އިސްލާމީ ކަންތައްތަކާބެހޭ ވުޒާރާއިން ވ. ކެޔޮދޫ ސްކޫލްގެ ދަރިވަރުންނާއި މުދައްރިސުންނާއި ބެލެނިވެރިންނަށް އަމާޒުކޮށްގެން ރިސާލަތު ޕްރޮގުރާމެއް ކުރިއަށް ގެންގޮސްފިއެވެ.
މި ޕްރޮގުރާމުގައި އެ ސްކޫލްގެ ގްރޭޑް 4 އިން 12 އަށް ކިޔަވާ ދަރިވަރުންނަށް ޚާއްޞަ ދަރުސްތަކެއް ކުރިއަށް ގެންދެވުނެވެ. މި ދަރުސްތަކުގައި އަލިއަޅުވާލާފައިވަނީ 'ޝަހާދަތުގެ ދެކަލިމަ' މައުޟޫޢުގެ މައްޗަށެވެ. މި ދަރުސްތައް ނަންގަވައިދެއްވީ އައްޝައިޚް އަޙްމަދު ސިރާޖެވެ.
ހަމައެހެންމެ، ސްކޫލްގެ ބެލެނިވެރިންނާއި މުދައްރިސުންނަށްވެސް 'ޝަހާދަތުގެ ދެކަލިމަ' މައުޟޫޢުގެ މައްޗަށް ދަރުސްތަކެއް ކުރިއަށް ގެންދެވުނެވެ. މީގެ އިތުރުން، ކެޔޮދޫ މިސްކިތުގައިވެސް ދަރުސެއް ކުރިއަށް ގެންދެވުނެވެ.
އިސްލާމީ ކަންތައްތަކާބެހޭ ވުޒާރާއިން ދެއްވި މަޢުލޫމާތުގައިވާ ގޮތުން، މިއަހަރު މިހާތަނަށް ރިސާލަތުގެ 702 ޕްރޮގުރާމް ވަނީ ކުރިއަށް ގެންގޮސްފައެވެ.
މި ޕްރޮގުރާމްތަކުގެ މަޤްޞަދަކީ އިސްލާމްދީނުގެ އަސާސްތަކާއި ޤަދަރުތައް ދިވެހި މުޖުތަމަޢުގައި އާލާކޮށް، ދީނީ ހޭލުންތެރިކަން އިތުރުކުރުމެވެ. ޚާއްޞަކޮށް ޒުވާނުންނާއި ކުޑަކުދިންގެ މެދުގައި އިސްލާމީ ތަޢުލީމު ފެތުރުމަށް މި ޕްރޮގުރާމްތަކުން މަސައްކަތްކުރެއެވެ.
