ޔޫއޭއީގެ އިއްތިޙާދުގެ ސުޕްރީމް ކައުންސިލުން ދައުލަތުގެ ރައީސް ކަމަށް މުހައްމަދު ބިން ޒާއިދު އާލް ނަހުޔާން އިންތިހާބު ކޮށްފިއެވެ.
ޔޫއޭއީ ސަރުކާރުން އިއުލާން ކޮށްފައި ވަނީ "ގާނޫނުއަސާސީގެ 51 ވަނަ މާއްދާގައިވާ ގޮތުން މަރުހޫމް ޝެއިޚް ޚަލީފާ ބިން ޒާއިދު އާލް ނަހްޔާންގެ ބަދަލުގައި ޔުނައިޓެޑް އަރަބް އެމިރޭޓްސްގެ ރައީސް ކަމަށް އިއްތިފާގުން އިންތިޚާބު ކޮށްފައި ވަނީ ޝެއިޚް މުހައްމަދު ބިން ޒާއިދު އާލް ނަހްޔާން" ކަމަށެވެ.
ޔޫއޭއީގެ ސުޕްރީމް ކައުންސިލުން މި ނިންމުން ނިންމީ ޔޫއޭއީގެ ނައިބު ރައީސް އަދި ބޮޑުވަޒީރު އަދި ދުބާއީގެ ވެރިޔާ ޝެއިޚް މުހައްމަދު ބިން ރާޝިދު އާލް މަކްތޫމް އިސްކޮށް ހުންނަވައިގެން މިއަދު ބޭއްވި ބައްދަލުވުމުގަ އެވެ.
އަބޫދާބީގެ ވަލީއަހުދު މުހައްމަދު ބިން ޒައިދު އިންތިޚާބު ކޮށްފައި މިވަނީ ޔޫއޭއީގެ ރައީސް ޝެއިޚް ޚަލީފާ އުމުރުފުޅުން 74 އަހަރުގައި އަވަހާރަވިކަން އިއުލާން ކުރިތާ އެއް ދުވަސް ފަހުންނެވެ.
