ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާއިން އިންތިޒާމުކޮށްގެން ބ. ދަރަވަންދޫގައި ބޭއްވުނު އިޖުތިމާއީ ގޮތުން މުޖުތަމައު ބާރުވެރިކުރުމުގެ ވޯކްޝޮޕް މިއަދު ކާމިޔާބުކަމާއެކު ނިމުމަކަށް އައިސްފިއެވެ.
މި މަހުގެ 10 ވަނަ ދުވަހުން ފެށިގެން 13 ވަނަ ދުވަހާ ހަމައަށް ކުރިއަށް ގެންދެވުނު މި ވޯކްޝޮޕަކީ ދަރަވަންދޫގެ މަދަނީ ޖަމްއިއްޔާތަކާއި، ކައުންސިލް، ޑަބްލިޔުޑީސީ އަދި އެކިއެކި މުއައްސަސާތަކަށް އަމާޒުކޮށްގެން ބޭއްވުނު ވޯކްޝޮޕެކެވެ. މި ވޯކްޝޮޕްގައި ޖުމްލަ 40 ފަރާތަކުން ބައިވެރިވެފައިވާއިރު، އޭގެ ތެރެއިން 23 ބައިވެރިން ވަނީ ވޯކްޝޮޕްޯކްޝޮޕް ފުރިހަމަކޮށްފައެވެ.
ޔޫތު މިނިސްޓްރީގެ އިސްވެރިއެއް ވިދާޅުވި ގޮތުގައި މި ޕްރޮގްރާމުގެ މައިގަނޑު މަޤްޞަދަކީ އިޖްތިމާއީ ގޮތުން މުޖުތަމައު ބާރުވެރި ކުރުވުމުގެ ގޮތުން މަދަނީ ޖަމްއިއްޔާތަކުން ރަށްފެންވަރުގައި ކުރިއަށް ގެންދާ ޕްރޮގްރާމްތަކާއި ހަރަކާތްތައް ހަރުދަނާކުރުމެވެ. މީގެ އިތުރުން، ޖަމްއިއްޔާތަކުގެ އިދާރީ ހިންގުން ހަރުދަނާ ކުރުމާއި، މަދަނީ ޖަމްއިއްޔާތަކުގެ ގަވާއިދާއި ގާނޫނަށް އަހުލުވެރިކުރުމާއި، މުޖުތަމައު އެއްބައިވަންތަ ކުރުމާ ގުޅޭ މަޢުލޫމާތު ފޯރުކޮށްދިނުމަކީވެސް މި ވޯކްޝޮޕްގެ މުހިންމު ބައިތަކެވެ.
