އެމެރިކާއިން ދީފައިވާ ހަތިޔާރު ބޭނުންކޮށްގެން ހަނގުރާމައިގެ ޖަރީމާތައް ހިންގާ، ދުނިޔޭގެ ނިޒާމުން އެކަހެރިކޮށްފައިވާ ޒަޔަނިސްޓުންނަށް އަޤްޞާ ޠޫފާނުން ލިބިފައިވާ އިގްތިސާދީ ގެއްލުން 68 ބިލިއަން ޑޮލަރަށް އަރައެވެ.
އިޒްރޭލުގެ ވިޔަފާރި ނޫހެއް ކަމަށްވާ ކެލްކަލިސްޓް ނޫހުން ހުކުރު ދުވަހު އާންމުކުރި ހިސާބުތަކުގައި، ބޭނުން ކޮށްފައި ވަނީ ބޭންކް އޮފް އިޒްރޭލުން ކޮށްފައިވާ އަންދާސާތަކެވެ. ބޭންކު އޮފް އިޒްރޭލުން ބުނަނީ، އަސްކަރީ ޚަރަދާއި މަދަނީ ހަރަދާއި އާމްދަނީގެ ގެއްލުމަށް ބަލާއިރު، 68 ބިލިއަން ޑޮލަރަށް ގެއްލުން ހިސާބު ކުރެވޭ ކަމަށެވެ. ނަމަވެސް އޭގެ ތެރޭގައި މާލީ ދާއިރާއަށް ލިބިފައިވާ ގެއްލުން ނުހިމެނޭ ކަމަށެވެ.
އެ ރިޕޯޓުގައި ބުނެފައި ވަނީ، އިޒްރޭލުގެ އިގްތިސާދަށް މި ކަމުން ދިމާވެފައި ވަނީ "ބޮޑު ބުރައެއް" ކަމަށެވެ. އަދި ހަނގުރާމައިގެ ނަތީޖާއާ މެދު ޝައްކު ކޮށް އެރިޕޯޓުގައި ބުނެފައި ވަނީ އެއީ "ނާކާމިޔާބީ" އެއް ކަމަށެވެ.
ނޫހުން ލަފާކޮށްފައިވާ ގޮތުގައި ކުރިއަށް އޮތް ދިހަ އަހަރު ތެރޭގައި އިސްރާއީލުގެ ދިފާއީ ބަޖެޓް އިތުރުކުރަން ޖެހޭ ކަމަށާއި އެކަމުން އިގްތިސާދަށް ނޭދެވޭ އަސަރުތަކެއް ދިގު މުއްދަތަށް ކުރާނެ ކަމަށެވެ.
އެ ނޫހުން ލަފާކޮށްފައި ވަނީ، އަންނަން އޮތް ދިހަ އަހަރު ތެރޭގައި ޒަޔަނިސްޓުންގެ ދިފާއީ މެޝިނަށް، އިތުރު 74 ބިލިއަން ޑޮލަރު ބޭނުންވާނެ ކަމަށެވެ.
7 އޮކްޓޯބަރު 2023 ގައި ޝަހީދު ކޮމާންޑަރު ޔަޙުޔާ ސިންވާރުގެ ލީޑަރޝިޕްގެ ދަށުން، އަޤްޞާ ޠޫފާންގައި ޒަޔަނިސްޓުން އާބާދުކޮށްފައިވާ ސަރަހައްދަށް ވަދެ ފަލަސްޠީނުން ވަނީ ޒަޔަނިސްޓުން ހިންގާ ދުނިޔޭގެ އެންމެ ބޮޑު ކޮންސެންޓްރޭޝަން ކޭމްޕް، ޣައްޒާގެ ހާލަތު ދުނިޔޭގެ ސަމާލުކަމަށް ގެނައުމުގައި ކާމިޔާބު ވެފައެވެ.
