ރާއްޖޭގެ ކަނޑުގެ ސަރަހައްދުގައި ޤަވާއިދާ ޚިލާފަށް ހަރަކާތްތެރިވަމުންދިޔަ ސްރީލަންކާގެ ބޯޓަކުން ބައި ޓަނެއްހާ މަސްތުވާތަކެތި އަތުލައިގަނެވިއްޖެއެވެ. މި ބޯޓު އަތުލައިގަތީ ހޮނިހިރު ދުވަހުގެ ރޭ ދަންވަރު 12:45 ހާއިރު މަކުނުދޫ ބޭރުން މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިންނެވެ.
ކޮމިޝަނަރ އޮފް ޕޮލިސް އަލީ ޝުޖާޢު ވިދާޅުވިގޮތުގައި، ބޯޓު ހުއްޓުވުމަށްފަހު ކުޅުދުއްފުށި ސިޓީގެ ބަނދަރަށް ގެންގޮސްންގޮސް، އާދީއްތަ ދުވަހުގެ ހެނދުނު ކުޅުދުއްފުށީ ސިޓީގެ ފުލުހުންނާއި އެމްއެންޑީއެފް ކޯސްޓު ގާޑުން ބޯޓު ބަލައި ފާސްކޮށްފައިވެއެވެ. ބަލައި ފާސްކުރުމުގައި ޖުމްލަ 468.6 ކިލޯގްރާމުގެ މަސްތުވާތަކެތި ފެނުނެވެ. މީގެ ތެރޭގައި 344 ކިލޯގްރާމުގެ ކްރިސްޓަލް މެތާއި 124.6 ކިލޯގްރާމުގެ ކޮކެއިން ހިމެނެއެވެ.
"އަށެންޕުތަ" ނަމަކަށް ކިޔާ މި ބޯޓު އަތުލައިގަތީ އެމްއެންޑީއެފަށް ލިބުނު މަޢުލޫމާތަކާ ގުޅިގެން ޓްރެކް ކުރަމުން ގޮސްކަމަށް ކޮމިޝަނަރ ވިދާޅުވިއެވެ. އަދި މިއީ އެކި އިދާރާތައް ގުޅިގެން ހިންގުނު ކާމިޔާބު އޮޕަރޭޝަނެއްކަމަށްވެސް އެމަނިކުފާނު ފާހަގަކުރެއްވިއެވެ. ބޯޓުގައި ތިބީ ސްރީލަންކާގެ 5 ފިރިހެން ފަޅުވެރިންނެވެ.
ރައީސުލްޖުމްހޫރިއްޔާ މުޙައްމަދު މުޢިއްޒު އެކްސް ގައި ޕޯސްޓެއް ކުރައްވައި މި މައްސަލައާ ގުޅޭގޮތުން ވިދާޅުވެފައިވަނީ، އަތުލައިގަނެވުނު މަސްތުވާތަކެތީގެ މަގުމަތީ އަގަކީ ގާތްގަނޑަކަށް އެއް ބިލިއަން ދިވެހި ރުފިޔާ ކަމަށެވެ. އަދި ދިވެހިރާއްޖެ މަސްތުވާތަކެތިން އެއްކޮށް ސަލާމަތްކުރުމަކީ ސަރުކާރުން އެންމެ އިސްކަންދޭ އެއްކަންތައް ކަމަށާއި، ޤާނޫނު ތަންފީޒުކުރާ މުއައްސަސާތަކުން މިދާއިރާއިން ކުރަމުންގެންދާ ބުރަ މަސައްކަތް ފާހަގަކޮށް އެފަރާތްތަކަށް ޝުކުރު ދަންނަވާކަމަށްވެސް ރައީސް ވިދާޅުވެފައިވެއެވެ.
