އިންޑޮނޭޝިއާ ކުދިންގެ މެދުގައި އާންމުވެފައިވާ ކާޑު ބަލިން ޒުވާން ޖީލު ސަލާމަތް ކުރުމަކީ، އިންޑޮނޭޝިއާ ރައީސް ޕްރަބޯވޯ ސުބިއަންޓޯގެ އިންތިޚާބީ ވައުދެކެވެ.
މިއަދުން ފެށިގެން ސްކޫލުގައި ކުދިންނަށް ކާންދޭ ގޮތަށް އިންޑޮނޭޝިއާ ސަރުކާރުން ނިންމައި އެކަން ފަށައިފިއެވެ.
ކުދިންނަށް ހިލޭ ކާންދޭ ޕްރޮގްރާމަށް ވަނީ 4.3 ބިލިއަން އެމެރިކާ ޑޮލަރުގެ ބަޖެޓެއް ކަނޑައަޅާފައެވެ.
ޕްރަބޯވޯ ވަނީ ދިހަ މިލިއަން ސްކޫލް ކުދިންނާއި މާބަނޑު އަންހެނުންނަށް ހިލޭ ނިއުޓްރިޝަނަލް ކެއުން ފޯރުކޮށްދިނުމަށް ވައުދުވެވަޑައިގެންފައެވެ.
ކާނާ ފޯރިވައި ދިނުމަށް، ތިންވަނަ ފަރާތެއްގެ ކެޓަރިންގެ ޚިދުމަތް ހޯދުމަށް ނިންމާފައި ވެއެވެ. އެކަމަށް، 190 ބަދިގެ ތައްޔާރު ކޮށްފައި ވެއެވެ. މި ބަދިގެތަކުން ދަރިވަރުންނަށް ބަތާއި، ޕްރޮޓީން ހިމެނޭ ކާނާއާއި، ތަރުކާރީ އަދި މޭވާގެ ބާވަތްތައް ފޯރުވައިދޭނެއެވެ.
އިންޑޮނޭޝިއާ ސަރުކާރުން ކެއުމަކަށް ބަޖެޓުކޮށްފައި ވަނީ 10،000 ރުޕީޔާގެ ރޭޓުންނެވެ.
މި ޕްރޮގްރާމްގެ ދަށުން 2029 ވަނަ އަހަރުގެ ނިޔަލަށް ގާތްގަނޑަކަށް 83 މިލިއަން މީހުންނަށް ކެއުން ފޯރުކޮށްދިނުމަށް ވަނީ ހަމަޖެހިފައެވެ.
