ސޯޝަލް މީޑިޔާގެ ބައެއް ޕްލެޓުފޯމުތައް ބްލޮކުކުރުމަށް ސަރުކާރުން ވިސްނަމުންދާކަމަށް ބުނެ ފަތުރަމުންދާ ވާހަކަތަކަކީ ކަނޑައެޅިގެން ދޮގު ވާހަކަތަކެއް ކަމަށް ރައީސް އޮފީހުގެ ސްޕޯކްސްޕާސަން ހީނާ ވަލީދު ވިދާޅޫވެއްޖެއެވެ.
ހީނާ މިފަދައިން ވިދާޅުވީ މިއަދު އެކްސަގައި ކުރެއްވި ޕޯސްޓެއްގައެެވެ. މިގޮތުން ހީނާ ވަލީދު ވަނީ ސޯޝަލް މީޑިޔާގެ އެއްވެސް ޕްލެޓުފޯމެއް ބްލޮކުކުރުމަށް ސަރުކާރުން ނިންމާފައިނުވާ ކަމުގެ ޔަގީންކަން ދެއްވާފައެވެ. އަދި އަދި އެފަދަ ފިޔަވަޅެއް އެޅުމަށް ސަރުކާރުން މަޝްވަރާކޮށްފައިވެސް ނުވާ ކަމަށް ހީނާ ވިދާޅުވިއެވެ. މީގެއިތުރުން ހީނާ ވަނީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވިސްނުންފުޅަކީ ޤާނޫނުއަސާސީން ރައްޔިތުންނަށް ލިބިދީފައިވާ އަސާސީ ޙައްޤުތަކާއި މިނިވަންކަން، ޤާނޫނުއަސާސީގެ އިންތަކާއި ޙުދޫދުގެ ތެރޭގައި އެންމެ ފުޅާ ދާއިރާއެއްގައި ކުރިއަރުވައި ފޯރުކޮށްދިނުންކަން ފާޙަގަ ކުރައްވާފައެވެ.
ހަމައެހެންމެ، ސޯޝަލް މީޑިއާގައި ފެތުރެމުންދާ ވާހަކަތަކާއި ވިދިގެން، ހޯމް މިިނިސްޓަރ އަލީ އިހުސާން ވިދާޅުވީ އާންމުންގެ ހިޔާލުފާޅުކުރުމުގެ ހައްގަށް ލޮޅުންއަރާނެ ފަދަ އެއްވެސް ނިންމުމެއް ސަރުކާރުން ނުނިއްމާނެ ކަމަށެވެ. އަދި އާންމުންގެ މެދުގައި އޮޅުންއުފެދޭ ކަހަލަ މައުލޫމާތު ނުފެތުރުމަށްވެސް މިނިސްޓަރ ވަނީ އިލްތިމާސް ކުރައްވާަފައެވެ. މިފަދައިން މިނިސްޓަރ ވިދާޅުވީ ނޫސްވެރިއެއްގެ ސުވާލަށް ޖަވާބު ދެއްވަމުންނެވެ
