ގޭންގު ކުށްތަކާއި މަސްތުވާތަކެތީގެ މައްސަލަތަކާ ގުޅުންހުރި ތަންތަން ދައުލަތަށް ނެގުމުގެ ބާރު ސަރުކާރަށް ލިބިދޭގޮތަށް ގާނޫނަށް އިސްލާހު ގެންނާނެކަމަަށް ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ މިނިސްޓަރު އަލީ އިހުސާން ވިދާޅުވެއްޖެއެވެ.

މިނިސްޓަރު އިހްސާން މި އިންޒާރު ދެއްވާފައިވަނީ ހުޅުމާލޭގެ ދެވަނަ ފިޔަވަހީގައި ހުރި އެޗް 9 ޓަވަރުގެ އެޕާޓްމަންޓެއްގައި މީހަކު ރަހީނުކޮށްގެން ހިންގުނު ފުލުހުންގެ އޮޕަރޭޝަނަކަށްފަހު، މީޑިއާއަށް ދެއްވި އިންޓަވިއުއެއްގައެވެ.

މިނިސްޓަރު އިހުސާން މީޑިއާއަށް ދެއްވި އިންޓަވިއުގައި ވިދާޅުވީ، މި ސަރުކާރު ވެރިކަމާ ހަވާލުވިއިރު ގޭންގު ކުށްތަކާއި މަސްތުވާތަކެތީގެ މައްސަލަތައް ވަރަށް ބޮޑަށް އިތުރުވެފައިވާ ކަމަށެވެ. އަދި މި މައްސަލަތަކަށް ދާއިމީ ހައްލެއް ހޯދުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަމާޒެއް ކަމަށްވެސް ވިދާޅުވިއެވެ.

މިނިސްޓަރު އިހުސާން ފާހަގަކުރެއްވި ގޮތުގައި، މިކަން ހާސިލުކުރުމަށްޓަކައި ގާނޫނީ އިސްލާހުތަކެއް ގެނައުމަކީ ކޮންމެހެން ބޭނުން ކަމެކެވެ. އަދި ގޭންގު ކުށްތަކާ ދެކޮޅަށް މަސައްކަތްކުރުމަށް މޯލްޑިވްސް ޕޮލިސް ސަރވިސްގައި ހާއްސަ ޔުނިޓެއް ގާއިމުކޮށް، އެ ޔުނިޓުން ކުރަމުންދާ މަސައްކަތްތަކުގެ ސަބަބުން ކުރިއެރުންތަކެއް ލިބިފައިވާ ކަމަށްވެސް ވިދާޅުވިއެވެ.

މިނިސްޓަރުގެ ވާހަކަފުޅުގައި، ބައެއް ފްލެޓްތަކާއި އެހެނިހެން ތަންތަނަކީ ކުށްވެރިން އަބަދުވެސް ބޭނުންކުރާ ތަންތަން ކަމަށް ފާހަގަކުރެއްވިއެވެ. ހުޅުމާލޭގެ ފްލެޓްތަކުގައި ކުށްކުރާ ޙާލަތްތަކުގައި، އެޗްޑީސީއާ މަޝްވަރާކޮށްގެން ޙައްލު ހޯދުމަށް މަސައްކަތްކުރާނެ ކަމަށްވެސް ވިދާޅުވިއެވެ.

ގޭންގު ޤާނޫނަށް ހުށަހަޅާފައިވާ އިޞްލާޙުތަކުގެ ތެރެއިން އެއް އިޞްލާހަކީ ކުށްކުރުމުގެ މާޙައުލަކަށް ހައުސިންގ ޔުނިޓެއް ބަދަލުވެފައިވާނަމަ، އެފަދަ ތަންތަން އަނބުރާ ދައުލަތަށް ނެގުމެވެ. އަދި މަސްތުވާތަކެތީގެ ޤާނޫނަށް ގެންނަ އިޞްލާޙުގައިވެސް، އައްޑާގެ ގޮތުގައި ބޭނުންކުރާ ތަންތަން ދައުލަތަށް ނެގުމަށް އަމާޒުކުރާކަމަށް މިނަިސްޓަރ އިހުސާން ވިދާޅުވިއެވެ.

މީގެ އިތުރުން، މިނިސްޓަރު އިހުސާން ފާހަގަކުރެއްވި ގޮތުގައި، މިހާރު ހެދިފައިވާ ގާނޫނުތައް ތަންފީޒުކުރުމުގައި ސަރުކާރަށް ދިމާވާ ގާނޫނީ ގޮންޖެހުންތައް ވަރަށް ގިނައެވެ. އަދި މިހާރުގެ ގާނޫނުތަކުގައި ހުރި މައްސަލަތަކުގެ ސަބަބުން، ތަކުރާރުކޮށް ކުށްކުރާ ފަރާތްތައް މުޖުތަމައުއަށް ދޫކޮށްލަން ޖެހޭ ކަމަށްވެސް ވިދާޅުވިއެވެ.

މި މައްސަލަތަކަށް ހައްލު ހޯދުމަށްޓަކައި، ގޭންގު ކުށްތަކާ ގުޅޭ ގާނޫނުތަކަށް ގެނެވޭ އިސްލާހުތަކާ ހިލާފުވާ ފަރާތްތަކަށް އެންމެ ހަރުކަށި އަދަބު ދިނުމަށް ނިންމާނެ ކަމަށް މިނިސްޓަރު އިހުސާން ވިދާޅުވިއެވެ. އަދި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަކީ ސަރުކާރުގެ އެންމެ އިސް އަމާޒު ކަމަށާއި، އާންމު ރައްޔިތުންގެ ސަލާމަތަށް ނުރައްކާވާފަދަ އެއްވެސް ކަމެއް ހިނގިޔަ ނުދިނުމަށް ސަރުކާރުން ގަދައަޅައި މަސައްކަތްކުރާނެ ކަމަށްވެސް ވިދާޅުވިއެވެ.

އިތުރު ލިޔުންތައް ހޯމް މިނިސްޓްރީ