އެންމެފަހުގެ އެލް ކްލެސިކޯ މެޗާ ހިލާފަށް މިރޭ ފެންނާނީ ތަފާތު މެޗެއްކަމަށް ރެއާލް މެޑްރިޑުގެ ކޯޗް ކާލޯ އަންޗެލޮއްޓީ ބުނެފިއެވެ.
އެލް ކްލެސިކޯގައި އެންމެފަހުން ބާސެލޯނާއާ ދެކޮޅަށް ކުޅެ، އަމިއްލަ ދަނޑުގައި ރެއާލްމެޑްރިޑް ބަލިވީ 4-0 ގެ ބޮޑު ތަފާތަކުންނެވެ. އަންޗެލޮއްޓީ ބުނީ އެ މެޗުގެ ފުރަތަމަ ހާފުގައި ރެއާލްއިން ވަރަށް ރަނގަޅަށް ކުޅުނު ކަމަށާއި ގޯސްތައް ހެދުނީ ދެވަނަ ހާފުގައި ކަމަށެވެ.
"އެމީހުން (ބާސެލޯނާ) އިން އެންމެފަހުގެ ކުރިމަތިލުގައި އަހަރެމެންގެ މައްޗަށް ކުރި ހޯދި. އަހަރެމެން އެމެޗުގައި ހިނގާދިޔަ ކަންކަން ވަރަށް ރަނގަޅަށް އެނަލައިޒްކުރިން. ފުރަތަމަ ހާފުގައި ވަރަށް ރަނގަޅު ކަންތައްތަކެއް އަހަރެމެންނަށް ކުރެވުނު. މިމެޗުގައި ބޭނުން ވަނީ އެކަންތައްތައް ތަކުރާރުކޮށް، ދެވަނަ ހާފުގައި މިސްޓޭކްތައް ނުހެދުން" އަންޗެލޮއްޓީ ބުންޏެވެ.
އަންޗެލޮއްޓީ އިތުރަށް ބުނީ ކިލިއަން އެމްބައްޕޭ އާއި ބެލިންގހަމް ފޯމުގައި ތިބުމަކީ މިރޭގެ ފައިނަަލަށް ނިކުންނައިރު އޭނާއަށް ލިބޭ ބޮޑު އިތުބާރެއް ކަމަށެވެ. "އެކަމަކު ހަމައެކަނި ލަނޑުޖަހަން އިސްކަންދީފިނަމަ ލަނޑު ލިބޭނެ. ތަށި ހޯދޭނީ ޑިފެންސިވް ވޯކްރޭޓް ރަނގަޅުކޮށްގެން" އަންޗެލޮއްޓީ ބުންޏެވެ.
އަންޗެލޮއްޓީއަކީ ރެއާލްގެ ކާމިޔާބު ކޯޗެކެވެ. ރެއާލްއާއެކު އޭނާ 2 ފަހަރު ޗެމްޕިއަންސް ލީގް ކުރުމުގެ އިތުރުން މިދިޔަ ސީޒަނުގައި ރެއާލްއިން ސްޕެނިޝް ލަލީގާ ކާމިޔާބު ކުރީވެސް އަންޗެލޮއްޓީގެ އިރުޝާދުގެ ދަށުންނެވެ.
މިރޭގެ ފައިނަލް ފަށާނީ ރާއްޖޭ ގަޑިން ދަންވަރު 12:00 ގައެވެ.
