ޗައިނާއިން ނިއުޔޯކުގައި ގާނޫނާ ޚިލާފަށް ފުލުހުންގެ މަރުކަޒެއް ހިންގި ކަމަށާއި އަދި ޗައިނާ ސަރުކާރަށް މަސައްކަތް ކޮށްދިން ކަމަށް ބްރޫކްލިންގެ ފެޑެރަލް ކޯޓުގައި މީހަކު ވަނީ ކުށަށް އިއުތިރާފުވެފަ އެވެ.
ޗެން ޖިންޕިންގް ކިޔާ އެ މީހާގެ މައްޗަށް މިދިޔަ އަހަރު ތުހުމަތު ކޮށްފައި ވަނީ ހުއްދަ ނެތި ޗައިނާގެ ފުލުހުންގެ މަރުކަޒެއް އެމެރިކާގައި ހިންގުމަށް އެހީތެރިވެދީ، ބޭރުގެ އޭޖެންޓެއްގެ ގޮތުގައި ރަޖިސްޓްރީ ނުކޮށް އޭނާގެ ހަރަކާތްތައް އެމެރިކާ ސަރުކާރަށް ފޮރުވި ކަމަށެވެ. މިސްޓަރ ޗެންގެ މައްޗަށް ކުރި ދައުވާގައި ހެރީ ލޫ ނަމަކަށް ކިޔާ މީހަކާއި ލޫ ޖިއަންވަންގް ނަމަކަށް ކިޔާ މީހަކުވެސް ބައިވެރިކޮށްފައި ވެއެވެ.
އެމެރިކާގެ ފެޑެރަލް ޕްރޮސެކިއުޓަރުން ކޯޓުގައި ބުނީ ޗައިނާ ޕޮލިސް ސޓޭޝަން ނިއުޔޯކުގައި ހިންގާކަމުގެ ތަހުގީގެއް ފަށާފައިވާކަން އެނގުމުން ޗައިނާގެ މިނިސްޓްރީ އޮފް ޕަބްލިކް ސެކިއުރިޓީގައި އެ 3 މީހުންގެ ކަންކަން ބަލަހައްޓަމުން ދިޔަ މީހާއާ ދެމެދު ބަދަލުކުރި ޓެކްސްޓް މެސެޖުތައް ނައްތާލާފައިވާ ކަމަށެވެ. އަދި އެކަން ކޮށްފައި ވަނީ 2022 ވަނަ އަހަރުގެ އޮކްޓޯބަރު މަހު ކަމަށެވެ. އެ ދުވަސްވަރަކީ، ނިއުޔޯލުގެ ޗއިނާ ޓައުންގައި ހަ ބުރީގެ އިމާރާތް ބަލައި އެފްބީއައިއިން ފާސްކުރި ދުވަސްވަރެވެ.
ކޯޓުގައި ޗެން ވަނީ ތަރުޖަމާނަކު މެދުވެރިކޮށް އޭނާގެ ކުށަށް އިއުތިރާފްވެފައެވެ. އަދި އޭނާ "ބޭރު ސަރުކާރެއްގެ އޭޖެންޓެއްގެ ގޮތުގައި މަސައްކަތް ކުރުމަށް އެހެން މީހުންނާ ގުޅުނު ކަމަށާއި" ގާނޫނީ ގޮތުން ލާޒިމުކުރާ ގޮތަށް ބޭރުގެ އޭޖެންޓެއްގެ ގޮތުގައި ރަޖިސްޓްރީކޮށްފައި ނުވާ ކަމަށްވެސް އެއްބަސްވިއެވެ.
ދެން ތިބި ދެމީހުން ވެސް ވަނީ ކުށަށް އިއުތިރާފް ވެފައެވެ. މި ދެމީހުންނަކީވެސް އެމެރިކާގެ ރައްޔިތުންނެވެ. މިމީހުންގެ ޝަރީއަތުގައި ޙުކުމް ކުރުން އަދި އޮންނާނީ ފަހުގެ ތާރީޚެއްގައެވެ.
