އިންޑިއާގެ ޔޫނިއަން މިނިސްޓަރ އޮފް ހެލްތު އެންޑް ފެމިލީ ވެލްފެއަރ، މިނިސްޓަރ އޮފް ކެމިކަލްސް އެންޑް ފަރޓިލައިޒަރސް އަދި ބަރަތިޔާ ޖަނަތަ ޕާޓީ (ބީ.ޖޭ.ޕީ)ގެ ގައުމީ ރައީސް، ޖޭ. ޕީ ނައްޑާ ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒުގެ އަރިހަށް އިޙްތިރާމުގެ ޒިޔާރަތެއް ކުރައްވައިފިއެވެ.
ރައީސުލްޖުމްހޫރިއްޔާ އިންޑިއާއަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން ބޭއްވެވި މި ބައްދަލުކުރެއްވުމުގައި ވާހަކަފުޅުދައްކަވަމުން އެމަނިކުފާނު ވަނީ، މި ފުރަމާނަ ދަތުރުފުޅުގައި ކުރިއަށްދާ ބިނާކުރަނިވި މަޝްވަރާތަކުގެ މައްޗަށް އަލިއަޅުއްވާލައްވާފައެވެ. އަދި މި ބައްދަލުވުމުގައި މިނިސްޓަރ ނައްޑާ ވަނީ، އިންޑިއާ އާއި ރާއްޖެއާ ދެމެދު ބަދަހިވަމުން އަންނަ ގުޅުން ފެނިވަޑައިގަތުމުން އުފާކުރައްވާކަމަށް ވިދާޅުވެފައެވެ.
ދެ ބޭފުޅުން މަޝްވަރާކުރެއްވި ކަންތައްތަކުގެ ތެރޭގައި، ސިއްޙީ ފަރުވާގެ ފެންވަރު ރަނގަޅުކޮށް އެ ހިދުމަތުގައި ކުރުންތެރިކަން އިތުރުކުރުމުގެ ގޮތުން އެކި ދާއިރާތަކުން ހާއްސަ ޑޮކްޓަރުންނާއި ނަރުހުން ތަމްރީންކުރުމާއި، ސިއްޙީ ދާއިރާގެ ބިނާރު ތަރައްގީކުރުމާއި، ޑިޖިޓަލައިޒްކުރުން ހިމެނެއެވެ.
ބީ.ޖޭ.ޕީގެ ގައުމީ ރައީސްގެ ހައިސިއްޔަތުން ސިއްހީ ވަޒީރު ނައްޑާ ވަނީ، މަތީ ފަންތީގައި ފަންނީ މައުލޫމާތު ބަދަލުކުރުމަށް، ދިވެހިރާއްޖޭގެ ސަރުކާރު ހިންގާ ޕާޓީއަށް ދައުވަތު އަރުވާފައެވެ.
