ރާއްޖޭގައި ވޭޕް ބޭނުންކުރި 4 މީހަކު ޖޫރިމަނާކޮށްފިއެވެ.
ވޭޕް ބޭނުންކުރި 4 މީހަކު ޖޫރިމަނާ ކުރިކަން ފުލުހުން ހާމަކުރެއްވީ "ސަންގު" އަށް އެސިސްޓަންޓް ކޮމިޝަނާ އޮފް ޕޮލިސް އަހުމަދު ޝިފާން ދެއްވި ބަސްދީގަތުމެއްގައެވެ.
ދުންފަތް ކޮންޓްރޯލް ކުރުމާއި ބެހޭ ގާނޫނަށް އިސްލާހު ގެނެސް، ވޭޕް ބޭނުންކޮށްފިނަމަ ނުވަތަ ވިއްކައިފިނަމަ ނުވަތަ ހިލޭ ބަހައިފިނަމަ ޖޫރިމަނާ ކުރާ ގޮތަށް ގާނޫނަށް ގެނައި ބަދަލަށް އަމަލު ކުރަން ފެށީ މީގެ 3 ދުވަސް ކުރިންނެވެ.
ދުންފަތް ކޮންޓްރޯލުކުރުމާބެހޭ ޤާނޫނުގައިވާ ގޮތުން ވޭޕް ބޭނުން ކޮށްފިނަމަ 5000 ރުފިޔާއިން ޖޫރިމަނާ ކުރެވޭނެއެވެ. އަދި އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އާލާތްތައް ވިއްކުން ނުވަތަ ހިލޭ ބަހައިފިނަމަ 20،000 ރުފިޔާއިން ޖުރިމަނާކޮށް، ވިއްކި ކޮންމެ ވޭޕަކަށް 10،000 ރުފިޔާ ދައްކަން ޖެހޭނެ އެވެ.
ފުލުހުން ބުނެފައި ވަނީ ވޭޕާއި ގުޅުން ހުރި ޖޫރިމަނާގެ ތަފްސީލް ޖޫރިމަނާ ކުރެވޭ މީހާއަށް ފޮނުވާނީ އެމީހެއްގެ މޮބައިލް ފޯނަށް ފޮނުވާ މެސެޖަކުންނެވެ. މި މެސެޖުގައި ހިމަނާފައިވާ ވާރުޕޭ ލިންކު މެދުވެރިކޮށް ފައިސާ ދައްކަން ޖެހޭނެކަމަށް ފުލުހުން ބުންޏެވެ.
