ސްޓެލްކޯ ސްޓާފް ހައުސިންގ ޕްރޮޖެކްޓްގެ ދަށުން ހުޅުމާލޭ ދެވަނަ ފިޔަވަހީގައި ތަރައްގީކޮށްފައިވާ ސްޓެލްކޯ ހިޔާގެ 2 ޓަވަރަށް އެ ކުންފުނީގެ އަމިއްލަ ޚަރަދުގައި ކަރަންޓުލުމުގެ އިންތިޒާމްތައް ހަމަޖެއްސުމަށް އެ ކުންފުނީގެ ޑިރެކްޓަރުންގެ ބޯޑުން މިރޭ ނިންމައިފިއެވެ.
އެ ދެ ޓަވަރަށް ކަރަންޓު ލުމުގެ މަސައްކަތް ކުރީން ހަވާލުކޮށްފައި އޮތީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާ އެވެ. އެހެންނަމަވެސް އެ މަސައްކަތް ލަސްވާތީ، އެކަން އަވަސް ކުރުމުގެ ގޮތުން، ސްޓެލްކޯގެ އަމިއްލަ ޚަރަދުގައި އަމިއްލަ މުވައްޒަފުންނާއެކު އެކަން ކުރާގޮތަށް ބޯޑުން ނިންމެވީއެވެ.
އެޗްޑީސީން އެންމެފަހުން ހާމަކޮށްފައިވާ ގޮތުގައި އެ މަސައްކަތް ހަވާލު ކޮށްފައިވާ ކުންފުނިން މި އަހަރުގެ ސެޕްޓެމްބަރު މަހުގެ ތެރޭގައި ސްޓެލްކޯގެ ޓަވަރުތަކަށް ވެސް ކަރަންޓް ގުޅައިދޭނޭ ކަމަށެވެ. އެޗުޑީސީން ވެސް އެކަންކުރަނީ އެހެން ބަޔަކާ ހަވާލުކޮށްގެންނެވެ.
ސްޓެލްކޯއިން ބުނެފައިވަނީ، އެ ކުންފުނީގެ ބޯޑުގެ ނިންމުމާއި އެއްގޮތަށް، ފުލެޓުތަކަށް ކަރަންޓު ދިނުމަށް ބަހައްޓަންޖެހޭ ޓްރާންސްފޯމަރު ބެހެއްޓުމުގެ މަސައްކަތް މިހާރު ފެށިފައިވާ ކަމަށެވެ.
