ކަނޑުގެ މާޙައުލު ރައްކާތެރިކުރުމުގެ މުހިންމުކަން ފާހަގަކުރުމަށް ކުރު ފިލްމެއް ޕްރޮފެޝަނަލް އެސޯސިއޭޝަން އޮފް ޑައިވިންގ އިންސްޓްރަކްޓަރސް (ޕަޑި) އާއި ޗައިނާގެ މަޝްހޫރު ޝަޚްޞިއްޔަތު ވިކްޓަރ މާ އަދި ޓައިގަރ ޝާާކް ރެސިޑެންސް ގުޅިގެން ހަދައިފިއެވެ.
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އާއި ގައުމީ އެއަރލައިން މޯލްޑިވިއަންގެ އެހީތެރިކަމާއެކު، މި މަޝްރޫޢު ފިލްމުކުރެވިފައިވަނީ ފުވައްމުލަކުގައެވެ. ފުވައްމުލަކަކީ ކަނޑުގެ ދިރުމާއި ސާފު މޫދަށް މަޝްހޫރު ރަށެކެވެ.
ޗައިނާގައި 16 މިލިއަނަށްވުރެ ގިނަ ފޮލޯވަރުން ހުންނަ 28 އަހަރުގެ އެކްޓަރ އަދި ލަވަކިޔުންތެރިއެއް ކަމުގައިވާ ވިކްޓަރ މާ، މި ފިލްމުގައި ވަނީ އިންސާނުންނާއި ކަނޑުގެ މާޙައުލާ ދެމެދު އޮންނަ ގުޅުން ފާހަގަކުރުމަށް މިޔަރުތަކާއި އެކު ފީނާފައެވެ. މީގެ އިތުރުން، މި ފިލްމުގައި ގޮނޑުދޮށް ސާފުކުރުމުގެ މަސައްކަތްތައްވެސް ދައްކުވައިދީފައިވެއެވެ. މިއީ ކަނޑު ރައްކާތެރިކުރުމުގައި އާންމުންގެ ބައިވެރިވުން މުހިންމުކަން ފާހަގަކުރުމަށެވެ.
އެމްއެމްޕީއާރުސީ އާއި މޯލްޑިވިއަން ވަނީ ޑޮމެސްޓިކް ފްލައިޓްތަކާއި އެހީތެރިކަން ފޯރުކޮށްދީީގެން މި މަޝްރޫޢު ކުރިއަށް ގެންދިއުމަށް މަގުފަހިކޮށްދީފައެވެ.
މި މަޝްރޫޢުގެ މަޤްޞަދަކީ ކަނޑު ރައްކާތެރިކުރުމާމެދު ދުނިޔޭގެ ހޭލުންތެރިކަން އިތުރުކުރުމާއި، ދެމެހެއްޓެނިވި ގޮތެއްގައި ތަރައްޤީވުމުގައި ދިވެހިރާއްޖޭގެ ނަން އުފުލުމެވެ. ވިކްޓަރ މާގެ ނުފޫޒާއެކު، މި މަޝްރޫޢުން އުންމީދުކުރަނީ ކަނޑުގެ ދިރުންތައް ރައްކާތެރިކުރުމަށް ފުޅާ ދާއިރާއެއްގައި މަސައްކަތްކުރުމަށް އިތުރު ހަތްވަރެއް ލިބިގެންދިއުމަށެވެ.
ދިވެހިރާއްޖެއަކީ ކަނޑުގެ ތިމާވެށި ރައްކާތެރިކުރުމުގައި ކުރީއްސުރެ މިސައްކަތްކުރަމުން އަންނަ ޤައުމެކެވެ. މިގޮތުން ޔުނެސްކޯ ބަޔޯސްފިއަރ ރިޒާވްތައް ޤާއިމުކުރުމާއި، މުރަކަ އާލާކުރުމުގެ މަޝްރޫޢުތަކާއި، ގޮނޑުދޮށް ސާފުކުރުމުގެ ޙަރަކާތްތަކާއި، އަދި ކަނޑުގެ ދިރުންތައް ޙިމާޔަތްކުރުން ފަދަ އެތައް މަސައްކަތްތަކެއް ވަނީ ކޮއްފައިއެވެ.
