ޣައްޒާގައި ހިނގަމުންދާ ހަނގުރާމައިގެ ސަބަބުން އެ ސަރަހައްދުގެ ފެނުގެ ހާލަތު އިތުރަށް ގޯސްވެ، އާންމު ރައްޔިތުންނަށް ނުހަނު ބޮޑެތި ގެއްލުންތަކެއް ވަނީ ލިބިފައެވެ.
އެންމެ ފަހުގެ ރިޕޯޓުތަކުން ދައްކާގޮތުގައި އިސްރާއީލުން ވަނީ ޣައްޒާގެ މުހިންމު ފެނުގެ ވަސީލަތްތަކަށް ހަމަލާދީފައެވެ. މީގެ ތެރޭގައި ރަފަޙްގައި ހުރި ކެނެޑާ ވޯޓަރ ރެޒަވޯ ހިމެނެއެވެ. މިއީ 150،000 މީހުންނަށް ފެން ފޯރުކޮށްދެމުން ދިޔަ މުހިންމު ތަނެކެވެ.
ޒަޔަނިސްޓު ސިފައިންގެ މީހަކު ޝެއަރކޮށްފައިވާ، އަދި މިހާރު ޑިލީޓްކޮށްފައިވާ ވީޑިއޯއަކުން މި ހަމަލާދޭ މަންޒަރު ފެނެއެވެ. ބައިނަލްއަޤްވާމީ މިޖްތަމައުއާ އެކިއެކި ޖަމިއްޔާތަކުން ވަނީ މި ހަމަލާ ކުއްވެރިކޮށް، ބައިނަލްއަޤްވާމީ އިންސާނިއްޔަތުކަމުގެ ޤާނޫނުތަކާ ޚިލާފުވެފައިވާކަމުގެ ކަންބޮޑުވުންތައް ފާޅުކުކޮށްފައެވެ.
3 މިލިއަން ލީޓަރުގެ ފެން ރައްކާކުރެވޭ މި ރެޒަވޯއަކީ ރަފަޙް ގަވަރނޭޓްގައި ފެން ސާފުކޮށް ބެހުމަށް ނުހަނު މުހިންމު ތަނެކެވެ. މި ތަން ހަލާކުކޮށްލުމުގެ ސަބަބުން ޣައްޒާގެ މިހާރުގެ ނާޒުކު ހާލަތު އިތުރަށް ގޯސްވެފައިވެއެވެ. މިހާރު ޣައްޒާގައި ކޮންމެ މީހަކަށް ދުވާލަކަށް ލިބެނީ އެންމެ 4.74 ލީޓަރު ސާފު ފެނެވެ. މިއީ ކުއްލި ހާލަތުގައި ބޭނުންވާ އެންމެ މަދު މިންވަރަށްވުރެވެސް މާ ދަށް އަދަދެކެވެ.
ފެނުގެ ވަސީލަތްތައް ހަލާކުކޮށްލުމުގެ ސަބަބުން ފަލަސްޠީނުގެ ރައްޔިތުން ނުރައްކާތެރި ޙާލަތްތަކުގައި ފެން ހޯދަން މަޖުބޫރުވެފައިވެއެވެ. މިކަމުގެ ސަބަބުން ބަލިމަޑުކަން ފެތުރުމުގެ ނުރައްކާ އިތުރުވެފައިވެއެވެ. އަދި ނަޖިސްވެފައިވާ ފެނުގެ ސަބަބުން ޕޯލިއޯ ފަދަ ފެނުން ފެތުރޭ ބަލިތައް އިތުރުވެފައިވާކަމަށް ދުނިޔޭގެ ސިއްޙީ ޖަމްޢިއްޔާއިން ރިޕޯޓުކޮށްފައިވެއެވެ.
ހޫނު މޫސުމުގެ ސަބަބުން މި އިންސާނީ ކާރިސާ އިތުރަށް ގޯސްވެ، ޣައްޒާގެ އާބާދީއަށް ލިބެންހުރި މަދު ވަސީލަތްތަކަށް ވަނީ އިތުރަށް ބުރަވެފައެވެ،
ހަނގުރާމަ ދެމިގެންދާއިރު، ބައިނަލްއަޤްވާމީ މުޖުތަމަޢުގެ ކަންބޮޑުވުން އިތުރުވަމުންދަނީ އިސްރާއީލުން ފެން، ހަނގުރާމައިގެ ހަތިޔާރެއްގެ ގޮތުގައި ބޭނުންކުރަމުންދާތީއާއި، މިކަމުގެ ސަބަބުން ޣައްޒާގެ އާންމު ރައްޔިތުންނަށް ދިގު މުއްދަތަކަށް ކުރާނެ އަސަރުގެ ސަބުބުންނެވެ.
