ނިޝާން މުލީގޭ ޝަރަފުގެ ޢިއްޒަތް މިރޭ ލިބިވަޑައިގެންނެވި މިނިސްޓަރ އޮފް ހެލްތު އަޙްމަދު ނަސީމަކީ އޭރަކު ހުންނެވި ވެރިއަކު ހަވާލު ކުރައްވާ ކަޮންމެ މަސައްކަތެއް އިޚުލާސްތެރިކަމާއި ފަރުވާތެރިކަމާއެކު ކުރައްވާ ބޭފުޅެއް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެެއްޖެއެވެ.
ގައުމީ އިނާމް ދެއްވުމަށް ދަރުބާރުގޭގައި މިރޭ ބޭއްވި ޖަލްސާގައި ރައީސް ވަނީ ނަސީމަށް އެ އިއްޒަތް ލިބިވަޑައިގެންނެވުމުން ދިވެހި ދައުލަތުގެ ނަމުގަޔާއި، ދިވެހި ރައްޔިތުންގެ ނަމުގަޔާއި އެމަނިކުފާނުގެ ނަމުގައ އިޚްލާސްތެރިކަމާއެކު ތަހުނިޔާއާއި މުބާރަކްބާދީ ދަންނަވާފައެވެ.
މިރޭގެ ޖަލްސާގައި ރައީސް ވިދާޅުވީ "އެ މަނިކުފާނަކީ އެވަގުތަކު ހުންނެވި ވެރިޔަކު ޙަވާލުކުރެއްވި ކޮންމެ ކަމެއްވެސް ވަރަށް ފަރުވާތެރިކަމާއި އިޚްލާސްތެރިކަމާއެކު ކުރައްވާ ބޭފުޅެއް. ސަރުކާރުން އޭރު ފެށި ބޮޑެތި ބައެއް މަޝްރޫޢުތައް ހިންގެވުމުގައި ވަރަށް މުހިންމު ދައުރެއް އަދާކުރެއްވި ބޭފުޅެއް،" ކަމަށެވެ.
ނަސީމް މިނިސްޓަރ އޮފް ހެލްތު ކަމުގެ މަގާމުގައި ހުންނަވައިގެން، މިހާރުވެސް ކޮށްދެއްވަމުން ގެންދަވަނީ ފާހަގަކޮށްނުލާ ދޫކޮށްލެވޭނޭ ކީދުމަތްތަކެއް ނޫންން ކަމަށް ރަައީސް ވިދާޅުވިއެވެ. "ޚާޢްޞަކޮށް، ކޯވިޑް-19ގެ ދަތި އުނދަގޫ ދުވަސްވަރުވެސް، ރެޔާއި ދުވާލު ކުރައްވަމުން ގެންދެވި ބުރަ މަސައްކަތް އަޅުގަނޑަށް ވަނީ ފެނިފައި. އަދި ރިޕޯޓުގައި ފާހަގަކުރެވިފައި ނެތް ނަމަވެސް، ނަސީމަކީ ވަރަށް ވަރުގަދަ ސްޕޯޓްސް ޕާރސަނަލިޓީއެއް. ކުޅިވަރުގެ މައިދާނުގައި ހުނަރުވެރި، ޒުވާން ދައުރުގައި ހުނަރުވެރި ކުޅުންތެރިއެއް. ކުރިކެޓް ކުޅުންތެރިއެއް. ވޮލީ ކުޅުންތެރިއެއް. އަދިވެސް ރާއްޖޭގައި އޭރު ތަޢާރުފުވެގެން އައި ކުޅިވަރުގެ އެތައް އެތައް އެތައް މައިދާނެއްގައި ރަންވަނަތަކެއް ހޯއްދަވައިފައި ހުންނެވި ބޭފުޅެއް. ޚާއްޞަކޮށް، އަޅުގަނޑު ހަނދާންވާގޮތުން ރާއްޖޭގެ އެންމެ ފުރަތަމަ ވޮލީ ޗެމްޕިއަނަކީވެސް ނަސީމް،" ރައީސް ވިދާޅުވިއެވެ.
ނަސީމަކީ ރާއްޖޭގެ ފަތުރުވެރިކަން އުފަން ކުރެއްވި އެއް ބާނީ ކަމަށާއި ދިވެހި ފަތުރުވެރިކަން، މިއަދު މިއޮތް ފެންވަރަށް ކުރިއަރައިގެން ހިނގައިދާނެކަމުގެ އެއްވެސް އަލިމަގެއް އަދި އުންމީދެއް ފެންނަން ނެތް ދުވަސްވަރެއްގައި، ނަސީމް އެކަމަށް ޚިޔާލު ކުރައްވައި، ފަތުރުވެރިކަމަކީ ރާއްޖޭގައި ކުރިއަށް ގެންދެވިދާނެ، އަދި ވަރަށް ބޮޑަށް ފުޅާކުރެވިދާނެ ކަމެއް ކަމަށް ދެކެވަޑައިގެން މަސައްކަތް ފެށްޓެވި ބޭފުޅެއް ކަމަށް ރައީސް ވިދާޅުވިއެވެ.
ރައީސް ވިދާޅުވީ ނަސީމަކީ ފަތުރުވެރިކަމުގެ ދާއިރާގެ އިތުރުން، އެކިފަހަރު މަތިން ދިވެހި ދައުލަތަށާއި ދިވެހި ސަރުކާރަށް، 37 އަހަރަށްވުރެ ދިގު މުއްދަތަކަށް ޚިދުމަތް ކުރެއްވި ބޭފުޅެއް ކަމަށެވެ. އަދި މީހާރުވެސް ޚިދުމަތުގައި ހުންނެވި ބޭފުޅެއް ކަމަށް ވިދާޅުވިއެވެ. މިނިސްޓަރ އޮފް ފޮރިން އެފެއާޒްގެ މަގާމުގަޔާއި، ޚާރިޖީ ދާއިރާގެ ތަފާތު މަގާމުތަކުގައި ހުންނަވައިގެން ރާއްޖެއަށް ޚިދުމަތް ކޮށްދެއްވި ކަމަށް ރައީސް ވިދާޅުވިއެވެ. އެ ޚިދުމަތްތައް ގައުމީ ފެންވަރުގައި ފާހަގަ ކުރަންޖެހޭ ކަމަށް ވެސް ރައީސް ވިދާޅުވިއެވެ.
