ލިޔުނީ: ޙަސަން ޝާކިރު މުޙައްމަދު
އަހަރެންގެ ފިރިމީހާއަކީ، ދަމާކަނޑައިގެން ލާރިފޮތި ހޯދާ މީހެކެވެ. ފަޅުއޮޑިފަހަރުން އެތިކޮޅު ގަނެލައިގެން މާރުކޭޓަށް ނުވަތަ އެއްގަމު ފިހާރަތަކަށް ވިއްކައިލައިގެންނެވެ. އަހަރެމެން ދެމަފިރިންގެ ތިބި ހައެއްކަ ކުދިންނަށް ރަނގަޅު ތައުލީމެއް ދެވޭނޭ ގޮތެއް ނެތެވެ.
ކައިރީގައި ހުންނަ ދެ އެދުރުގެއަކަށް ކުދިން ފޮނުވި ނަމަވެސް މަހުން މަހަށް ކުއްޖަކަށް ދައްކަން ޖެހޭ 10ރުފިޔާ ވެސް އޮންނަނީ ނުދެއްކިފައެވެ. އެދުރުބޭމެންގެ ހެޔޮކަމުން އެކަން މާ ބޮޑުކަމަކަށް ނުހަދައެވެ. ދެވުނު ފަހަރަކު ދިނުމަށާއި ނުދެވުނު ފަހަރަކު އަޅައިނުލުމަށް އޮންނަނީ ބުނެފައެވެ. ފިރިމީހާއަށް ބައެއް ފަހަރަށް ލިބޭ، ކުޑަކޮށް ފީވެފައި ހުންނަ ދޮންކެޔޮ ދޮންއަނބު ފަދަ ތަކެތިން، އެކަމުގެ ހެވަތެއްގެ ގޮތުން ، އެދުރުބޭމެންނަށް އެތިކޮޅު ފޯރުވައިދީ ހަދަމެވެ. އަދި އެގޭގޭގެ ބައެއް މަސައްކަތް ކުދިންލައްވައި ކޮށްދީ ވެސް ހަދަމެވެ. އެ ވަރުން އެ މީހުން ތިބެނީ ހިތްހަމަޖައްސައި ރުހިގެންނެވެ.
މި ނިކަމެތި ދިރިއުޅުމާއެކު ވެސް، ފިރިމީހާއާއި ކުދިންނަށް މާތް ﷲގެ ހެޔޮ ރަހުމަތްފުޅުން މާބޮޑު ބަލިމަޑުކަމެއް ކުރިމައްޗެއް ނުވެއެވެ. ނަމަވެސް އެ ދުވަސްވަރެއްގައި ރާއްޖެއަށް އަންނަ ކޮންމެ ބަލިމަޑުކަމެއް އަހަންނަށް އޮންނަނީ ލައިގެންފައެވެ. ބޭރަށް ހިންގުމާއި ހުންއައުމާއި މިހެން ގޮސް ތަފާތު ބަލިތަކަށް އަހަރެންގެ ހަށިގަނޑު ވަރަށް ދޯޅެވެ. ކޮލެރާ ޖެހުނެވެ. ޝިގެއްލާ ޖެހުނެވެ. މި ނޫން ވެސް އެތައް ބައްޔެކެވެ.އާންމުކޮށް އަހަރެން ޑަކުތަރަށް ދަނީ ވެސް އެކަންޏެވެ. ހަސްފަތާލާ ގެއާ މާކަ ދުރެއް ވެސް ނޫނެވެ. ފަސްވަރަކަށް މިނެޓުން ހިނގައިލާފައި ދެވެއެވެ. ހާލު ދެރަވި ބައެއް ފަހަރުތަކުގައި އެމްބިލޭންސްގައި ވެސް ގެންދިޔައެވެ.މިއަދަކީ، އަނެއްކާ ވެސް ތަފާތު ބޮލުގައި ރިހުމަކާއެކު ހުންވައްތަރެއް ވެސް ވެފައި ހުރި ދުވަހެކެވެ. ފިރިމީހާ ހެނދުނު ބާޒާރަށް ދާ ގޮތަށް، މަދު ދުވަހަކު ނޫނީ، އެނބުރި އަންނާނީ އިރުއޮއްސޭ ފަހުންނެވެ. ގެއިން ބައްޔެއް މަރެއް ކަމެއް ދިމާވިޔަސް އެންގޭނެ މާގިނަ ގޮތްތަކެއް ނުހުރެއެވެ. ކޮންމެވެސް މީހަކަށް ސަލާން ޖަހައިގެން ބާޒާރަށް ފޮނުވައިގެން މުޅި ބާޒާރު ކޮޅައިގެން ނޫނިއްޔާ އޭނާއަށް ޚަބަރެއް ކުރެވޭނެ ގޮތެއް ނޯވެއެވެ.
އާއިލާގެ މީހަކު ނިޔާވި ފަހަރަކާއި ކުއްޖެއްގެ ބޯފަޅައިގެން ދިޔަ ފަހަރަކު ވެސް އޭނާ އަތު ޖެހުނީ އެތައް އިރެއް ފަހުންނެވެ.ހެނދުނު ކުޑަކޮށް ހުރި ބޮލުގައި ރިހުން ގަދަވާން ފަށައިފިއެވެ. ހުން ވެސް ގަދަވާހެން ހީވެއެވެ. ކިޔަވަން އެދުރުގެއަށް ދިޔަ ދެ ބެއިން ފިޔަވައި އަނެއް 3 ބެއިން ވީ ހިސާބެއް ދެނެވޮޑިގެންވާނީ މާތް ރަސްކަލާނގެއެވެ. އަންހެން މަންޖެ ގޭތެރޭގައި އެބަ އުޅެއެވެ. އެހެން ނޫނަސް އެންމެ ދޮށްޓަށް ހުރި ސޮރުގެ އުމުރަކީ ވެސް އަދި އެންމެ 12އަހަރުކަމުން އެ ސޮރު ގޮވައިގެން ވެސް ހަސްފަތާލަށް ދެވޭ ވަރެއް ނޫނެވެ. އެކަނި ހަސްފަތާލަށް ދިއުމަކީ، އަހަންނަށް އާކަމެއް ވެސް ނޫނެވެ.މި ކަހަލަ ހާލެއް ޖެހޭއިރު ވެސް ފިރިމީހާ ގާތުގައި ނުހުންނާތީ، ނޫނީ އަންގައިލެވޭނޭ ގޮތެއް ވެސް ނޯންނާތީ، ހިތްހަމަ ނުޖެހި ހިތާހިތުން ކުދި ކިޔައިލެވުނު ނަމަވެސް ކުރެވޭނެ އެހެންކަމެއް ނެތެވެ. ހަތް އަހަރުގެ މަންޖެ ގާތުގައި ބޭބެމެން ކޮއްކޮމެން އަތުވެއްޖެއްޔާ މަންމަ ދިޔައީ ހަސްފަތާލަށޭ ބުނާށޭ ކިޔައިފައި މަޑުމަޑުން ހިނގައިގެންފީމެވެ.
ހަސްފަތާލު އޮތީ އަހަންނަށް ޓަކައި ހުސްކޮށްފައޭ ވެސް ހިތަށް އެރިއެވެ. ފައިގައި ބޭސްއަޅަން ގޮސް އިން އަންހެނަކާއި އަތުގައި ބޭސް އަޅަން ގޮސް އިން ޒުވާން ސޮރަކު ފިޔަވައި އެހެން ބަލިމީހަކު ނެތެވެ. ޑަކުތަރު ވެސް ފޫހިވެލައްވައިގެން ކަންނޭނގެއެވެ. ނަންބަރު ދޫކުރާ ކޮށިގަނޑުކައިރީ ތިބި ދެ ކުދިންނާ މައްލަވަކޮށްލައްވަން އެ ތާނ ހުންނެވިއެވެ. އެއީ މީގެ ކުރިން ވެސް ދެތިން ފަހަރަކު ދެއްކިފައިވާ ޑަކުތަރަކަށް ވާތީ ވެސް ތޯއްޗެކެވެ. އަހަރެން ފެނުމުން ނުގޮތަކަށް ހިނިތުން ވެސް ވެލައްވައިފިއެވެ.
"ފަޚުރިއްޔާ ޢަލީ، ޖަންބުޖަނބުރޯލުގެ، 45 އަހަރު، ހުން އައިސް ބޮލުގައި ރިއްސާތީ” ކޮށިގަނޑުގައި ތިބޭ ކުދިން ކުރާނެ ސުވާލުތައް ހިތުދަސްވެފައިވާތީ، ފައްޗަކަށް އަމުނައިލައިފީމެވެ. އަދި ޖީބުން ބޮނޑިވެފައި އޮތް ފަސް ރުފިޔާ ނަގައި ދީފީމެވެ. އަހަރެން ދެން ދާނީ، ޑަކުތަރު ކޮޓަރިއަށް ކަން އެނގިލައްވާތީ ޑަކުތަރު ވެސް ދުރުވެ، ކޮޓަރިއަށް ވަންނަވައިފިއެވެ.
ޑަކުތަރުގެ ފަހަތުން ކަހަލަ ގޮތަކަށް އަހަރެން ވެސް ގޮސް ކޮޓަރިއަށް ވަދެއްޖައީމެވެ. ޑަކުތަރުގެ ކަނާތް ފަރާތުގައި ހުރި، ކޮޅުފިލާ ގޮނޑީގައި ފޫކޮޅު ޖެހުމާއެކު، "ފަޚުރިއްޔާ ޢަލީ، ޖަންބުޖަނބުރޯލުގެ، 45 އަހަރު، ހުން އައިސް ބޮލުގައި ރިއްސާތީ" އޭ އަހަރެން ބުނެފީމެވެ. ޕުރެސަރު ބަލައިލާ ކަށިގަނޑު އަޅައިލުމަށް ފަހު، "ހުން އަންނަތާ ކިހައި ދުވަހެއް" ޑަކުތަރު އައްސަވައިފިއެވެ. "މިއަދު ބޮޑަށް ހުން ގަދަހެން ހީވީ، އިއްޔެ ވެސް ހުރީ ހުންވައްތަރު ވެފައި، މިހާރު ވަރަށް ގަދައަށް ބޮލުގައި ވެސް އެބަ ރިއްސާ" އަހަރެން ނަންގަނެފީމެވެ.
ކުޑަކޮށް ވިސްނަވައިލެއްވުމަށް ފަހު ޑަކުތަރު ބޭސްސިޓީ ލިޔުއްވަން ފައްޓަވައިފިއެވެ. މަތީގައި ކޮންމެވެސް އެއްޗެހިތަކެއް ލިޔުއްވުމަށް ފަހު، ލަންބަރު އެކެއް ޖައްސަވައި ބޮޅެއް އަޅުއްވާފައި އެއްޗެއް ލިޔުއްވައިފިއެވެ. އެ ގޮތަށް ލަންބަރު ޖައްސަވަމުން ގޮސް ފަސް ލަންބަރު ޖެއްސެވުމުން ކެތް ނުވެގެން އަހަރެން ނަންގަނެފީމެވެ. "ބައްލަވާ! ހާދަ ގިނަ ބޭހެއް ތި ދެއްވަނީ!" ، "އާނ! މިފަހަރު ވިޓަމިނަކާ އެއްޗެހި ވެސް އެބަ ދޭން ޖެހޭ އެހެންވެ ތަންކޮޅެއް ބޭސް ގިނަވީ" ޑަކުތަރު ބުނުއްވައިފިއެވެ. "ބައްލަވާ! ވަރަށް އަގު ބޮޑުވާނެ ތޯ؟" އަހަރެން އަހައިލައިފީމެވެ. "އާނ! މި ފަހަރު ތަންކޮޅެއް އަގު ބޮޑުވެދާނެ…!" ޑަކުތަރު ބުނުއްވިއެވެ. "ބައެއް ބޭސް މަދުކޮށެއް ނުލެއްވޭނެ ތޯ؟" އަހަރެން ނަންގަތީމެވެ. "ކިހިނެއްވީ؟ މިއީ ހަމަ މުހިންމު ބޭސްތަކެއް…! ޑަކުތަރު މި ހެން ބުނުއްވުމުން އަހަރެންނަށް އިސްޖަހައިލެވުނެވެ. އެ ވަގުތު ހިތުގެ އިސްކިރީނުގައި ލިޔެވެމުން ދިޔައެވެ. "އަހަންނަކީ، ނިކަމެތި އާއިލާއެއްގެ ނިކަމެތި އަންހެނަކީމެވެ. ގޭގައި ކަރަންޓެއް ނުހުރެއެވެ. ފާޚާނާއެއް ނުހުރެއެވެ. ރޭޑިއޯއެއް ޓީވީއެއް ހުވަފެނުން ވެސް ނުދެކެމެވެ. ގޭގައި މާ ގިނަ ފަރުނީޗަރެއް ނުހުރެއެވެ. ގެވެހި ކަންވާރެއް ވެސް މާގިނައެއް ނޫނެވެ. ފެންބޮއި، ސައިބޮއި ހަދަން ހުންނަނީ، ކަޓޫރާ ދަޅެވެ. ނިދަން ހުންނަނީ، ރޯނު ފުރި ދެތިން އެނދެވެ. އެނދުގައި އޮންނަ ކުނާގަނޑު އޮންނަނީ ވީދި ހަސް ނެތިފައެވެ. އަންނައުނާއި ދިރިއުޅުމުގެ އެހެން ކަންކަން ވެސް ހުރީ އެހައިދަށް ހާލަތެއްގައެވެ. ކުއްޖަކަށް ރަނގަޅު ކާއެއްޗެއް ވެސް ދެވެނީއެއް ނޫނެވެ. އިރުއިރުކޮޅާ އަހަރެންނަށް އަގުބޮޑު ބޭސްތައް ގަންނާނީ ކިހިނެއް ހެއްޔެވެ؟ މިހާރުގޭގައި އޮންނާނީ ތިރީހަކަށް ރުފިޔާއެވެ. އެއަށް ބޭސް ގަނެފިއްޔާ ދެން އެހެން ކަންތައްތައް ކުރާނީ ކިހިނެއް ހެއްޔެވެ. އިއްޔެ ކުދިން ލޮލީ ބޯ ހިތުން އުޅުނެވެ. ދޮޅު ރުފިޔާ ދީފައި ހަ ކުދިންނަށް ލޮލީ ގަނެދޭނީ ކިހިނެއް ހެއްޔެވެ؟ މި މަހު އަދި ނެސްޕިރޯ ދަޅެއް ވެސް ނުހޯދެއެވެ. މޫނުގައި ޖަހާ ގަނޑުފުށްދަޅު ހުސްވީތާ ވެސް މިހާރު ދެ ހަފުތާ ވަނީއެވެ.……."އިސްޖަހައިލައިގެން ހަމަހިމޭން ވަގުތުކޮޅަކު އިނުމަށް ފަހު އިސް އުފުލާލައި ޑަކުތަރާ ދިމާއަށް ބަލައިލިއިރު ޑަކުތަރު އިންނެވީ އަހަންނާ ދިމާއަށް ސީދާ ނަޒަރަކުން ބައްލަވާށެވެ. އެ ވަގުތު ޑަކުތަރު ބުނުއްވިއެވެ. "ބޭސް ފިހާރައަށް ގޮސް އަގު ޖަހައިލައިގެން އާދޭ….. ކޮންމެވެސް ގޮތެއް ހަދާނީ" އަހަރެން ފެންކަޅިވިއެވެ. އަދި މަޑުމަޑުން ބޭސް ސިޓީ ހިފައިގެން ނުކުމެއްޖައީމެވެ.
މަޑު ހިނގުމެއްގައި ގޮސް ހަސްފަތާލުގެ ބޭރު ދޮރުކައިރީ ހުރި ބޭސް ފިހާރައަކުން ބޭސްސިޓީގައި އަގު ޖައްސައިފީމެވެ. އަގު ޖަހައިފައި ބޭސްސިޓީ ދިނުމުން އަހަރެން އަހައިފީމެވެ. "މުޅިއެކު ކިހައިވަރެއް؟" ، "ހަތްދިހަ ހަތަރު ރުފިޔާ ބައި" ޑިސްޕެންސަރު ބުނެލިއެވެ. ބޭސްސިޓީ ހިފައިގެން އަހަރެން އެނބުރި ހަސްފަތާލަށް ވަދެގެން ދާތަން ފެނުމުން ކޮށިގަނޑުގައި އިން ކުއްޖަކު އަހައިލައިފިއެވެ. "ބޭސް ނުލިބުނީތަ؟" ، "ނޫން. ޑަކުތަރު ބުނުއްވައިގެން…!"
ޑަކުތަރު ކޮޓަރީގައި ޓަކި ޖަހައިލުމުން އެތެރެއިން ހުޅުވައިލައިފިއެވެ. އަހަރެން ބޭސްސިޓީ ދިއްކޮށް ލުމުން "ކިހައިވަރެކޯ" ޑަކުތަރު އައްސަވައިލެއްވިއެވެ. "ހަތްދިހަ ހަތަރެއް ބަޔޯ! ވަރަށް އަގު ބޮޑު!" އަހަރެން ނަންގަތީމެވެ. ޑަކުތަރުގެ ފަޓުލޫނުގެ ފައިކޭޓުން ނަންގަވާފައި ސަތޭކަ ރުފިޔާ ދެއްވާފައި "ބޭސް ނަގާ! ބާކީ ގެންނާނެކަމެއް ނެތް" އަހަރެންނަށް ހަމަ ރަނގަޅަށް ރޮވިއްޖެއެވެ. ވާތުގެ ނުފުށުން ދެލޯ ފުހެލެވިއްޖެއެވެ. "އަނހަ! ދެރަ ނުވޭ މީ ހަމަ ހަދިޔާއެއް! އަވަހަށް ބޭސް ނަގައިގެންދޭ!" ޑަކުތަރު ބުނުއްވައިފިއެވެ. އަހަރެން މަޑުމަޑުން ކޮޓަރިން ނުކުމެއްޖައީމެވެ. ޝުކުރިއްޔާއޭ ވެސް ބުނެއެއް ނުލެވުނެވެ. އަހަރެން ހުރީ އެއަށްވުރެ ބޮޑަށް ދެރަވެ އަސަރުކޮށްފައެވެ. އަދި އެ ހެޔޮކަމަށް ޓަކައި އުފަލުން ފުރިފައެވެ. ހިތާހިތުން ޑަކުތަރަށް ހެޔޮ ދުއާ ކުރަމުން ގެއަށް ދާން ހިނގައިގެންފީމެވެ.
