ބ. ދަރަވަންދޫއަށް، ހިލަވެލި ބަރުކޮށްގެން ދެ މީހުންނާއެކު ދަތުރުކުރި "ޖަމްބޯ" ނަމަކަށް ކިޔާ ދޯންޏެއް ގެއްލިގެން ހޯދުމުގެ މަސައްކަތް ފަށާފައިވާ ދޯނި އަދިވެސް ފެނިފައެއް ނުވެއެވެ.
އެމްއެންޑީއެފުން ބުނީ މާލެއިން ފުރައިގެން ކ.ގާފަރުގައި މަޑުކުރުމަށްފަހު، އިއްޔެ ހެނދުނު 10:40 ހާއިރު ދަރަވަންދޫއަށް ފުރި "ޖަންބޯ" ދޯނީގެ ހަބަރެއް އެންމެ ފަހުން ވެފައި ވަނީ އިއްޔެ 11:35 ހާއިރު ކަމަށެވެ.
ދޯނީގެ ހަބަރެއް ނުވެގެން އެމްއެންޑީއެފް ކޯސްޓްގާޑްގެ މެރިޓައިމް ރެސްކިއު ކޯޑިނޭޝަން ސެންޓަރަށް (އެމްއާރުސީސީ) ރިޕޯޓްކޮށްފައި ވަނީ އިއްޔެ ހަވީރު 18:03 ހާއިރު ކަމަށް އެމްއެންޑީއެފްއިން ބުންޏެވެ.
ކާށިދޫ ހުޅަނގު އުތުރުން ގާތްގަނޑަކަށް ހަ މޭލު ބޭރުން މި ދޯންޏާ ވައްތަރު އުޅަނދެއް އިއްޔެ 13:00 އާއި 13:30 ދެމެދުގެ ވަގުތެއްގައި ފެނުނު ކަމަށް އެ ސަރަހައްދުން ދަތުރުކުރި ދޯންޏަކުން މައުލޫމާތު ދީފައިވާ ކަމަށް ވެސް އެމްއެންޑީއެފުން ބުނެ އެވެ. ދޯނީގެ ދިގުމިނަކީ 65 ފޫޓެވެ.
ރިޕޯޓް ލިބުނު ފަހުން، ދޯނި ހޯދުމުގެ މަސައްކަތް އެމްއެންޑީއެފް މާލެ އޭރިއާ ކޯސްޓްގާޑް ސެކަންޑް ސްކޮޑްރަންއިން ދަނީ ކުރަމުންނެވެ.
މޯލްޑިވްސް މީޓިއޮރޮޖިކަލް ސާވިސް އިން ވަނީ މި ދުވަސްވަރަކީ މޫސުން ގޯސް ދުވަސްވަރަކަށް ވުމާއެކު ކަނޑުދަތުރުފަތުރު ކުރުމުގައި ސަމާލުކަން ދިނުމަށް އިލްތިމާސްކޮށްފަ އެވެ.
