އެމެރިކާގެ ސްޓޭޓް ސެކްރެޓަރީ އެންޓޯނީ ބްލިންކަން، ޣައްޒާގެ ހަނގުރާމަ ހުއްޓުވުމަށް ކުރި މެދުއިރުމަތީގެ ދަތުރު ނިންމާލައިފިއެވެ.
ނަމަވެސް، ބްލިންކަންއަށް މިދަތުރުފުޅުގައި އިސްރާއީލް، ހަމާސް، މިސުރު އަދި ޤަތަރާއެކު ކުރެވުނު މަޝްވަރާތަކަށްފަހުވެސް ހަނގުރާމަ ހުއްޓުވުމަށް އެއްވެސް އެއްބަސްވުމަކާ ހަމައަށް ނާދެވުނެވެ.
ބްލިންކަން، މިސުރާއި ޤަތަރުގެ މެދުވެރިންނާއެކު، އިސްރާއީލާއި ހަމާސްގެ ދެމެދުގައި އޮތް ފަރަގު ކުޑަކުރުމަށް އެމެރިކާއިން ހުށަހެޅި "ބްރިޖިންގ ޕްރޮޕޯސަލް" އަކަށް އިސްކަންދިނެވެ. މިއީ 10 މަސްދުވަހުގެ ހަނގުރާމައަށްފަހު ހުށަހެޅުނު ހުށަހެޅުމެކެވެ.
ބްލިންކަން އަވަހަށް ޙައްލެއް ހޯދަން ޖެހޭކަން ފާހަގަކޮށް، "އެއްބަސްވުމަކާ ހަމައަށް ކުރިއަށް އޮތް ދުވަސްތަކުގެ ތެރޭގައި އާދެވެން ޖެހޭނެ" ކަމަށް ވިދާޅުވެފައިވެއެވެ،
ބްލިންކެންގެ ދަތުރުފުޅުގައި، އޭނާ އިސްރާއީލުގެ ބޮޑުވަޒީރު ބެންޖަމިން ނެތަންޔާހޫއާ ބައްދަލުކުރެއްވިއެވެ. ނެތަންޔާހޫ މި ހުށަހެޅުމަށް އެއްބަސްވިއެވެ. އަދި ހަމާސްއިން މި ހުށަހެޅުން ސީދާ ދެކޮޅު ހަދާފައި ނުވިނަމަވެސް، ބަދަލުކުރެވިފައިވާ ޝަރުތުތަކާމެދު ކަންބޮޑުވުން ފާޅުކޮށްފައިވެއެވެ.
މީގެ އިތުރުން، ހަމާސްއިން ވަނީ އިސްރާއީލުން ކުރިން އެއްބަސްވެފައިވާ ޝަރުތުތައް ބަދަލުކޮށް، އައު ޝަރުތުތަކެއް ތަޢާރަފުކޮށްގެން އެއްބަސްވުމަށް ހުރަސްއަޅަމުންދާ ކަމަށް ތުހުމަތުކޮށްފައެވެ. ހަމާސްއިން ބުނާ ގޮތުގައި، އެމީހުން ވަނީ ޖުލައި މަހު މެދުވެރިންނާއެކު އެއްބަސްވި ޝަރުތުތަކަށް ތަބާވުމަށް އެއްބަސްވެފައެވެ. މި ޝަރުތުތަކަކީ މެއި މަހު އެމެރިކާއިން ހުށަހެޅި ހުށަހެޅުމެއްގެ މައްޗަށް ބިނާކޮށް އެއްބަސްވެފައިވާ ޝަރުތުތަކެކެވެ. މި ބަދަލުތަކުގެ ސަބަބުން މަޝްވަރާތައް އިތުރަށް އުނދަގޫވެ، ފަހުގެ އެއްބަސްވުމަކަށް ވާސިލުވުމަށް ހުރަސްއަޅާފައިވެއެވެ.
ވަރަށް ބޮޑު ޚިލާފެއް އުފެދިފައިވާ އަނެއް މައްސަލައަކީ ފިލަޑެލްފިއާ ކޮރިޑޯގައި ޒަޔަނިސްޓް ސިފައިން ތިބުމެވެ. މިއީ ޣައްޒާއާއި މިސްރުއާ ދެމެދުގައިވާ ހަނި ބިމުގެ ބައެކެވެ. އިސްރާއީލުގެ ބޮޑުވަޒީރު ނެތަންޔާހޫގެ ވެރިކަމުގެ ދަށުން، އިސްރާއީލުން ބުނަނީ ޣައްޒާއަށް ހަތިޔާރު އެތެރެކުރުން ހުއްޓުވުމަށްޓަކައި އެތަނުގައި ސިފައިން ބޭތިއްބުމަކީ ކޮންމެހެން ބޭނުންތެރި ކަމެއް ކަމަށެވެ.
އެހެންނަމަވެސް، ހަމާސްއާއި މިސްރުން އެ ސަރަޙައްދުގައި އިސްރާއީލުގެ ސިފައިން ދިގު މުއްދަތަކަށް ތިބުމާ ދެކޮޅެވެ. އެމެރިކާއިން ހުށަހަޅާފައިވަނީ މި ކޮރިޑޯގައި ބައިނަލްއަޤްވާމީ ބައެއް ބޭތިއްބުމަށެވެ. މިއީ އެއްބަސްވުމަކަށް އާދެވިދާނެ ކަމެއްގެ ގޮތުގައެވެ. ނަމަވެސް މި ޚިޔާލާ މެދު އަދިވެސް ވާހަކަދެކެވެމުންދެއެވެ.
ބްލިންކެން އަލުން ތަކުރާރުކޮށް ވިދާޅުވީ ޣައްޒާގައި އިސްރާއީލުން ދިގު މުއްދަތަކަށް އޮކިއުޕައިކުރުމާ އެމެރިކާއިން ދެކޮޅު ކަމަށާއި، އިސްރާއީލުގެ ސިފައިން އަނބުރާ ނުކުތުމަށް ސާފު ތާވަލެއް އޮތުމުގެ މުހިންމުކަން ފާހަގަކުރެއްވިއެވެ.
މިސުރުގެ ރައީސް އަބްދުލް ފައްތާޙް އަލް ސީސީ މި ހުށަހެޅުމަށް ތާއީދުކުރެއްވި ނަމަވެސް، ފުޅާ ސުލްހައިގެ މަސައްކަތުގެ ތެރެއިން ފަލަސްތީނު ދައުލަތެއް ބައިނަލްއަޤްވާމީ ގޮތުން ބަލައިގަތުމުގެ މުހިންމުކަން ފާހަގަކުރެއްވިއެވެ.
މި މަޝްވަރާތަކު ތެރޭގައިވެސް ޔަހޫދީ ލަޝްކަރު ޣައްޒާގައި ކުރިއަށް ގެންދާ އޮޕަރޭޝަންތަކަށް ހުއްޓުމެއްނާދެއެވެ. އޮކްޓޯބަރުގައި މި ހަނގުރާމަ ފެށުނީއްސުރެ 40،000 އަށްވުރެ ގިނަ މީހުން ޝަހީދުވެއްޖެއެވެ. ދެމެހެއްޓެނިވި މަސައްކަތްތަކެއް ކުރެވެމުންދާއިރުވެސް، ހަނގުރާމަ މުޅިން ހުއްޓާލުމުގެ އެއްބަސްވުމަކާ ހަމައަށް ވާސިލުވެވޭނެކަން އަދިވެސް ޔަޤީނެއް ނޫނެވެ.
