އީރާންގެ ޗާބާރު ޕޯޓް މެދުވެރިކޮށް ދުނިޔޭގެ ދެކުނު ބިތާއި އުތުރު ބިތް މުދާ އުފުލުމުގެ ދަތުރުތަކަށް ގުޅުވާލުމަށް އިންޑިއާއިން ހުށަހަޅައިފިއެވެ. ޗާބާރު ޕޯޓަކީ، އީރާނުގެ ތެރޭން ލައިގެން އަފްޣާނިސްތާމނަށާއި މެދުތެރޭ އޭޝިއާގެ ގައުމުތަކާއި ރަޝިޔާއަށް ރޭލުގެ މަގުން ދެވެން އޮންނަ ރާސްތާއެކެވެ.
މި ރާސްތާ ހުޅުވާލުމުން، 13 ގައުމެއް 7200 ކިލޯމީޓަރުގެ މަގަކުން ގުޅުވާލެވޭނެއެވެ. މީގ އިތުރުން އަފްޣާނިސްތާނާއި އުޒުބެކިސްތާންވެސް މި މަގާ ގުޅުވާލެވޭނެއެވެ.
ޗާބާރު ޕޯޓް ބަލަހައްޓާ ގައުމުތަކަށް އެމެރިކާގެ ފިއްތުންތައް
ޗާބާރު ޕޯޓަކީ އިންޑިއާގެ ކުންފުނިތަކަކުން ޝަހީދު ބެހިޝްތީ ބަނދަރުގައި ކޮންޓެއިނާ ޓާމިނަލެއް ހިންގާ ޕޯޓެކެވެ. މި ބަނދަރު ހެދުމުގައިއާއި، އަދި ކެރޭންތައް ބެހެއްޓުމުގައި އިންޑިއާއިން އިންވެސްޓް ކޮށްފައި ވެއެވެ.
އަފްޣާނިސްތާނަށް މުދާ އުފުލުމުގައި އިންޑިއާއިން ވަނީ ކޮވިޑްގެ ފުރަބަންދުގެ ތެރޭގައި މި ބަނދަރު ބޭނުންކޮށްފައެވެ. އަދި އިންޑިއާއިން ބުނާ ގޮތުގައި މިކަން ވެގެން ގޮސްފައި ވަނީ ކާމިޔާބު އޮޕަރޭޝަނަކަށެވެ.
އިންޑިއާއިން ބާއްވާފައިވާ މެރިޓައިމް ސަމިޓް 2021ގައި އިންޑިއާއިން ވަނީ ޗާބާރު ޑޭ ފާހަގަ ކޮށްފައެވެ. އިންޑިއާއިން ޗާބާރު ބަނދަރު މެދުވެރިކޮށް ދުނިޔޭގެ އުތުރު ބިތާއި ދެކުނު ބިތް ގުޅުވާލުމަށް ހުށަހަޅާފައި ވަނީ އިންޑިއާގެ ޚާރިޖީ ވަޒީރު ޑރ. ޖަޔަޝަންކަރު ދެއްވި ތަގްރީރެއްގައެވެ.
އިންޓަރނޭޝަނަލް ނޯރތު ސައުތު ޓްރާންސްޕޯޓް ކޮރިޑޯރ ގައި ހިމެނެނީ، އިންޑިއާއާއި އީރާނާއި ރަޝިޔާއާއި ތުރުކީވިލާތާއި އަރމީނިއާއާއި އަޒަރްބައިޖާނާއި ބެލަރޫސްއާއި ކަޒަޚިސްތާނާއި ކިރިގީޒިސްތާނާއި ތާޖިކިސްތާނާއި އޮމާނާއި ސޫރިޔާއައި ޔޫކްރެއިން އިންއެވެ.
މި ކޮރިޑޯ އުފެއްދުމަށް 2000 ވަނަ އަހަރުން ފެށިގެން ދަނީ މަސައްކަތް ކުރެވެމުންނެވެ. މީގެ މަގްސަދަކީ، ކޮންޓެއިނާ ކާގޯ އުފުލުމާއި މުދާ އުފުލުމަށ ްކުރާ ހޭދަ ކުޑަ ކުރުމެވެ.
