އެމެރިކާއާއި އިޒްރޭލުގެ އުޅުމާއި ސުލޫކުގައި އެއްގޮތް ކަންތައްތަކެއް ފެނޭ ހެއްޔެވެ؟
މިސުއާލު އުފެދުނީ، އދގެ އާންމު މަޖިލީހުގައި ޣައްޒާގެ އިންސާނީ ކާރިސާއާއި ހަނގުރާމައިގެ ޖަރީމާތަކުގެ ފަސްމަންޒަރުގައި ހަމަލަތައް ހުޢްޓާލުމަށް ގޮވާލި ގަރާރަށް އެމެރިކާއިން ވީޓޯގެ ބާރު ބޭނުން ކުރުމުން ޒަޔަނިސްޓު ޓެރަރިސްޓުންނަށް ލިބުނު ހިތްވަރުގައި ހިންގި ދެ ގަތުލުއާންމަށް ބަލާފައެވެ.
އިޒްރޭލުގެ ކުލީ ހަނގުރާމައަށް ހަތިޔާރު ސަޕްލައި ނުކުރުމަށް އެދި އެމެރކިކާގެ ގާނޫނު ހަދާ މަޖިލީހުގެ މަތިގެއަށް ހުށަހެޅި ގަރާރުވެސް ވަނީ ޒަޔަނިސްޓް ފައިސާގެ ނުފުޒުން އިއްޔެ ބޭރުކޮށްލާފައެވެ.
އެމެރިކާއިން ބުނީ ފަލަސްޠީނު މީހުންގެ މެހުމާންދާރީގައި ތިބި ހަނގުރާމައިގެ އަސީރުން މިނިވަން ކުރުމަށް ގޮވާލާ ވާހަކަ ނެތުމުން އެ ގަރާރު ވީޓޯ ކުރީ ކަމަށެވެ. އެމެރިކާއިން ކުރީކީ، އައު ކަމެއް ނޫނެވެ.
ހަނގުރާމައިގެ އަސީރުން ހިފަހައްޓާފައި ވަނީ ފަލސްޠީނުން އެކަންޏެއް ނޫނެވެ. އިޒްރޭލުން ވެސް ވަނީ މާގިނަ އަދަދަކަށް ފަލަސްޠީނުގެ އަންހެނުންނާއި ކުޑަކުދިންނާއި މުސްކުޅިންނާއި ބަލިމީހުން ވަގަށް ނަގައި އިޒްރޭލުގެ ޖަލުތަކުގައި ބައިތިއްބާ ފައެވެ.
ފަލަސްޠީނު މީހުން، ދަތިހާލުގައިވެސް، ޔަހޫދީ އަސީރުންނަށް އަދާކުރަމުންދާ މެހުމާންދާރީއާ ޚިލާފަށް އިޒްރޭލުން ދަނީ ޖަލުގައި ފަލަސްޠީނު މީހުންނަށް އަނިޔާ ކުރަމުންނެވެ. އެކަމަކުވެސް ފަލަސްޠީނު މީހުންގެ އަޒުމު ބަލިކޮށެއް ނުލެވެއެވެ.
އިޒްރޭލުގެ ގާނޫނު ހަދާ މަޖިލީހުގައި ޔަހޫދުންގެ ޕްރިޒަންސް ޑިޕާޓްމެންޓްގެ ވެރިޔާ ބަޖެޓު އިތުރުކޮށް ދިނުމަށް އެދި ވާހަކަ ދައްކަމުން އިއްޔެ ބުނެފައި ވަނީ، ޖަލުތައް ފުރެންދެން ފަލަސްޠީނު މީހުން ބަންދުކޮށްފައިވާއިރު އެމީހުން ދަނީ ޖަލު ގާޑުންނަށް އިންޒާރު ދެމުން ކަމަށެވެ.
"ބޭރުގައި ކަލޭމެން ޔަހޫދުން ހަނގުރާމަ ކުރަމުންދާއިރު އަހަރަމެން ޖަލުގެ އެތެރޭގައި ތިބެގެން ކަލޭމެންނާ ހަނގުރާމަ ކުރަމުންގެންދާނެ" ކަމަށް ބުނެ ފަލަސްޠީނު އަސީރުން ޖަލު ގާޑުންނަށް ބިރު ދައްކާ ކަމަށް އޭނާ ކިޔައި ދިނެވެ.
ޔަހޫދުން ޖަލު ބަލަހައްޓަން ބޭނުންވާ ބަޖެޓު އިތުރު ކޮށްދޭން ޖެހޭނެ ކަމަށާއި އޭނާގެ މުވައްޒަފުން މަސައްކަތް ކުރަނީ ދަތިހާލެއްގައި ކަމަށް ބުންޏެވެ.
އިޒްރޭލުގެ ޖަލުތައް ބެލެހެއްޓުމަކީ އޭގެ ޒާތުގައި ދަތިކަމެކެވެ. މީހުން ނުލިބުމުގެ ސަބަބުން ފިރިހެނުންގެ ޖަލުތައް ބަލަހައްޓަން އަންހެން ގާޑުންވެސް ބޭނުން ކުރަން ޖެހެއެވެ.
މިދިޔަ އަހަރުވެސް ފެންމަތިވި ފަޟީހަތަކީ، ޖަލު ބަލަހައްޓާ އަންހެން ގާޑުން ފަލަސްޠީނުގެ ފިރިހެން އަސީރުންނަށް ފައިސާއާއި އިނާޔަތްތައް ދީގެން އެމީހުން ލައްވައި އެދުން ފުއްދުމަށް މަސައްކަތް ކުރަމުންދިޔަ ހާދިސާތަކެކެވެ.
އިޒްރޭލަށް ފައިސާ ދީގެން ކުލީ ހަނގުރާމައެއް ކުރުވަމުން ގެންދާ، އެމެރިކާއިން ވީޓޯގެ ބޭނުން ކުރުމުން، އިޒްރޭލުން ވަނީ ރޭ، ބިރަކާއި ނުލައި ދެ ގަތުލުއާންމެއް ހިންގާފައެވެ.
ޓެރަރިސްޓު ޒަޔަނިސްޓުންގެ ނަސްލު ނައްތާލުމުގައި 88 އަށް ވުރެ ގިނަ މީހުން ރޭ ޝަހީދު ކޮށްފައި ވެއެވެ.
ޒަޔަނިސްޓު ޓެރަރިސްޓް ޔަހޫދުންނަށް އެމެރިކާއިން ދޭ ހަތިޔާރު ބޭނުންކޮށްގެން މި ދެ ގަތުލުއާންމު ހިންގާފައި ވަނީ ޣައްޒާގެ ބެއިތު ލާހިޔާއާއި ޝެއިޚް ރަޟުވާން އަވަށުގައެވެ.
ޣައްޒާގެ އުތުރުގައި ބައިތު ލާހިއާގައި، ހުންނަ ޒަޔަނިސްޓު ޓެރަރިސްޓުން ބޮން އަޅައި ސުންނާފަތިކޮށްފައިވާ ކަމާލް ޢަދުވާން ހޮސްޕިޓަލް ކައިރީގައި ދިރިއުޅޭ މީހުންނަށް ބޮން އެޅުމުން 66 މީހުން ޝަހީދުވިއެވެ.
ޝެއިޚް ރަޟުވާން އަވަށަށް ބޮންއެޅުމުން އަލްއަރޫޤީ އާއިލާގެ ގެއިން 22 މީހުން ޝަހީދުވިއެވެ. އޭގެ ތެރޭގައި 10 ކުޑަ ކުދިން ހިމެނެއެވެ.
އެމެރިކާއާއި އިޒްރޭލު އެއްގޮތް ވަނީ، އެމެރިކާއަކީ ވެސް އިޒްރޭލާ އެއްފަދައިން، އެހެން ބައެއްގެ ބިންތައް ހިފައިގެން ގަދަކަމުން އެތާގައި މީހުން އިންދައި ވަޒަންވެރިކޮށްފައިވާ ތަނެކެވެ.
ދުނިޔޭގެ އެންމެ ބޮޑު ކޮންސެންޓްރޭޝަން ކޭމްޕް ޣައްޒާގައި، ޒަޔަނިސްޓް ޓެރަރިސްޓު ޔަހޫދުން ހިންގާ ގޮތަށް އެމެރިކާއިންވެސް އެފަސްގަނޑުގެ އަސްލު ވަޒަންވެރިން ކަނޑައަޅާފައިވާ "ރިޒަވޭޝަން" ނަމަކަށް ކިޔާ ސަރަހައްދުތަކުގައި ބަންދުކޮށްގެން ގެންގުޅެއެވެ.
