒާރު ނެރެފައިވަނީ، ޗެންނާއީ، ޓްރިވައްލޫރު، ކަންޗީޕޫރަމް، ކައްލަކުރިޗީ، ޕުޑުއްޗެރީ އަދި ކުއްޑަލޯރު ޑިސްޓްރިކްޓަށެވެ. މި ސަރަހައްދުތަކަށް މިއަދުގެ މެންދުރު ފަހުގު ވަގުތެއްގައި ތޫފާން އަރާނެކަމަށް އިންޑިޔާގެ މޫސުމާ ބެހޭ އިދާރާއިން ވަނީ ލަފާކޮށްފައެވެ.
