ދެކުނު ކޮރެއާގެ "ސަސްޕެންޑް" ކޮށްފައިވާ ރައީސް އަޒުލުކުރުމަށް މަސައްކަތް ކުރަމުންދާއިރު އޭނާގެ މަސްއޫލިއްޔަތާ ހަވާލުވެ ވަޑައިގެން ހުންނެވި، ވަގުތީ ރައީސް މަގާމުން އަޒުލު ކުރުމަށްވެސް އިދިކޮޅު ޕާޓީން މަސައްކަތް ފަށައިފިއެވެ.
ރައީސް ޔޫން ސުކް ޔެއޯލް އަޒު ކުރުމަށް ޕާލަމެންޓުން ނިންމާފައި ވަނީ އޭނާ އިމަޖެންސީ ހިންގެވުމާ ގުޅިގެންނެވެ. ރައީސް އަޒުލު ކުރަން ނިންމުމުން، އެ މައްސަލަ ދެން ބަލަން ޖެހޭ ދުސްތޫރީ ކޯޓުގައި 9 ފަނޑިޔާރުން ތިބެން ޖެހެއެވެ. ނަމަވެސް މި ވަގުތު ތިއްބެވީ 6 ފަނޑިޔާރުންނެވެ.
ކުއްލިއަކަށް އަވަސް އަރުވާލައިގެން ފަނޑިޔާރުން އައްޔަން ކުރުމަށް ޕާލަމެންޓްގައި ބަހުސްކުރުމަށް ފަހު މައި އިދިކޮޅު ޑިމޮކްރެޓިކް ޕާޓީ އޮފް ކޮރެއާ (ޑީޕީކޭ) ން ވަނީ ދެ ފަނޑިޔާރުންގެ ނަން ދީފައެވެ. އަދި ވެރިކަން ކުރާ ޕާޓީން ވަނީ އެއް ފަނޑިޔާރުގެ ނަން ދީފައެވެ.
މި 3 ނަން ޕާލަމެންޓުން ފާސްކޮށްގެން، ވަގުތީ ރައީސަށް ފޮނުވުމުން ވަގުތީ ރައީސް ހޭން ޑަސް ސޫ ވިދާޅުވަނީ ދެ ޕާޓީން ވަކިވަކިން ފާސްކޮށްފައިވާ ފަނޑިޔާރުން މަގާމަށް އައްޔަން ކުރުމަކީ އޭނާއަށް ކުރެއްވޭނެ ކަމެއް ނޫން ކަމަށެވެ. އަދި ގާނޫނުއަސާސީގައި އެކަމަކީ ރައީސް ގެ ޒިންމާއެއް އަކަށް ބުނެފައިވާ ކަމެކެވެ. އަދި އޭނާއަކީ ވަގުތީ ރައީސްގެ މަގާމުގައި ހުންނެވި މީހެއް ކަމުން ޕާލަމެންޓުން އެ މައްސަލާގައި ވަކި ގޮތަކަށް ނުނިންމަނީނަމަ، އޭނާއަކަށް އެ ފަނޑިޔާރުން މަގާމަކަށް އައްޔަނެއް ނުކުރެވޭނެ ކަމަށެވެ.
ވަގުތީ ރައީސްގެ މި ވާހަކައަށް ފަހު އިދިކޮޅުން ވަނީ އޭނާ އަޒުލު ކުރުމަށް ނިންމައި މާދަމާގެ ޖަލްސާއަށް މައްސަލަ ހުށަހަޅަން ނިންމާފައެވެ.
