އިރުމަތީ ގުދުސްގައި ހުންނަ އދ. ގެ ފަލަސްޠީނު ރެފިއުޖީންގެ އެހީ އާއި މަސައްކަތްތަކުގެ އޭޖެންސީ (އަންރުވާ) ގެ މައި އޮފީސް، އާބާދުކުރުމުގެ ބޭނުމަށް އަތުލައިގަތުމަށް އިސްރާއީލުގެ އިދާރާތަކުން ނިންމި ނިންމުން ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
ރާއްޖޭގެ ޚާރިޖީ ވުޒާރާއިން ނެރުނު ބަޔާނެއްގައި ވިދާޅުވީ، ބައިނަލްއަޤްވާމީ ޤާނޫނާއި ބައިނަލްއަޤްވާމީ އިންސާނީ ޙައްޤުތަކުގެ ޤާނޫނާ ޚިލާފަށް އިސްރާއީލުން ކުރަމުންދާ ޢަމަލުތައް، ހުއްޓުމެއްނެތި ކުރިއަށްދާކަމާމެދު ދިވެހިރާއްޖެއިން ކަންބޮޑުވުން ފާޅުކުރާކަމަށެވެ. މީގެ ތެރޭގައި ޣައިރު ޤާނޫނީ ގޮތުން އާބާދުކުރުން ފުޅާކުރުމާއި، އދ. ގެ އޭޖެންސީތަކާއި އެހީދޭ ޖަމްޢިއްޔާތައް ނައްތާލުމާއި، އެހީތެރިންނަށް ހުރަސްއެޅުމާއި ހަމަލާދިނުން ހިމެނެއެވެ.
މި ޢަމަލުތަކުގެ ސަބަބުން ފަލަސްޠީނުގެ ރައްޔިތުންނަށް އަސާސީ ޚިދުމަތްތައް ފޯރުކޮށްދިނުމަށާއި އަސާސީ ޙައްޤުތައް ލިބިދިނުމަށް ހުރަސްއެޅެއެވެ. އަދި ދެމެހެއްޓެނިވި ސުލްޙައަށް އޮތް ހަމައެކަނި މަގުކަމުގައިވާ، 1967 ގެ ކުރީގެ ސަރަޙައްދުތަކުގެ މައްޗަށް، އިރުމަތީ ގުދުސް ވެރިކަންކުރާ ރަށްކަމުގައި ބަލައިގެން ފަލަސްޠީނު ދައުލަތް ޤާއިމުކުރުމަށްވެސް ހުރަސްއެޅޭކަމަށް ޚާރިޖީ ވުޒާރާއިން ވިދާޅުވިއެވެ.
މި ދަތި ދަނޑިވަޅުގައިވެސް އަންރުވާއިން ފުރާނަ ސަލާމަތްކުރުމުގެ މަސައްކަތް ކުރިއަށް ގެންދިއުމުގައި ދެމިތިބޭތީ ދިވެހިރާއްޖެއިން ތަޢުރީފުކުރާކަމަށްވެސް އެ ވުޒާރާއިން ވިދާޅުވިއެވެ.
ދިވެހި ސަރުކާރާއި ދިވެހި ރައްޔިތުން ފަލަސްޠީނުގެ ރައްޔިތުންނާއެކު އެއްބައިވަންތަކަން ފާޅުކުރާކަމަށާއި، ފަލަސްޠީނުގެ ރައްޔިތުންނާ ދެކޮޅަށް އިސްރާއީލުން ހިންގާ ޣައިރު ޤާނޫނީ ޢަމަލުތަކަށް ޖަވާބުދާރީކުރުވުމަށް އަވަސް އަދި އަސަރުހުރި ފިޔަވަޅުތަކެއް އެޅުމަށް ބައިނަލްއަޤްވާމީ މުޖުތަމަޢުއަށް ސަރުކާރުން ވަނީ ގޮވާލައިފާއެވެ.
