މޯލްޑިވިއަން ޖެންޑަރ އީކުއަލިޓީ މޮޑެލްގެ ސެޓްފިކޭޝަން ދޭނެ އުޞޫލު އިއްޔެ ފާސް ކޮށްފިއެވެ.
މި އުސޫލު ފާސްކޮށްފައިވަނީ ޖެންޑަރ އިކުއަލިޓީ އެކްޝަން ޕްލޭން (ޖީ.އީ.އޭ.ޕީ) ތަންފީޒު ކުރުމަށްޓަކައި އެކުލަވާލާފައިވާ "ހައިލެވެލް ސްޓިއަރިންގ ކޮމިޓީ" އިން އިއްޔެ ބޭއްވި ފުރަތަމަ ބައްދަލުވުމުގައެވެ. ރައީސް އޮފީހުގައި އިއްޔެ ބޭއްވި ބައްދަލުވުމުގައި ކޮމިޓީގެ ރިޔާސަތު ބެލެހެއްޓެވީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހެވެ.
މި ބައްދަލުވުމުގައި ވަނީ މިއެކްޝަން ޕްލޭން ތަންފީޒުކުރުމަށް މިހާތަނަށް ކޮށްފައިވާ މަސައްކަތްތަކާ ގުޅޭ މަޢުލޫމާތު ހިއްސާ ކޮށްފައެވެ. މީގެ އިތުރުން ސްޓިއަރިންގ ކޮމިޓީގެ ހިންގާ ގަވާއިދު ފާސްކޮށް އަންނަ އަހަރުގެ ވާކްޕްލޭންގެ ޚުލާސާއާއި ގުޅޭގޮތުން މަޝްވަރާ ކުރައްވާފައިވެއެވެ.
މި އެކްޝަން ޕްލޭނަކީ ގައުމީ ޖެންޑަރ އީކުއަލިޓީ ސިޔާސަތު ތަންފީޒު ކުރުމަށްޓަކައި ތައްޔާރު ކޮށްފައިވާ ޕްލޭނެކެވެ. މި ޕްލޭން ތައްޔާރުކޮށްފައިވަނީ ޔޫއެންޑީޕީއާއި އޮސްޓްރޭލިއާ ސަރުކާރުގެ އެހީތެރިކަމާއެކުގައެވެ. މިއީ މިންތީގެ ހަމަހަމަ ކަމާއި، ހަމަހަމަ ފުރުސަތުތަކާއި އަދުލުވެރިކަން އެންމެނަށް ފޯރުކޮށްދީ ކަށަވަރުކޮށްދޭ މުޖުތަމައެއް ބިނާކުރުމަށް ތަސައްވަރުކޮށް، ފަސް ލަނޑުދަނޑިއެއް ހާސިލް ކުރުމަށް އެކުލަވާލެވިފައިވާ އެކްޝަން ޕްލޭނެކެވެ. މިއަހަރުގެ ފެބުރުވަރީމަހުގެ 22 ވަނަ ދުވަހު ބޭއްވި ވަޒީރުންގެ މަޖިލީހުގެ ޖަލްސާއިން ވަނީ ޖެންޑަރ އީކުއަލިޓީ އެކްޝަން ޕްލޭން ފާސްކޮށްދެއްވައިފައެވެ.
"ހައިލެވެލް ސްޓިއަރިންގް ކޮމިޓީ" ގައި ހިމެނިވަޑައިގަންނަވަނީ ރައީސުލްޖުމްހޫރިއްޔާގެ ނާއިބާއި، މިނިސްޓަރ އޮފް ފިނޭންސާއި، އެޓަރނީ ޖެނެރަލްއާއި، މިނިސްޓަރ އޮފް އެޑިއުކޭޝަނާއި، މިނިސްޓަރ އޮފް އިކޮނޮމިކް ޑިވެލޮޕްމަންޓާއި، މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްފަވަރމަންޓާއި، މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއާއި، މިނިސްޓަރ އޮފް ހެލްތެވެ. އޭގެ އިތުރުން ޖުޑީޝަލް ސަރވިސް ކޮމިޝަންގެ ރައީސާއި، ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގެ މުޤައްރިރާއި، ލޯކަލް ގަވަރމަންޓް އޮތޯރިޓީގެ ޗީފް އެގެޒެކެޓިވް އޮފިސަރާއި، މޯލްޑިވްސް ބިއުރޯ އޮފް ސްޓެޓިސްޓިކްސްގެ ޗީފް ސްޓެޓިސްޓީޝަން އެވެ.
