މާލޭ ސިޓީ ކައުންސިލުން 1446 ވަނަ އަހަރުގެ ރަމަޟާން މަހު ބޭއްވުމަށް ހަމަޖެހިފައިވާ މަދަޙަ ކިޔުމުގެ މުބާރާތުގައި ބައިވެރިވުމުގެ ފުރުޞަތު އާންމުކޮށް ހުޅުވާލައިފިއެވެ.
މި މުބާރާތުގައި ބައިވެރިވެވޭނީ 6 އަހަރުން ދަށް، 9 އަހަރުން ދަށް، 11 އަހަރުން ދަށް، 13 އަހަރުން ދަށް، 16 އަހަރުން ދަށް އަދި 19 އަހަރުން ދަށުގެ އުމުރުފުރާތަކުންނެވެ. އުމުރުފުރާ ކަނޑައެޅުމުގައި ބަލާނީ 2024 ވަނަ އަހަރުގެ ޖަނަވަރީ 1 ވަނަ ދުވަހަށް ދަރިވަރަށް ފުރޭ އުމުރަށެވެ.
ކައުންސިލުން މަޢުލޫމާތު ދެއްވިގޮތުގައި، 6 އަހަރުން ދަށުގެ އުމުރުފުރާގެ ދަރިވަރުންގެ މަދަޙަ ކިޔުން އިންސާފުކުރާ ގޮތަކަށް ހަމަޖެހިފައެއް ނުވެއެވެ. އެހެން ނަމަވެސް، އެނޫން ކޮންމެ އުމުރުފުރާއަކުން އެންމެ މޮޅު 5 ދަރިވަރުން ހޮވޭނެއެވެ. މީގެ އިތުރުން، ކޮންމެ އުމުރުފުރާއަކުން 1 ވަނަ، 2 ވަނަ އަދި 3 ވަނަ ހޮވުމާއެކު، މުޅި މުބާރާތުން ވެސް 1 ވަނަ، 2 ވަނަ އަދި 3 ވަނަ ހޮވޭނެއެވެ.
މުބާރާތުގެ އިނާމުތަކުގެ ތެރޭގައި، ކޮންމެ އުމުރުފުރާއަކުން 1 ވަނައަށް 7,000 ރުފިޔާ، ޓްރޮފީ އަދި ސެޓްފިކެޓް، 2 ވަނައަށް 5,000 ރުފިޔާ، ކްލާކު އަދި ސެޓްފިކެޓް، އަދި 3 ވަނައަށް 3,000 ރުފިޔާ، ކްލާކު އަދި ސެޓްފިކެޓް ހިމެނެއެވެ. މުޅި މުބާރާތުން 1 ވަނައަށް 10,000 ރުފިޔާ، ޓްރޮފީ އަދި ސެޓްފިކެޓް، 2 ވަނައަށް 7,000 ރުފިޔާ، ޓްރޮފީ އަދި ސެޓްފިކެޓް، އަދި 3 ވަނައަށް 5,000 ރުފިޔާ، ޓްރޮފީ އަދި ސެޓްފިކެޓް ދެއެވެ.
މި މުބާރާތަކީ ކުޑަކުދިންގެ މެދުގައި އިސްލާމީ ތަރުބިއްޔަތު އާލާކުރުމަށާއި، ޤުރްއާނާއި މަދަޙައަށް ޝައުޤުވެރިކަން އިތުރުކުރުމަށް އެ ކައުންސިލުން ކޮންމެ އަހަރަކު ބާއްވަމުން އަންނަ މުބާރާތެކެވެ. މުބާރާތުގައި ބައިވެރިވާން ބޭނުންވާ ފަރާތްތަކަށް ކައުންސިލުގެ ވެބްސައިޓް މެދުވެރިކޮށް ކުރިމަތިލެވޭނެ ކަމަށް ކައުންސިލުން މަޢުލޫމާތު ދެއްވާފައިވެއެވެ.
