ކޮންޓްރޯލް ވުމެއްނެތި ކޮވިޑަށް ޕޮޒިޓިވް ވަމުންދާ މީހުންގެ އަދަދު މާލޭ ސަރަހައްދުގައި އިތުރުވަމުންދާތީ އެޗުޕީއޭއިން ފިޔަވަޅުތައް ވަރުގަދަ ކޮށްފިއެވެ.
މާލޭ ސަރަހައްދުގެ ފިޔަވަޅުތައް ވަރުގަދަކޮށް އެތަނުން ވަނީ އެއްފަހަރާ އެންމެ ގިނައިން އެއްވެވޭނެ މީހުންގެ އަދަދު 10 އިން 5 އަށް މަދު ކޮށްފައެވެ.
މީގެ އިތުރުން މާލޭ ސަރަހައްދުގައި ބޭރުގައި އުޅެވޭނީ ފަތިހު 4:30 އިން ފެށިގެން ރޭގަނޑު 11:30 އަށެވެ. އަދި އެއްގަމު އުޅަނދުފަހަރު ދުއްވޭނީ ފަތިހު 4:30 އިން ހަވީރު 6:00 އަށެވެ. މީގެ އިތުރުން ކުރިން އަޅުއްވައިފައިވާ ފިޔަވަޅުތައް ވަނީ އިތުރު 7 ދުވަހަށް ދަންމާލައިފައެވެ.
އެޗުޕީއޭއިން މިބަދަލް ގެންނެވުމުން ރައްޔިތުންގެ މަޖިލީހުގެ ކުރީގެ މެމްބަރު މުޙައްމަދު މުސްތަފާ ވަނީ ސަރުކާރަށް ފާޑުވިދާޅުވެފައެވެ. އޭނާ ވިދާޅުވެފައިވަނީ އެންމެ ގިނައިން އެއްވެވޭ އަދަދު މަދު ކުރުމުން އެއިން އެނގިގެންދިޔައީ ކޮވިޑަކީ ސަރުކާރުން ގެންގުޅޭ ސިޔާސީ ހަތިޔާރެއް ކަމަށެވެ.
"10 މީހުން 5 މީހުންނަށް ބަދަލުވުމުން ކޮވިޑަކީ ސަރުކާރުން ގެންގުޅޭ ސިޔާސީ ހަތިޔާރެއްކަން އެނގި ނިމިއްޖެ،" އޭނާ ކުރައްވާފައިވާ ޓުވީޓެއްގައި ވިދާޅުވެފައިވެއެވެ.
އެޗުޕީއޭގެ އެންމެފަހުގެ ހިސާބުތައް ދައްކާ ގޮތުގައި މާރިޗު 4 ވަނަ ދުވަހު ރާއްޖެއިން ޕޮޒިޓިވްވެފައިވަނީ ޖުމްލަ 167 މީހުންނެވެ. އެގެ ތެރެއިން 135 މީހުންނަކީ މާލޭ ސަރައްދުން ޕޮޒިޓިވްވީ މީހުންނެވެ. ރަށްރަށުް ޕޮޒިޓިވްވީ މީހުންގެ އަދަދަކީ 17 އެވެ. ރިސޯޓުތަކުން ޕޮޒިޓިވްވެފައިވަނީ 15 މީހުންނެވެ.
