"ފަލަސްތީނާއެކު ދިވެހިން" ގެ ނަމުގައި ބޭއްވުނު ޓެލެތޯނުން ލިބުނު ފައިސާ ޔުނައިޓެޑް ނޭޝަންސް ރިލިލީފް އެންޑް ވާރކްސް އޭޖެންސީ ފޯރ ޕަލަސްތީނިއަން ރެފިއުޖީޒް (އަންރުވާ) އަށް ފޮނުވާފައިވާކަމަށް ދިވެހިރާއްޖޭގެ ޚާރިޖީ ވުޒާރާއިން ވިދާޅުވެއްޖެއެވެ.
ޚާރިޖީ ވުޒާރާއިން ނެރުނު ބަޔާނުގައި ވިދާޅުވެފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، 12 ޖޫން 2024 ގައި ޕަބްލިކް ސަރވިސް މީޑިއާ (ޕީއެސްއެމް) އިން ބޭއްވި މި ޓެލެތޯނުން ޖުމްލަ 1,248,826.56 ރުފިޔާ ލިބިފައިވާ ކަމަށެވެ. މި އަދަދު ވަނީ އޮޑިޓް ފާމްއެއް ކަމުގައިވާ ކްރޯވ މޯލްޑިވްސް އެލް.އެލް.ޕީ. އިން ކޮންފަރމްކޮށްފައިކަމަށްވެސް ޚާރީޖީވުޒާރާއިން ވިދާޅުވިއެވެ.
ޚާރިޖީ ވުޒާރާއިން އިތުރަށް ވިދޭޅުވެފައިވަނީ، މި ފައިސާ އަންރުވާއަށް 20 އޮގަސްޓް 2024 ގައި ފޮނުވާފައިވާ ކަމަށެވެ. އަދި މި ފައިސާ ޚަރަދުކުރާނެ ކުރު މުއްދަތުގެ އަދި ދިގު މުއްދަތުގެ ޕްރޮގްރާމްތަކާއި ޕްރޮޖެކްޓުތަކާ ގުޅޭގޮތުން މިހާރު އަންރުވާއާއެކު މަޝްވަރާކުރަމުންދާ ކަމަށެވެ.
"މިފަދަ ބޮޑު އަދަދެއްގެ ފައިސާ ފަލަސްތީނުގެ ރައްޔިތުންނަށްޓަކައި ދިވެހި ރައްޔިތުން ހަދިޔާކޮށްފައިވާކަމީ ފަލަސްތީނުގެ މިނިވަންކަމަށް ރާއްޖެއިން ކުރާ ތާޢީދާއި، އަބަދުވެސް، އަދި ވަކީން ޚާއްސަކޮށް މިފަދަ ދަތި އުނދަގޫ ދަނޑިވަޅެއްގައި، އެ ޤައުމާއި އެ ޤައުމުގެ ރައްޔިތުންނާއެކު ސާބިތުކަމާއެކު ދިވެހިން ތިބި ކަމުގެ އަލިގަދަ ހެއްކެކެވެ،" ޚާރިޖީ ވުޒާރާގެ ބަޔާނުގައި ވިދާޅުވެފައިވެއިވެއެވެ.
މީގެއިތުރުން، ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ނަސްލު ނައްތާލުމުގެ އަމަލުތަކާއި ބައިނަލްއަޤްވާމީ ޤާނޫނާއި އިންޓަރނޭޝަނަލް ހިއުމެނިޓޭރިއަން ލޯ އާ ޚިލާފަށް ދެމުން ގެންދާ ހަމަލާތައް ދިވެހި ސަރުކާރުން ހަރުކަށި ބަހުން ކުށްވެރިކޮށްފައިވެއެވެ.
މި ޓެލެތޯނަކީ ފަލަސްތީނުގެ ރައްޔިތުންނަށް އެހީތެރިވުމަށް ދިވެހި ސަރުކާރުން އިސްނަގައިގެން ހިންގި ޚާއްޞަ މަސައްކަތެކެވެ. މި މަސައްކަތުގައި ދިވެހި ރައްޔިތުންގެ ފަރާތުން ލިބުނު ތަރުހީބާއި އެއްބާރުލުމަކީ ފަލަސްތީނުގެ މައްސަލައާ މެދު ދިވެހިން ދެކޭގޮތް ދައްކުވައިދޭ ކަމެކެވެ.
