މާލޭ ސިޓީ ކައުންސިލުން 1446 ވަނަ އަހަރުގެ ރަމަޟާން މަހު ބޭއްވުމަށް ހަމަޖެހިފައިވާ ކީރިތި ޤުރުއާން ކިޔުމުގެ މުބާރާތުގައި ބައިވެރިވުމުގެ ފުރުޞަތު އާންމުކޮށް ހުޅުވާލައިފިއެވެ.
މި މުބާރާތުގައި ކީރިތި ޤުރުއާން ކިޔެވުމުގެ ދެ ގޮތްޕެއް ހިމެނޭނެ ކަމަށް ކައުންސިލުން މަޢުލޫމާތު ދީފައިވެއެވެ. އެއީ ބަލައިގެން ކިޔެވުމުގެ ގޮތްޕާއި ނުބަލައި ކިޔެވުމުގެ ގޮތްޕެވެ. ކޮންމެ ގޮތްޕެއްގައިވެސް 6 އުމުރުފުރާއެއް ހިމެނޭނެއެވެ. އެއީ 6 އަހަރުން ދަށް، 9 އަހަރުން ދަށް، 11 އަހަރުން ދަށް، 13 އަހަރުން ދަށް، 16 އަހަރުން ދަށް އަދި 19 އަހަރުން ދަށުގެ އުމުރުފުރާތަކެވެ.
ކައުންސިލުން ހާމަކުރި ގޮތުގައި، 6 އަހަރުން ދަށުގެ އުމުރުފުރާގެ އުމުރުފުރާގެ ދަރިވަރުންގެ ކިޔެވުމަށް އިންސާފު ނުކުރެވޭނެއެވެ. އެހެން ނަމަވެސް، އެހެން ކޮންމެ އުމުރުފުރާއަކުން އެންމެ މޮޅު 5 ދަރިވަރުން ހޮވައި، 1 ވަނަ، 2 ވަނަ އަދި 3 ވަނަ ހޮވޭނެއެވެ. މީގެ އިތުރުން، ކޮންމެ ގޮތްޕަކުން ވެސް 1 ވަނަ، 2 ވަނަ އަދި 3 ވަނަ ހޮވޭނެ ކަމަށް ކައުންސިލުން ބުނެފައިވެއެވެ.
މުބާރާތުގައި ބައިވެރިވާ ދަރިވަރުންގެ އުމުރު ބަލާނީ 2024 ވަނަ އަހަރުގެ ޖަނަވަރީ 1 ވަނަ ދުވަހަށް ދަރިވަރަށް ފުރޭ އަހަރަށް ކަމަށް ކައުންސިލުން ހާމަކޮށްފައިވެއެވެ. އަދި ކޮންމެ ދަރިވަރަކަށްވެސް ބައިވެރިވެވޭނީ އެއް ގޮތްޕެއްގައި ކަމަށްވެސް ކައުންސިލުން ބުނެފައިވެއެވެ.
މި މުބާރާތަކީ މާލޭ ސިޓީ ކައުންސިލުން ކޮންމެ އަހަރަކު ބާއްވަމުން އަންނަ މުބާރާތެއް ކަމަށާއި، މީގެ މަޤްޞަދަކީ ޅަފަތުގައި ތިބި ކުދިންގެ މެދުގައި ކީރިތި ޤުރުއާނަށް ލޯބި ޖެއްސުމާއި، ޤުރުއާން ކިޔެވުމުގެ ފަންނު ކުރިއެރުވުން ކަމަށް ކައުންސިލުން ބުނެފައިވެއެވެ.
