އިނޮމިކް މިނިސްޓަރު ފައްޔާޒު އިސްމާއީލްގެ އިތުބާރު ނެތްކަމުގެ މައްސަލަ، ކުރިއަށް ނުދާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލިސް ރައީސް މިހެން ވިދާޅުވީ، މަޖިލީހުގެ މަސަައްކަތްތަކާބެހޭގޮތުން، މިރޭ މީޑިއާއާ ބައްދަލު ކުރެއްވުމުން، ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުންނެވެ.
ރައްޔިތުންގެ މަޖިލީހަށް ފައްޔާޒުގެ އިތުބާރު ނެތްކަމުގެ މައްސަލަ ވައްދައިގެން، އިކޮނޮމިކް މިނިސްޓަރުކަމުގެ މަގާމުން އޭނާ ވަކިކުރަން، މަޖިލިސް ރައީސް ނަޝީދު އިސްވެ ހުންނަވައިގެން، މަޖިލީހުގެ ނިމިދިޔަ ދައުރުގައި ވަނީ މަސައްކަތްތަކެއް ކުރައްވައިފައެވެ.
ނަަމަވެސް އެކަމަށް ބޭނުންވާ ވަރަށް މަޖިލިސް މެންބަރުންގެ ސޮއި ރައީސް ނަޝީދަށް ލިބިވަޑައިގެންފައެއް ނުވެއެވެ.
އެ މައްސަލައިގައި ފައްޔާަޒަށް އިތުބާރު އޮތް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ވިދާޅުވެފައެވެ.
އިތުބާރު ނެތްކަމުގެ މައްސަލައިގައި ފައްޔާުޒު ދިފާއު ކުރައްވާނެ ކަމަށްވެސް ރައީސް ވަނީ ވިދާޅުވެފައެވެ.
އެމައްސަަލައާބެހޭގޮތުން ނޫސްވެރިއާ ކުރި ސުވާލުގެ ތެރެެއިން، ރައީސް އިބޫ ސޯލިހު ވިދާޅުވެގެން އެކަން ހުއްޓަވައި ލެއްވީތޯ ވެސް ސުވާލު ކުރެއްވިއެވެ.
އެސުވާލުތަކަށް ޖަވާބު ދެއްވަމުން މަޖިލިސް ރައީސް ވިދާޅުވީ، 10 މެންބަރުން ސޮއިކުރައްވައި ހުށަހެޅުއްވުމުން، އެ ވަޒީރެއްގެ އިތުބާރު ނެތްކަމުގެ މައްސަލަ މަޖިލީހުގައި ކުރިއަށްދާނެ ކަމަށެވެ. ނަމަވެސް އެފަދަ މައްސަލައެއް އަދި ހިނގަމުން ނުދާ ކަމަށްވެސް ވިދާޅުވިއެވެ.
އެމަނިކުފާނު ވިދާޅުވީ، އެމަނިކުފާނާއި، ރައީސް އޯލިހާ ދެބޭފުޅުންނަކީ، "އެކަކު އަނެކަކު ގާތުގައި ކަންކަން ހުއްޓާލައި، ފަށަން ބުނަންޖެހޭ ބައެއްނޫން،" ކަމަށެވެ.
އެ ދެބޭފުޅުންނަކީ އެކަކު އަނެކަކު ކުރާކަންކަން ސާފުކޮށް ދެމިތިއްބަވައިގެން ކަންތައްތައް ކުރައްވާ ދެ ބޭފުޅުން ކަމަށްވެސް ވިދާޅުވިއެވެ.
