ސިއްޙަތަށް ފައިދާ ހުރި ކާނާގެ ލިސްޓްގެ އެންމެ ކުރީގައި ހިމެނޭނީ ތާޒާ މޭވާ އެވެ. އާނއެކެވެ. މޭވާއަކީ ސިއްޙަތަށް ފައިދާ ހުރި ކާނާއެކެވެ. ހަށިގަނޑަށް ނިޔުޓްރިޝަން ލިބިދޭ އެންމެ މުހިންމު އެއްބާވަތެވެ. އެހެންނަމަވެސް މި މޭވާ ދޮންކުރުމަށްޓަކއި ކެމިކަލް ބޭނުންކުރާކަން އެނގޭ ހެއްޔެވެ؟ އެ ކެމިކަލް އަކީ އިންސާނާގެ ފުރާނައަށް ނުރައްކާވާ އެއްޗެއްކަން ދެނަހުރިން ހެއްޔެވެ؟
ވިޔަފާރީގެ ވާދަވެރި ބާޒާރުގައި އެއްބަޔަކު އަނެއްބަޔަކަށްވުރެ ކުރިއަރައި ދިއުމަށް ޓަކައި ނުވަތަ އަވަހަށް ނަފާ ހޯދުމަށް ޓަކައި މޭވާ ދޮންކުރުމަށް ކެމިކަލް ބޭނުން ކުރެއެވެ. މި ކެމިކަލް އަށް ކިޔަނީ "އާޓިފިޝަލް ރިޕައިންޑް ފުރުޓް" އެވެ. މި ކެމިކަލް ބޭނުން ކޮށްފައިވާ މޭވާ ކެއުމުން ފުރާނައަށް ނުރައްކާވާ ބޮޑެތި ބަލިތަކަށް މީހާ ހުށަހެޅެ އެވެ.
މޭވާ ދޮންކުރުމަށް ބޭނުންކުރާ ކެމިކަލް
މޭވާ އަވަހަށް ދޮންކުރުމަށް އެންމެ ގިނައިން ބޭނުންކުރާ ކެމިކަލް ތައްޔާރުކޮށްފައި ހުންނަނީ ކެލްސިއަމް އާއި ކާބްރައިޑް ބޭނުންކޮށްގެނެވެ. މިއަށް މަސަލަވެސް ކިޔައެވެ. މި ކެމިކަލް ބޭނުން ކުރުމުން މޭވާގެ ކުލަ ބަދަލު ކޮށްދެއެވެ.
ކެމިކަލް ބޭނުންކޮށްފައިވާ މޭވާ
ކެމިކަލް ބޭނުންކޮށްފައިވާ މޭވާ ބޭރުފުށުން ދޮންވެ ތާޒާވެފައިވާކަން ދައްކައެވެ. އަދި އަތްޖައްސާލުމުން މަޑުވެސް ވާނެއެވެ. އެހެންނަމަވެސް އޭގައި ތާޒާ މީރު މޭވާގެ ރަހައެއް ނުހުންނާނެއެވެ. ސަބަކީ އެއީ ގުދުރަތީގޮތުން ރަނގަޅަށް ދޮންނުވާ މޭވާ ކަމަށް ވާތީއެވެ. އަދި މިފަދަ މޭވާގައި ބައެއްފަހަރަ ވިހަ ރަހަ ލައެވެ.
ކެމިކަލް ބޭނުންކޮށްފައިވަ މޭވާ ކެއުމުން ލިބޭ ގެއްލުން
ގިނަ ދިރާސާތަކުން ހާމަވާގޮތުގައި ކެމިކަލް ބޭނުންކޮށްފައިހުންނަ މޭވާ ކެއުމުން އެކި ބާވަތްތަކުގެ ކެންސަރު ޖެހުމަށް މަގުފަހިވެއެވެ. އަދި ގޮހޮރުގެ ބަލިތަކާއި، ނޭވާލާ ނިޒާމަށް ޖެހޭ ބަލިތަކާއި، ލޮލުގެ ފެނުމަށް ގެއްލުން ލިބެއެވެ. މީގެ އިތުރަށް ސިކުނޑީގެ ދުޅަހެޔޮ ކަމަށްވެސް އަސަރު ކުރެއެވެ.
ރާއްޖޭގައިވެސް ފުރާނައަށް ނުރައްކާތެރި ގިނަ ބަލިތައް ތަހައްމަލުކުރާމީހުން އެއްދުވަހުން އަނެއްދުވަހަށް މިދަނީ އިތުރުވަމުންނެވެ. ފަހަކަށް އައިސް މީސްމީޑިއާގެ އެކި މަންސަ ތަކުގައި ރާއްޖޭގައި ވިއްކަން ހުންނަ ކާބޯތަކެތީގެ ރައްކާތެރިކަން ކަށަވަރުކުރުމަށް ގޮވަމުން އެބަދެއެވެ. މިއަދު ފެނުނު ލިޔުމެއްގައިވެސް ވެއެވެ. "ބާޒާރުގައި ވިއްކަންހުންނަ މޭވާއާއި ތަރުކާރީގައި ކެމިކަލް ހުންނަ މިންވަރު ޗެކް ކޮށްދިނުމަކީ ލާޒިމް ކަމެއްކަމަށްވެއްޖެ! މިހާރު މިއޮތީ ވަރަށް ނުރައްކާތެރި ހާލަތަކަށް ވެއްޓިފައި. ޒިންމާ ނަގާނެ ފަރާތެއް ނެތްތޯ؟" އާންމުންގެ މި އިހުސާސްތައް އަޑު އަހައި ރާއްޖޭގައި ވިއްކާ ކާބޯތަކެތީގެ ރައްކާތެރިކަން ކަށަވަރު ކުރުމަކީ މިހާރުން މިހާރަށް އަޅަންޖެހިފައިވާ މުހިންމު ފިޔަވަޅެކެވެ.
