ތަރުޖަމާ: ޢަބްދުﷲ ނަޢީމު އިބްރާހީމް
އެ ދެ ކުދިންގެ މެދުގައި އޮންނަނީ ވަރަށް ގާތް ރަޙްމަތްތެރިކަމެކެވެ.
ދެ ކުދިންވެސް ޒުވާނެވެ. ހަށިގަނޑު ރަނގަޅެވެ. ވިސްނުން ތޫނެވެ. ދެ ކުދިންގެ ވިސްނުން ހުންނަނީ ދާދި އެއްކަހަލަ ގޮތަކަށެވެ. ދެ ކުދިން ވާހަކަ ދައްކަން އެކީގައި އެތައް ވަގުތެއް ހޭދަ ކުރެ އެވެ. ބަހުސު ކުރެއެވެ. ފަލްސަފާ ގެ ވާހަކަ ދައްކައެވެ. އެކަކު އަނެކަކާ ދިމާ އަށް ކަލޭ މިހާރު ތިޔައީ ފަލްސަފާވެރިއެކޭ ވެސް ބުނެއެވެ. އެކަކު އަނެކެއްގެ ގައިގައި ޖަހަން ގޮށްމުށް ކަވައިގެން ފަހަތުން ދުވެ ހަދައެވެ.
އެންމެ ރަނގަޅު ކަމަކީ އެކަކު އަނެކެއްގެ ފަރާތުން ނުރައްކާތެރި ކަމެއް މެދުވެރި ވެދާނޭ ކަމަށް ދެ މީހުން ކުރެ މީހަކު ބިރެއް ނުގަނެއެވެ. އެކަކު އަނެކަކަށް ޖާގަ ދެއެވެ. އެކަކުގެ އިޙްސާސްތަކަށް އަނެކަކު އިޙްތިރާމް ކުރެއެވެ. ނޭވާ ލިޔަ ދެއެވެ. އެކަކު އަނެކެއްގެ ކައިރީގައި ހުންނަ އިރު އުފާ ވެއެވެ. އެ ދެ ކުދިންނަކީ މި ޒަމާނުގެ ޒުވާން ނަސްލުގެ ދެ މަންދޫބުންނެވެ.
ދެ ކުދިން ތިބީ ޗައިނީޒް ރެސްޓޯރަންޓެއްގައެވެ. ކުރިމަތީގައި ޗިކަން ކޯރން ސުޕް ދެ ތަށި ހުއްޓެވެ. އަންހެން ކުއްޖާ ހޫނު ސުޕް ތަށްޓައް އަސޭމިރުސް އަޅައިގެން ގިރަން ފަށައިފިއެވެ.
"އެކަމާމެދު އެއްވެސް ވަރަކަށް ވިސްނައިލިންތަ-؟" ސުޕް ތަށިން އަރަމުން ދިޔަ ދުމުގެ ތެރެއިން އަންހެން ކުއްޖާގެ މޫނަށް ބަލައިލަމުން ފިރިހެން ކުއްޖާ އަހައިލިއެވެ.
"ކޮން ކަމަކާ-؟" އަންހެން ކުއްޖާ ސުޕް ބޯން ފަށައިފިއެވެ.
"އަހަރެމެން ދެ މީހުންގެ އާދަ އާއި ޚިޔާލު ހުންނަ ގޮތް މުޅީން އެއްގޮތެއްނު-؟"
"މީގެ ކުރީގެ ދުވަސްވަރެއްގައި އަހަރެމެން ދެ މީހުން އެހެން ސިފައެއްގައި އެކީގައި ދުނިޔޭގައި އުޅުނީ ކަމަށް ވެދާނެ-" އަންހެން ކުއްޖާ ސަމާސާގެ ރާގަކަށް ބުނެލިއެވެ.
"އާނ- އެ ދުވަސްވަރު އަހަރެމެން ދެ މީހުން އުޅުނީ އެކަކު އަނެކެއްގެ އެހީތެރިއެއްގެ ގޮތުގައި ކަމަށް ވާނީ-" ފިރިހެން ކުއްޖާ މާނައިން ފުރިފައިވާ ގޮތަކަށް އަންހެން ކުއްޖާގެ ވާހަކަ އަށް ތާއީދު ކުރިއެވެ.
"އައްދޭ-" އަންހެން ކުއްޖާ ވަރަށް ބާރަށް ހީނގެންފިއެވެ. ބަސްތައް އެކި ގޮތް ގޮތަށް އަނބުރައިގެން ތަފާތު މާނަތައް ނެރެގެން ވާހަކަ ދެއްކުމަކީ ފިރިހެން ކުއްޖާގެ އާދަ އެކެވެ. އެއީ އަންހެން ކުއްޖާ އަށް ވަރަށް ކަމުދާ އާދަ އަކަށް ވެސް އޮންނަނީ ވެފައެވެ.
"އާނ- އަހަރެން އެއްބަސްވަން- ދެ މީހުން އެކަކު އަނެކެއްގެ ފިޔަވަޅު މަތީގައި ފިޔަވަޅު އަޅަމުން ދިޔައީ ކަމަށް ވާނީ-"
އަންހެން ކުއްޖާ ލަދުން އިސް ޖަހައިލި އެވެ. އެކަމަކު އޭނާ އަކީ ޢާއްމު ގޮތެއްގައި ލަދު ގަންނަ ކުއްޖެއް ނޫނެވެ. އެއީ އަމިއްލަ ނަފްސަށް ވަރަށް ބޮޑަށް އިތުބާރު ކުރާ، ތެދުވެރި ކުއްޖެކެވެ. ވާހަކަ ދައްކާނީ ސާފު ސީދާ ތެދު ބަހުންނެވެ. އޭނާ ބޭނުން ވަނީ އިހުގެ އާދަތަކާ ދެކޮޅު ހަދާށެވެ.
"ދެ ލޯ ރަތް ކޮށްގެން އަހަރެންނާ ދިމާ އަށް ތިޔަ ބަލަނީ ކީއްވެގެން-؟ އެހެން ދިމާ އަކަށް ބަލާ- އަހަރެން ހާސް ވަނީ-" އޭނާ ފިރިހެން ކުއްޖާ އާ ދިމާ އަށް ބުނެލިއެވެ.
ފިރިހެން ކުއްޖާ ހިނިތުންވެ ހުރެގެން އަންހެން ކުއްޖާ އާ ދިމާ އަށް ބަލަނީ އެވެ. ސުޕް ތަށި އޭނާގެ ކުރިމަތީގައި ހުރެގެން ހިހޫ ވަނީއެވެ.
"އޭތް- އަނެއްކާ އަހަރެން ދެކެ ލޯބި ވާން ފެށީތަ-؟" އަންހެން ކުއްޖާ މަޖާ ވެލާފައި އަހައިލިއެވެ.
"އާނ-" ފިރިހެން ކުއްޖާ ވަރަށް އާދައިގެ ގޮތަކަށް ބުނެލި އެވެ. އޭރުވެސް އޭނާ އިނީ އަންހެން ކުއްޖާގެ މޫނަށް ބަލަހައްޓައިގެންނެވެ. އާނއެކޭ ބުނެވުނީ ވަރަށް ސީރިއަސް ރާގަކަށް ކަމުގައި އޭނާ އިހްސާސް ކުރެވުނީ ތަންކޮޅެއް ލަހުންނެވެ. އޭނާ އަށް އިހުސާސް ކުރެވުނީ އޭނާ ބުނި އާނ- އަކީ މުޅީން ހިމޭންކޮށް އޮތް ފެންގަނޑެއްގެ ތެރެއަށް އެއްލައިލެވުނު ގާބުރިއެއް ކަމުގައެވެ. އެ ގާބުރި އަޑިއަށް ދިޔައީ ފެންގަނޑުގައި ރާޅުބާނި ތަކެއް އުފައްދާފައި ކަމުގައި އޭނާ އަށް އިހްސާސް ކުރެވުނެވެ. ރެސްޓޯރަންޓްގެ ފާރުތަކުން އާނ- އާނ- އޭ ގޮވަމުން ދާ ކަމުގައި ވެސް އޭނާ އަށް ހީކުރެވެން ފެށި އެވެ. ފެންގަނޑަށް އެއްލި ގާބުރި ގޮސް އަޑީގައި ހަމަޖެހިލައިފި އެވެ. އާނ- މި ބަސް ގޮސް އޭނާގެ ހިތުގައި ހަރުލައިފިއެވެ.
"ނޫން- ނޫން- ތިޔައީ ރަނގަޅު ކަމެއް ނޫން- ތިޔަ ކަމެއް ނުވާނެ- ތިޔަ ލޯތްބަކީ ކޮން ތަނަކުން އައި އެއްޗެއް-؟ އަހަންނަށް ކަމުދަނީ މިހާރު ވެސް މި އޮތް ރަޙްމަތްތެރިކަމުގެ ގުޅުން- އެ ގުޅުން ޤުރްބާން ކޮށްލާކަށް އަހަރެން ބޭނުމެއް ނޫން- ތިޔައީ އަހަރެންގެ ވަރަށް ގާތް އެކުވެރިއެއް-" އޭނާ ތަޤްރީރު ކުރަން ފަށައިފި އެވެ. ތަޤްރީރު ކުރުމަކީ އޭނާގެ އާދަ އެކެވެ.
"އަހަރެން ދެކެ ލޯބިވާން ބޭނުން ނޫނިއްޔާ ނުވޭ- މައްސަލައެއް ނެތް- އެކަމަކު އަހަރެން ލޯބި ވާނަން- އެއީ އަހަރެންގެ ކަމެއް-"
ފިރިހެން ކުއްޖާ ވާހަކަ ދެއްކީ ކެތްތެރިކަމާ އެކީގަ އެވެ. ހީވަނީ ވަރަށް އާދައިގެ ވާހަކައެއް ދައްކަނީ ހެންނެވެ.
"ތިޔަހެން ވާނީ ކިހިނެއް-؟ ކަންތައް ވާނީ ކިހިނެއް-؟ ވަރަށް ބޮޑު މައްސަލަ އަކަށް ތިޔަކަން ވާނެ- އަހަންނަށް، އަހަރެންގެ ގޮތް އެނގޭ- ތިޔަހެން ލޯބި ވަންޏާ އެންމެ ފަހުން ގޮސް އަހަންނަށް ވެސް ލޯބި ވެވިދާނެ- ތިޔަ ކަހަލަ މުސްކުޅި ބޯދާ ކަމެއްގެ ތެރެއަށް ވަންނާކަށް އަހަރެން ބޭނުމެއް ނޫން- އަހަރެން ކުރަން ލައްކަ ކަންތައް އެބަހުރި- އަދި ރަނގަޅަށް ވިސްނައިލާ-" އަންހެން ކުއްޖާ އާދޭސް ކުރާ ކަހަލަ ގޮތަކަށް ވާހަކަ ދެއްކިއެވެ.
"ރޫޕް- ބުނަންތަ-؟ ބިރު ނުގަނޭ- ޤުދުރަތުން ހިންގަވާ ކަންކަމާ ދެކޮޅު ހަދަން މަސައްކަތް ނުކުރޭ- އަހަރެމެން ރުހުނަސް، ނުރުހުނަސް ވާން އޮތް ކަމެއް ވާނެ- މަތީގައި ވޮޑިގެން ވާ ސުޕަރ ޕްލޭނަރުގެ އިރާދަ އާ ދެކޮޅެއް ނުހެދޭނެ- އަހަރެން ބޭނުންހައި ގޮތަކަށް ކަން ކަމެއް ނުހިނގާނެ-"
"ޔާ ރައްބީ-" އޭނާ މިހާރު ލޯބިން އަހަރެންގެ ނަމަކަށް ވެސް ރޫޕް ހަދައިފި އެވެ. ރޫބީގެ ހިތަށް ބިރުވެރި ޚިޔާލު ތަކެއް ވަދެގެން ދިޔަ އެވެ. އޭނާ ހަމަ ޙަޤީޤަތުގައި ވެސް އަހަރެން ދެކެ ލޯބި ވަނީ އެވެ. ދެން ހަދާނީ ކިހިނެއް ހެއްޔެވެ؟
"އަހަރެންގެ އޮތީ އެންމެ މައްސަލައެއް- ރަޒީ-" އޭނާ އަށް ވާހަކަ ދެއްކޭ ގޮތާ މެދު ޚުދު އޭނާ ވެސް ޙައިރާން ވެއްޖެ އެވެ. ރިޒާ އަށް ރަޒީ އޭނާ މީގެ ކުރިން ދުވަހަކު ވެސް ނުކިޔަ އެވެ. އެ ނަން ފުރަތަމަ ފަހަރަށް ބޭނުން ކުރީ މިއަދުއެވެ.
"ނިކަން ދެކިބަލަ- އަހަރެންގެ މައްސަލައަކީ އެއީ- އަހަރެން ބިރު ގަންނަ ސަބަބަކީ ވެސް އެއީ-"
"ކިހިނެއްވީ-؟ ކޮން މައްސަލައެއް-؟"
"އަހަރެންގެ ޖަޒުބާތުގެ އޮއިވަރު ވަރަށް ގަދަ ވާނެ- މީގެ ކުރިން ވެސް އަހަރެން ލޯބި ވިން- ލޯބި ވެއްޖެއްޔާ މޮޔަވާ ދަރަޖައަށް އަހަރެން ލޯބިވަން- އޭގެ ފަހުން މޮޔަ ވާނެ- އެ މީހަކު އަހަރެން ބޭނުން ގޮތަކަށް ނަށްޓުވަން އަހަރެން މަސައްކަތް ކުރަން ފަށާނަން- މީގެ އިތުރަށް ވެސް އަހަރެންނަށް އެތައް ބަދަލެއް އަންނާނެ- އަހަރެން އަމިއްލަ ނަފްސު ދެކެ ބިރު ގަންނަން ޖެހޭ ސަބަބަކީ އެއީ- ލޯބިވީމާ ލޯބީގެ މައްޗަށް ގަދަ ވެގަތުމަކީ އަހަންނަށް ކުރެވޭ ކަމެއް ނޫން- ލޯބި އަހަރެންގެ މައްޗަށް ގަދަ ވެ ގަންނާނެ- އެއްވެސް ޖަޒުބާތެއްގެ ކުރިމަތީގައި ބަލިވެ ގަތުމަކީ ނުވަތަ ހަތިޔާރު ބެހެއްޓުމަކީ އަހަރެން ކުރާ ހިތްވާ ކަމެއް ނޫން- ބަލިކަށި ވާކަށް އަހަރެން ބޭނުމެއް ނޫން- އިސް ޖަހައިލާކަށް ބޭނުމެއް ނޫން- އެއްވެސް މީހެއްގެ އަމުރުގެ ދަށުގައި ހުންނާކަށް ބޭނުމެއް ނޫން- އެކަމަކު ލޯބިވީމާ އަހަރެންގެ ހުރިހައި ބާރެއް ކެނޑިދާނެ-" ރޫބީގެ ތަޤްރީރު ދިޔައީ ކުރިއަށެވެ.
ރިޒާ މަޑު މަޑުން ރޫބީގެ ތުނި ތުނި އިނގިލިތަކުގައި އަތް ޖައްސައިލި އެވެ. އެއަށް ފަހު ހަމަ އެހާމެ މަޑުން އެ އިނގިލި ތަކުގައި ބޮސް ދިނެވެ. ރޫބީގެ ނޭވާ ކުރުވެގެން ދިޔައެވެ. ހިމޭން ވެއްޖެ އެވެ. އެއީ އޭނާއަށް ވަރަށް ކަމުދިޔަ ކަމަކަށް ވިއެވެ. އެއީ މުޅިން އައު ޖަޒުބާތެކެވެ.
އެ ދެ ކުދިންގެ ލޯބީގައި ކުލަ ޖެހެން ފަށައިފިއެވެ.
ދެ ކުދިން ލޯބީގެ ފައްވާރާއިން ތެމެން ފަށައިފިއެވެ. ގިނަ ވަގުތު ދެ ކުދިން ހޭދަ ކުރަނީ އެކީގައެވެ. ހުނުމާއި، މަޖާ ކުރުމާއި، ކުޅުމުގައެވެ. ދެ ކުދިން އެކީގައި ފިނިބުރު ޖަހަން ދެއެވެ. އަންހެން ކުއްޖާ ގިނަ ވަގުތު ކިޔަވަނީއެވެ. އެހެން ނަމަވެސް ރިޒާ އައިސް ވާހަކަ ދައްކަން ފެށީމާ ރޫބީ ދެއެވެ. ރޫބީއަށް އޭނާގެ ވާހަކަ ތެދުކަމުގެ އިޙްސާސް ވަރަށް ބޮޑަށް ކުރެވެން ފަށައިފިއެވެ. މިހާރު އޭނާ އަކަށް ރިޒާ އާ ނުލައި އެއްވެސް ކަމެއް ކުރެވޭ ގޮތެއް ނުވެއެވެ.
އޭނާގެ ވަރަށް ގިނަ ކަންތައްތައް ނުކުރެވި ހުންނަން ފަށައިފިއެވެ. އޭނާ އަކީ އަންހެނުންގެ ވަރަށް ގިނަ ޙަރަކާތްތަކުގައި ބައިވެރިވާ ކުއްޖެކެވެ. ވަރަށް ގިނަ ޖަމްޢިއްޔާތަކުގެ މެންބަރެކެވެ. އެކަމަކު މިހާރު ކޮލެޖްގެ ފިލާވަޅުތައްވެސް އޭނާއަށް ނިންމެނީ ލައްކަ މަސައްކަތުންނެވެ. ރޭގަނޑު ނިދެނީ އެހައި އުނދަގުލުންނެވެ. އޭނާ އެކަމަށް އެންމެ ބޮޑަށް ބިރުގަތް ކަންތަކާ ލައިގަތީއެވެ.
އޭނާ ބައެއް ފަހަރަށް ވިސްނައެވެ.
މިހާރު އޭނާ ހުންނާނީ ކީއްކުރަން ބާވައެވެ؟ ކުލާހުގައި ކަމަށް ވެދާނެ އެވެ. ނޫނީ ރައްޓެއްސަކާ އެކު ބައިސްކޯފަށް ދިޔައީ ކަމަށްވެސް ވެދާނެއެވެ. މި ވަގުތު އޭނާ އޮންނާނީ ނިދާފައި ބާވައެވެ؟ ނޫނީ ހޭލާ އުޅޭނެ ބާވައެވެ؟ ވާރެޔާ ތެމެން ބޭރަށް ނުކުމެ ހިނގަނީ ކަމަށް ވެސް ވެދާނެއެވެ. ރޫބީ އަކީ ވަރަށް ބޮޑަށް ވާރެޔާ ތެމޭ ހިތްވާ ކުއްޖެކެވެ. ރިޒާ އަކީވެސް ވާރެޔާ ހެދި މޮޔަވާ ކުއްޖެކެވެ.
ހަވީރު ވެއްޖެއެވެ.
ދެ ކުދިން އެ ދުވަސްވަރު ކޮލެޖްގައި ބާއްވާ ޑްރާމާ އެއްގައި ބައިވެރި ވެއްޖެ އެވެ. ފަރިތަ ކުރަން އުޅެފައި ލިބުނު ހުސް ވަގުތުކޮޅެއްގައި ދެ ކުދިން ތިބީ ކޮލެޖްގެ ގޯތި ތެރޭގައި ހުރި ސިމެންތި ގޮނޑިއެއްގައި އިށީނދެގެންނެވެ. އެއީ ހިސާބަކަށް ފިނި ރެއެކެވެ. ދެ މީހުން އިށީނދެގެން ތިބީ ވަރަށް ކައިރި ކައިރީގައެވެ. އާދައިގެ މަތީން ރޫބީ އިނީ ރިޒާގެ އަތުގައި ހިފަހައްޓައިގެންނެވެ. އަތުގައި ހިފުމަކީ އޭނާ ވަރަށް ކުރާ ހިތްވާ ކަމެކެވެ. ސާދަވިލޭރޭގެ ހަނދު އޭގެ އެންމެ ފުރިހަމަ ކަމާއެކު އުޑުމަތީގައި އަލިގަދަ ބައްތިއެއްހެން ދިއްލިފައި ހުއްޓެވެ. ހަނދާ ދިމާއަށް އަތްދިއްކޮށްގެން ކަހަލަ ގޮތަކަށް ތަންކޮޅެއް ދުރުގައި ވަރަށް ބޮޑު ގަހެއް ހުއްޓެވެ. ހީވަނީ ހަނދުން ރީތި ކަމަށް އެދި ސަލާން ޖަހަނީ ހެންނެވެ. މާޙަވްލުގެ ޖާދޫގައި ޖެހި، ދެކުދިން ގެނބެމުން ދަނީއެވެ.
ރިޒާ އާދައިގެ މަތީން ޖީބުން ދެ ޕެކެޓް ޖޫސް ނަގައިފި އެވެ. ރޫބީ އަށް ދިނީ އޭނާއަށް އެންމެ މީރު އަލަނާސި ޖޫހެވެ. އޭނާ ކޮންމެ ދުވަހަކުވެސް އަންނަނީ ދެ ކުދިންނަށްވާ ވަރަށް ޖޫސް ހިފައިގެންނެވެ. ދެ ޕެކެޓެވެ. އެކަމަކު އަބަދުވެސް ދެ މީހުން ބޮނީ އެއް ޕެކެޓަކުންނެވެ. އެއް ޕެކެޓު ހުސްވީމާ އަނެއް ޕެކެޓު ބޮނީއެވެ. މިއީވެސް އެ ދެ ކުދިން އަމިއްލައަށް އުފައްދާފައިވާ ޤަވާޢިދުންކުރެ އެއް ޤަވާޢިދެވެ. ދެ ކުދިންގެ ދެމެދުގައި ލޯބީގެ ޖަޒުބާތު އުފެދި، މިހާރު އޮތް ގުޅުން ޤާއިމު ވީއްސުރެ ދެ ކުދިން ކައި ހަދަނީ އެއް ތަށްޓަކުންނެވެ. ފެން ބޮނީ އެއް ތަށްޓަކުންނެވެ.
އެއީ ދެ ކުދިންވެސް ވަރަށް ކުރާ ހިތުން ކުރާ ކަންކަމެވެ.
"ރޫޕް- ފިނިވަނީ-" ރިޒާ ލޯބިން، ވައިއަޑުން ބުނެލިއެވެ.
ރޫބީ އޭނާގެ އަތުގައި ވަރަށް ބާރަށް ހިފަހައްޓައިލި އެވެ. ހީވަނީ ދެން ދުވަހަކުވެސް ދޫކޮށްނުލާން ހިފެހެއްޓިހެންނެވެ.
"ރޫޕް- އަހަރެމެން ދެ މީހުން މިއީ ދެ ރަޙްމަތްތެރިންނެއްނު ދޯ-؟ އެކަކު އަނެކެއްގެ ހިތުގައި ހުންނަ ވާހަކަތައް ފާޅުގައި ދެއްކޭނެއެއްނު، ދޯ؟"
ރިޒާ ރޫބީގެ އުނަގަނޑުގައި ހިފަހައްޓައިލިއެވެ.
"އާނ-" ރޫބީ އިނީ ޚިޔާލެއްގެ ތެރެއަށް ގެއްލިފައެވެ.
(ނުނިމޭ)
