ޔުނައިޓެޑް އަރަބް އެމިރޭޓްސްގެ އަމީރު ޝެއިޚް ޚަލީފާ ބިން ޒާއިދު އާލް ނަހްޔާން ދިގު މުއްދަތެއްގެ އާލާސްކަންފުޅަކަށްފަހު މިއަދު އަވަހާރަވެއްޖެއެވެ. އަމީރުގެ އުމުރުފުޅަކީ، 73 އަހަރެވެ.
ޔޫއޭއީގެ ރިއާސީ ދީވާނުން އިއުލާން ކުރި ގޮތުގައި ހުކުރު ދުވަހުން ފެށިގެން ހުރިހާ މިނިސްޓްރީތަކާއި އަމިއްލަ ދާއިރާތަކުގެ މަސައްކަތް ތިން ދުވަހުގެ މުއްދަތަށް ބަންދުވާނެއެވެ. އަދި ދިދަތައް ބައިދަނޑިއަށް ތިރިކޮށްފައި ހުންނާނެއެވެ.
ޚަލީފާ ވަނީ އާލާސްކަންފުޅާހެދި، ގައުމުގައި ވެރިކަމުގެ ކަންކަމުގައި ދުވަހުން ދުވަހަށް ބައިވެރިވުން ހުއްޓަވާލައްވާފައެވެ. ޔޫއޭއީގެ ކަންކަން ހިންގަވަމުން ގެންދެވީ އަބޫދާބީގެ ވަލީއަހުދު މުހައްމަދު ބިން ޒާއިދޖު އެވެ. ޚަލީފާގެ ފަހުން ޔޫއޭއީގެ ރިއާސަތާ ޙަވާލުވެ ވަޑައިގަންނަވާނެ ފަރާތެއް ކަނޑައަޅާފައެއް ނުވެއެވެ. ނަމަވެސް ދެން އެމަގާމަށް ވަޑައިގަންނަވާނީ މުޙައްމަދު ބިން ޒާއިދުކަމަށް ބެލެވެއެވެ.
އާލާސްކަން ފުޅާހެދު ރަސްމީ ޙަފްތާލަކުން ޚަލީފާ ފެނިވަޑައިނުގަންނަވާތާ އެތައް އަހަރެއް ވެއްޖެއެވެ. އޭނާ ޔޫއޭއީގެ ރިއާސަތަށް ވަޑައިގަތީ ޔޫއޭއީގެ ބާނީ ޝެއިޚް ޒާއިދު އަވަހާރަވުމަށްފަހު 2004ގައެވެ.
ޔޫއޭއީގެ އިމާރާތެއްކަމަށްވާ ދުބާއީގައި ހުރި ދުނިޔޭގެ އެންމެ އުސް ޓަވަރަށް ބުރުޖް ޚަލީފާގެ ނަމުން ނަން ދީފައި ވަނީ އެ އިމާރާތަށް މާލީ ދަތިކަމެއް ކުރިމަތިވި ދުވަސްވަރު ޚަލީފާ އެކަމުގައި އެހީތެރިވެ ދެއްވުމުންނެވެ.
