މާލެ މަސްމާރުކޭޓު ސަރަހައްދުގައި އަޅާފައިވާ މަސްބޯޓުތަށް ބަލައި ފާސްކޮށް 39 މީހަކު އިމިގްރޭޝަންގެ ބަންދަށް ގެންގޮސްފިއެވެ.
މި ކަމާގުޅިގެން އިިމިގްރޭޝަންގެ ކޮންޓްރޯލާ ޖެނެރަލް މުހައްމަދު ޝަމްއާން ވަހީދު ވަނީ އެކްސްގައި ޕޯސްޓެއް ކުރައްވާފައެވެ. އެ ޕޯސްޓްގައި ޝަމްއާން ވިދާޅުވީ މަސް މާރުކޭޓު ސަރަހައްދުގައި ބިދޭސީން ވިޔަފާރިކޮށް ކޮންޓްރޯލް ކުރަމުންދިޔަ މަސް ބޯޓުތަކާއި ގުޅިގެން ގިނަ ބަޔަކު ކަންބޮޑުވުން ފާޅުކޮށްފައިވާ ކަމަށެވެ.
މީގެއިތުރުން އިއްޔެގެ ވަގުތެއްގައި ޓާސްކު ފޯސްއިން އެ ސަރަހައްދުގައި އަޅާފައިވާ މަސް ބޯޓުތައް ބަލައި ފާސްކޮށްފައިވާ ކަމަށާއި 39 މީހަކު އިމިގްރޭޝަންގެ ބަންދަށް ގެންގޮސްފައިވާ ކަމަށް ޝަމްއާން ވަނީ ވިދާޅުވެފައެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންފަހުން މިހާތަނަށް، ގަވައިދާ ހިލާފަށް އުޅެމުންދިޔަ 5012 ބިދޭސީން ފޮނުވާލާފައި ވާކަމުގައި ރައީސް ވަނީ ވިދާޅުވެފައެވެ. މިހާތަނަށް 5012 ބިދޭސީން ފޮނުވާލެވިފާކަން ހާމަކުރައްވަމުން ރައީސް ވިދާޅުވެފައި ވަނީ މިއީ ފާއިތުވި 3 އަހަރަށް ބަލާއިރުވެސް ގަވައިދާ ހިލާފަށް އުޅެމުން ދިޔަ ބިދޭސީން ބޭރުކުރެވިފައި ނުވާ މިންވަރެއް ކަމުގެވެ.
