ހުރަވީ ދުވަހަކީ ޤައުމަށް އަމާނާތްތެރިވުމާއި ޤައުމަށް ޚިޔާނާތްތެރިވުމުގެ މިސާލު ފެންނަ ދުވަހެއްކަމަށާއި، މިއަދު ހުރަވީ ދުވަސް ފާހަގަ ކުރާ މި މުނާސަބަތުގައި އަޅުގަނޑުމެން އަގުހުރި ފިލާވަޅު ލިބިގަންނަންވީ ދޮންބަންޑާރައިންގެ ރިވެތި އަޚްލާޤުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިއަދު ފާހަގަކުރާ ހުރަވީ ދުވަހުގެ ތަހުނިޔާ ފޮނުއްވައި ސޯޝަލް މީޑިއާގައި ކުރެއްވި ޕޯސްޓެއްގައެވެ.
ހުރަވީ ދުވަސް ނިސްބަތްވަނީ ހުރާ ދޮން ޙަސަންމަނިކުފާނު ނުވަތަ ދޮންބަންޑާރައިންނަށެވެ. މިދުވަސް ނިސްބަތްވަނީ ހިޖުރީ ގޮތުން 1166 ވަނަ އަހަރުގެ ޖުމާދިލްއާޚިރާ މަހުގެ ތިންވަނަ ދުވަހު، ދޮންބަންޑާރައިން އިސްވެހުންނަވައިގެން މާލާބާރީން ނުވަތަ ހޮޅީންގެ ކިބައިން ރާއްޖޭގެ މިނިވަންކަން ސަލާމަތް ކުރެއްވި ހާދިސާއަށެވެ.
"ހުރަވީ ދުވަހަކީ ޤައުމަށް އަމާނާތްތެރިވުމާއި ޤައުމަށް ހިޔާނާތްތެރިވުމުގެ މިސާލު ވެސް ފެންނަ ދުވަހެކެވެ. ދުވަހުގެ ބަތަލް ދޮންބަންޑާރައިންގެ މަތިވެރި ޖިހާދާއި ރީތި އަހްލާގަކީ މިއަދު ލިބިގަންނަންވި އެންމެ އަގުހުރި ފިލާވަޅެވެ" ރައީސް، "އެކްސް" ގައި ކުރެއްވި ޕޯސްޓުގައި ވިދާޅުވިއެވެ.
