ދައުލަތުގެ ބެލުމުގެ ދަށަށް ގެނެވޭ ކުދިންނަށް އާއިލީ ވެއްޓެއް ހޯދައިދިނުމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ކުރަމުންދާ މަސައްކަތުގެ ނަތީޖާއެއްގެ ގޮތުން، ފާއިތުވި 52 ހަފްތާގެ ތެރޭގައި 50 ކުއްޖަކަށް އާއިލީ ވެއްޓެއް ހޯދައިދެވިފައިވާ ކަމަށް އެ ވުޒާރާއިން ހާމަކޮށްފިއެވެ.
ވުޒާރާއިން ބުނާ ގޮތުގައި، ދައުލަތުގެ ބެލުމުގެ ދަށަށް ގެނެވޭ ކުދިންނަށް ދުރު ރާސްތާއަކަށް ބަލައި، އެ ކުދިންނަށް ބޭނުންވާ އަޅާލުމާއި ރައްކާތެރިކަން ފޯރުކޮށްދިނުމަށް ޚާއްޞަ އިސްކަމެއް ދެވިފައިވެއެވެ. މި މަސައްކަތުގައި، ޢާއިލާއަކީ މުޖުތަމަޢުގެ އެންމެ އަސާސީ އިޖުތިމާޢީ ބައިކަމަށް ބަލައި، އެއީ ކުދިންގެ ރައްކާތެރިކަމަށާއި، ދުޅަހެޔޮކަމަށާއި، ހެދިބޮޑުވުމަށް އެންމެ އެކަށީގެންވާ ޠަބީޢީ މާޙައުލުކަމަށް ދެކި، އެ ކުދިން އަނބުރާ އާއިލާއަށް ފޮނުވުމަށް ޚާއްޞަ އިސްކަމެއް ދެވިފައިވެއެވެ.
ވުޒާރާއިން އިތުރަށް ހާމަކުރި ގޮތުގައި، 2023 ވަނަ އަހަރުގެ ނޮވެމްބަރު 17 އިން ފެށިގެން މިއަދާ ހަމައަށް، ދައުލަތުގެ ބެލުމުގެ ދަށަށް ގެނެވިފައިވާ ކުދިންގެ ތެރެއިން 50 ކުއްޖަކަށް ޢާއިލީ ވެއްޓަކަށް ރުޖޫޢަވެ ދިރިއުޅުމުގެ ފުރުޞަތު ފަހިކޮށްދެވިފައިވެއެވެ. އަދި މި ވަގުތު 25 އިތުރު ކުއްޖަކަށް މި ފުރުޞަތު ގާއިމްކޮށްދިނުމުގެ މަސައްކަތް ދަނީ ކުރެވެމުންނެވެ.
މީގެ އިތުރުން، ޢާއިލާއަށް އަނބުރާ ފޮނުވެން ނެތް ހާލަތްތަކުގައި ފޮސްޓަރ ނިޒާމުގެ ތެރެއިން ކުދިން ފޮސްޓަރކުރެވޭނެ ނިޒާމެއް ގާއިމުކުރެވިފައިވާ ކަމަށް ވުޒާރާއިން ވިދާޅުވިއެވެ. މި ގޮތުން، ވަގުތީ ފޮސްޓަރިންގ ދަށުން ކުދިން ފޮސްޓަރކުރުމުގެ އުސޫލުތައް ކަނޑައެޅި، ވަގުތީ ހާލަތެއް މެދުވެރިވެގެން ދައުލަތުގެ ބެލުމުގެދަށަށް ނެގޭ ކުދިންނަށް އެކުދިން ޢާއިލާއަށް އަނބުރާ ރުޖޫއަވެންދެން ޢާއިލީ މާހައުލެއް ހޯދައިދިނުމުގެ ފުރުޞަތު ފަހިވެފައިވެއެވެ.
ވުޒާރާއިން އިތުރަށް ބުނާ ގޮތުގައި، ފޮސްޓަރިން ނިޒާމާ ގުޅޭ ގޮތުން ހޭލުންތެރިކުރުމުގެ ގޮތުން މުޖުތަމަޢުއަށާއި ދައުލަތުގެ މުއައްސަސާތަކަށް މަޢުލޫމާތު ސެޝަންތައް ބޭއްވިފައިވެއެވެ. މި ގޮތުން، ދަޢުލަތުގެ މުއައްސަސާތަކަށް ހިންގުނު 8 މަޢުލޫމާތު ސެޝަންގައި 260 ބައިވެރިން ބައިވެރިވެފައިވާ ކަމަށް ވުޒާރާއިން ހާމަކުރިއެވެ.
