މާޗް މަހުގެ 20 ވަނަ ދުވަހުގެ ރޭ، ރައީސް އިބްރާހިމް މުހައްމަދު ސާލިހު ބޮޑުތަކުރުފާނު މަގުން ދަތުރު ކުރައްވަމުން ގެންދަނިކޮށް ބަޔަކު ރައީސްގެ މޮޓޯކޭޑަށް ހުރަސް އެޅި މައްސަލައިގައި އޭރު ރައީސްގެ ސަލާމަތީ ކަންކަމާ ގުޅޭ ސިފައިންގެ އިސްވެރިޔަކަށް ހުންނެވި އަބްދުﷲ އިބްރާހީމްގެ އެއްވެސް އިހްމާލެއް ފެންނަން ނެތް ކަމަށް އެމްއެންޑީއެފް އިން ބުނެފި އެވެ.
މިއަދު އެމްއެންޑީއެފް އިން ނެރުނު ބަޔާނެއްގައި ބުނީ ރައީސްގެ މޮޓޯކޭޑަށް ބަޔަކު ހުރަސްއެޅި މައްސަލައިގައި ކާނަލް އަބްދުالله އިބްރާހިމް މަގާމުގެ މަސްއޫލިއްޔަތާއި ޒިންމާތަކުން އެކަހެރި ކުރުމަކީ، ސިފައިންގެ ވަޒީފާއާ ބެހޭ ގަވާއިދުގެ ދަށުން، ސިފައިންގެ މުވައްޒަފުން ވަޒީފާއިން ސަސްޕެންޑް ކުރުމުގައި އަމަލުކުރާ މާއްދާގެ ދަށުން އެޅި ފިޔަވަޅެއް ގޮތުން ކުރި ކަމެއް ނޫންކަމަށެވެ. އެ މައްސަލަ އާއި ގުޅިގެން އަބްދުﷲ އިބްރާހީމް ސަސްޕެންޑް ކުރި ކަމަށް އެއްވެސް އިރަކު ބުނެފައި ނުވާނެ ކަމަށެވެ. އެހެންނަމަވެސް މައްސަލަ ބެލުމަށްޓަކައި ސިފައިންގޭގައި އަމަލުކުރަމުން އަންނަ ޕްރޮސީޖާތަކާއި އެއްގޮތަށް މަގާމުގެ މަސްއޫލިއްޔަތާއި ޒިންމާތަކުން އެކަހެރި ކުރެވުނު ކަމަށް ބުނެފައިވާނެ ކަމަށް ބަޔާނުގައިވެ އެވެ. އެފަދަ މައްސަލަތަކުގައި ކޮމާންޑަރުން އަދާކުރައްވާ ޒިންމާ އާއި މަސްއޫލިއްޔަތުތަކުން ވަގުތީ ގޮތުން އެކަހެރި ކުރަނީ އެފަދަ ކަންކަމުގެ އިންކުއަރީއަށް އެއްވެސް ފަރާތެއްގެ ނުފޫޒެއް ނެތި އިންސާފުވެރިކަމާއެކު ހިންގުމަށް ކަމަށްވެސް އެ ބަޔާނުގައި ބުންޏެވެ.
"އަދި މި މައްސަލަ ބެލިބެލުމުން ކޮމާންޑިން އޮފިސަރުގެ އެއްވެސް އިހުމާލެއް ފެންނަން ނެތް ކަމުގައި ދަންނަވަމެވެ," އެމްއެންޑީއެފްގެ ބަޔާނުގައިވެއެވެ.
ރައީސްގެ މޮޓޯކޭޑަށް، އިދިކޮޅު ކޯލިޝަނަށް ތާއީދުކުރާ ބަޔަކު ހުރަސްއެޅީ ބައިނަލްއަގުވާމީ އަންހެނުންގެ ދުވަހުގެ މުނާސަބަތުގައި އުމަރު ޒާހިރު އޮފީސް އިމާރާތުގައި ބޭއްވި ޖަލްސާ ޝަރަފުވެރިކޮށް ދެއްވުމަށްފަހު މާލެ ވަޑައިގެން ބޮޑުތަކުރުފާނު މަގުން ދަތުރު ކުރައްވަމުން ގެންދަނިކޮށެވެ. ރައީސްގެ މޮޓޯކޭޑަށް ބޮޑުތަކުރުފާނު މަގުން، ދެކުނުން އިރަށް ދުއްވާފައި ދެވޭ ގޮތް ނުވުމުން ރައީސްގެ ހަށިފާރަވެރިންގެ ގޮތުގައި ތިއްބެވި އެމްއެންޑީއެފްގެ ޕްރެޒިޑެންސަލް ގާޑްސްގެ ބޭފުޅުން ވަނީ ގާތްގަނޑަކަށް 15 މިނެޓް ފަހުން ރައީސްގެ މޮޓޯކޭޑު އަނބުރާ އައިކޮޅަށް ފޮނުވާލާފަ އެވެ.
އެމްއެންޑީއެފް އިން ވަނީ ރައީސް ސޯލިހު ދަތުރުކުރެއްވި މޮޓޯކޭޑަށް ބަޔަކު ހުރަސްއެޅުމާ ގުޅިގެން ހިނގައި ދިޔަ ކަންކަން ބެލުމަށް ހާއްސަ ކޮމެޓީއެއް އެކުލަވާފައެވެ. އަދި ޕްރެޒިޑެންސަލް ގާޑްސްގެ ކޮމާންޑިން އޮފިސަރުގެ މަގާމުގައި އޭރު ހުންނެވި ކާނަލް އަބްދުالله އިބްރާހިމް ވަނީ މަގާމުގެ މަސްއޫލިއްޔަތާއި ޒިންމާތަކުން އެކަހެރި ކޮށްފައެވެ.
އަދި އޭގެ ފަހުން ކާނަލްގެ ރޭންކުގައި ހުންނެވި އަބްދުﷲ އަށް ވަނީ ބްރިގޭޑިއާ ޖެނެރަލްކަން ދީފައެވެ.
