އޮޕަރޭޝަން "ކުރަނގި"ގެ ދަށުން މިހާތަނަށް 18،000 އަށް ވުރެ ގިނަ ބިދޭސީންގެ ބަޔޮމެޓްރިކް ޑޭޓާ މިހާތަނަށް ނަގާފައިވާނެ ކަމަށް މޯލްޑިވްސް އިމިގްރޭޝަނުން ހާމަ ކުރައްވައިފިއެވެ.
ހޯމް މިނިސްޓްރީގެ ސްޓޭޓް މިނިސްޓަރ އަބްދުލް މަޖީދު ވިދާޅުވީ "އޮޕަރޭޝަން ކުރަނގި" ފެށި ފަހުން މިހާތަނަށް 18،919 ބިދޭސީންގެ ބަޔޮމެޓްރިކް ޑޭޓާ އެއްކޮށްފައިވާ ކަމަށެވެ. ކުރަނގި އޮޕަރޭޝަން މި ވަގުތު 194 ރަށެއްގައި ކުރިއަށް ގެންދާއިރު، 50 ރަށެއްގައި އެ މަސައްކަތް އެއްކޮށް ނިމިފައިވާ ކަމަށް އޭނާ ވިދާޅުވި އެވެ.
މި އަހަރުގެ މެއި މަހު ފެށި "ކުރަނގި އޮޕަރޭޝަން" ކުރިއަށް ގެންދިޔުމަށް ހަމަޖެހިފައިވަނީ 3 އަހަރުގެ މުއްދަތަކަށެވެ. މި އޮޕަރޭޝަނުގެ މަޤްސަދަކީ ރާއްޖޭގައި އުޅެމުންދާ ބިދޭސީންގެ މައުލޫމާތު އެއްކޮށް، ޤަވައިދާ ހިލާފަށް އުޅޭ ބިދޭސީންގެ ކަންކަން ހަމަ މަގަށް އެޅުވުމެވެ.
