ބްރެޒިލްގެ ފެޑެރަލް ސުޕްރީމް ކޯޓާއި އެކްސްއާ ދެމެދު ހިނގި ހަމަނުޖެހުންތަކަކަށްފަހު ބްރެޒިލްއިން އަލުން އިލޯން މަސްކްގެ ސޯޝަލް މީޑިއާ ޕްލެޓްފޯމް އެކްސް އެޤައުމުގައި ބޭނުން ކުރެވޭ ގޮތަށް ހަދައިފިއެވެ.
ކުރީގެ ނަމުން ޓްވިޓަރ ކަމުގައިވާ މި ޕްލެޓްފޯމް ސަސްޕެންޑް ކުރެވުނީ އޯގަސްޓް 31 ގައެވެ. އެއީ ބްރެޒިލްގެ ހަރުކަށި އިންޓަރނެޓް ޤާނޫނުތަކުގެ ދަށުން ޣައިރު ޤާނޫނީ ކަމަށް ބެލެވޭ ބައެއް ކޮންޓެންޓް ނައްތާލުމަށާއި ވަކި އެކައުންޓްތަކެއް ބްލޮކްކުރުމަށް ކޯޓުން ކުރި އަމުރުތަކާ މަސްކް ޚިލާފުވުމާ ގުޅިގެންނެވެ.
މިނިސްޓަރ އޮފް ދަ ސުޕްރީމް ފެޑެރަލް ކޯޓް އޮފް ބްރެޒިލް، އަލެކްޒެންޑަރ ޑި މޮރާސްގެ އިސްނެންގެވުމުގެ ދަށުން، ކޯޓުން ކަނޑައެޅި ޝަރުތުތަކާ އެއްގޮތަށް ޢަމަލުކުރުމަށް އީލޯން މަސްކް އެއްބަސްވުމާ ގުޅިގެން ކޯޓުން އެކްސްގެ ހިންގުން އަލުން ބްރެޒިލްގައި ފެށުމަށް ވަނީ ހުއްދަދީފައިއެވެ. މީގެ ކުރިން މަސްކްވަނީ އެކްސްގެ ބްރެޒިލް އޮފީސް ބަންންދުކޮށް، ޑި މޮރާސް އާ ދެކޮޅަށް ފާޑުކިޔައި، އޭނާއަކީ ސިނަމާ ފިލްމުތަކުގެ ނުބައި ކެރެކްޓަރެއްފަދަ މީހެއް ކަމަށް ވިދާޅުވެފައެވެ.
މި މަނާކުރުމުގެ މަޤްޞަދަކީ ނަފްރަތުގެ ބަސްތަކާއި، އަނިޔާވެރިކަމަށް ހިތްވަރުދިނުމާއި، ސިޔާސީ ދޮގު މަޢުލޫމާތު ފެތުރުން ހުއްޓުވުމެވެ. އަދި މީގެ އިތުރުން ބްރެޒިލްއިން ޓެކް ކުންފުނިތަކަށް އެ ޤައުމުގައި ޤާނޫނީ ރެޕްރެޒެންޓޭޓިވްއެއް ބެހެއްޓުމަށް ލާޒިމްކުރެއެވެ. މިއީ މަސްކް ފުރަތަމަ ދެކޮޅުހެދި ޝަރުތެކެވެ.
އިންވެސްޓަރުންގެ ފަރާތުން އިތުރުވަމުންދިޔަ ޕްރެޝަރާއި ޖޫރިމަނާ ކުރެވިދާނެކަމުގެ ބިރާ ކުރިމަތިވުމާއެކު މަސްކްވަނީ އޭނާގެ ފިިކުރު ބަދަލުކުރައްވާފައެވެ. މި ސަސްޕެންޝަންގެ ތެރޭގައި ބްލޫސްކައި އަދި ތްރެޑްސް ފަދަ ވާދަވެރި ޕްލެޓްފޯމްތަކަށް ކުރިއެރުން ލިބުނެވެ. ބްރެޒިލްގެ އެކްސް ބޭނުންކުރާ ފަރާތްތަކަށް އަންގާރަ ދުވަހުން ފެށިގެން އެ ޕްލެޓްފޯމަށް އެކްސެސް ލިބެން ފެށިއެވެ. އަދި މި ޕްލެޓްފޯމުން ވަނީ ޤާނޫނީ އިމުގެ ތެރެއިން ޚިޔާލު ފާޅުކުރުމުގެ މިނިވަންކަމަށް އެހީތެރިވެދޭނެކަމަށް އިޤްރާރުވެފައެވެ.
