ޖަރުމަނުގެ ހުނަރުވެރި މިޑްފީލްޑަރު ޓޯނީ ކްރޫސް ފުޓުބޯޅައިން ރިޓައާވުމަށް ނިންމައިފިއެވެ.
2014 ގައި ރެއާލް މެޑްރިޑަށް ސޮއިކުރި ތަޖުރިބާކާރު ކްރޫސް ވަނީ އިންސްޓަގްރާމްގައި އޭނާ ރިޓައާވުމަށް ނިންމިކަން ހާމަކޮށްފައެވެ. އެ ޕޯސްޓުގައި ކްރޫސް ހާމަކުރި ގޮތުގައި އޭނާގެ އެންމެ ފަހު މުބާރާތަކަށް ވެގެންދާނީ މި އަހަރު އޮންނަ ޔޫރޯއެވެ.
"2014 ވަނަ އަހަރު އަހަރެން މި ކްލަބާ ގުޅުނު ފަހުން އަހަރެންގެ ހަޔާތް އެއްކޮށް ބަދަލުވެއްޖެ. އެކަމަކު ދިހަ އަހަރަށްފަހު އަހަރެންގެ ހަޔާތުގެ މި އުފާވެރި މަރުހަލާ ނިމުމަކަށް އައިސްފި. އަހަރެންގެ އެންމެ ފަހު މުބާރާތަކީ ކުރިއަށް އޮތް ޔޫރޯ. އަހަރެން އަބަދު ވެސް ބޭނުންވި އެންމެ މަތީ ފެންވަރުގަ ކެރިއަރު ނިންމާލަން. އުފާކުރަން އެގޮތަށް ކަންކަން ދިޔައީމަ" ރިޓައާވުމަށް ނިންމި ނިންމުން އާއްމު ކުރަމުން ކްރޫސް ބުންޏެވެ.
ބަޔާން މިއުނިކުން 2014 ވަނަ އަހަރު ރެއާލަ މެޑްރިޑަށް ސޮއި ކުރި ކްރޫސް ވަނީ އެ ކްލަބަށް 305 މެޗު ކުޅެދީ 22 ލަނޑު ކާމިޔާބު ކޮށްދީފައެވެ. "ޖާމަން ސްނައިޕަރު" ގެ ނަމުން މަޝްހޫރު ޓޯނީ ކްރޫސް ވަނީ ރެއާލާއެކު ހޭދަ ކުރި 10 އަހަރުގައި 22 ތަށި ކާމިޔާބު ކޮށްފައެވެ. ކްރޫސްގެ ކެރިއަރުގައި އެންމެ ފާހަގަ ކޮށްލެވޭ ކާމިޔާބީއަކީ 2014 ވަނަ އަހަރު ޖަރުމަނުގެ ގައުމީ ޓީމާއެކު އޭނާ ވޯލްޑް ކަޕު ކާމިޔާބު ކޮށްފައިވާ ކަމެވެ.
