އާސަންދަ ސްކީމުގެ ދަށުން ތައިލެންޑާއި ޔުނައިޓަޑް އެރެބް އެމިރޭޓްސް (ޔޫ.އޭ.އީ) އަށް ބޭސްފަރުވާ ކުރަން ދިއުމަށް މިއަދުން ފެށިގެން ހުޅުވާލެވިފައިވާކަމަށް އާސަންދަ ކުންފުނިން ވިދާޅުވެއްޖެއެވެ.
އާސަންދައިން ނެރުނު ނޫސް ބަޔާނެއްގައި ވިދާޅުވީ، މި ދެ ޤައުމުގައި އާސަންދައިގެ ދަށުން ޚިދުމަތް ދިނުމަށް އެމްޕެނަލްވެފައިވާ ހޮސްޕިޓަލްތަކުން މިހާރު އާސަންދަ ސްކީމްގެ ޚިދުމަތް ލިބެން ފަށާފައިވާ ކަމަށެވެ. މި ޚިދުމަތް ދިނުމަށް ފޮނުވާނީ ހުސްނުވާ އާސަންދަ ސްކީމް ހިންގުމުގެ ގަވާއިދުގެ ދަށުން މިހާރުވެސް ރާއްޖެއިން ބޭރުގެ ހޮސްޕިޓަލްތަކުން ޚިދުމަތް ދިނުމަށް ޢަމަލުކުރާ ނިޒާމުގެ ތެރެއިންނެވެ.
އާސަންދައިން ވިދާޅުވެފައިވާ ގޮތުގައި، މި ޚިދުމަތް ފުޅާކުރުމާއެކު ފުރަތަމަ އިސްކަން ދޭނީ ދެ ބަޔަކަށެވެ. އެއީ:
- ކިޑްނީ ޓްރާންސްޕްލާންޓް ކުރުމަށް ބޭނުންވާ ބަލިމީހުންގެ ތެރެއިން "ފަސްޓް ޑިގްރީ ޑޯނަރ" އެއް (ޢާއިލާގެ ތެރެއިން ކިޑްނީ ޑޮނޭޓްކުރާނެ ފަރާތެއް) ނުލިބުމުގެ ސަބަބުން ކިޑްނީ ޓްރާންސްޕްލާންޓް ނުކުރެވި ތިބި ފަރާތްތައް.
- ރާއްޖެ، އިންޑިޔާ ނުވަތަ ސްރީލަންކާގެ މަރުކަޒެއް މެދުވެރިކޮށް، އެތައް ފަހަރެއްގެ މަތިން ފަރުވާދެވުނު ނަމަވެސް އެފަރާތެއްގެ ބަލި ޙާލަތަށް ކުރިއެރުމެއް ނުލިބި، ބަލި ތަޙައްމަލު ކުރަމުންދާ ފަރާތްތައް.
މި ޚިދުމަތަށް އެދި ހުށަހެޅޭނީ އާސަންދަ މޯބައިލް އެޕް، މައި އާސަންދަ ޕޯޓަލް، ހޮސްޕިޓަލުތަކުގެ ވިރަ ކައުންޓަރުތައް އަދި އާސަންދަ ފްރަންޓް އޮފީހުގެ ކައުންޓަރު މެދުވެރިކޮށެވެ.
ޔޫއޭއީ އާއި ތައިލެންޑް ފަދަ މަތީ ފަންތީގެ ސިއްހީ ހިދުމަތް ދޭ ގައުމުތަކުން ދިވެހިންނަށް ބޭސްކުރެވޭނެ ނިޒާމު ހަމަޖައްސައިދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވައުދުފުޅެކެވެ. މިގޮތުން އާސަންދަ ކުންފުނިން ވަނީ މިދިޔަ ޑިސެމްބަރު 10 ވަނަ ދުވަހު ދުބާއީގެ ބުރްޖީލް މެޑިކަލް ސިޓީ އާއި ބެންކޮކްގެ ވޯލްޑް މެޑިކަލް ހޮސްޕިޓަލް އަދި ބެންކޮކް ހޮސްޕިޓަލާ އެކު އެއްބަސްވުމެއްގައި ސޮއިކޮށްފައެވެ.
މި އައު އިންތިޒާމާއެކު، ރާއްޖޭގެ ހޮސްޕިޓަލްތަކާއި ކްލިނިކްތަކުގެ އިތުރުން އިންޑިއާ އަދި ސްރީލަންކާގެ ހޮސްޕިޓަލްތަކުން ލިބެމުންދިޔަ އާސަންދައިގެ ޚިދުމަތް މިހާރު ތައިލެންޑާއި ޔޫ.އޭ.އީ އިން ވެސް ލިބެން ފަށާފައިވެއެވެ. މިވަގުތު ޔޫއޭއީ އަދި ތައިލެންޑަށް އާސަންދަ ސްކީމުގެ ޚިދުމަތް ކުރިން ދެންނެވި ދެބަޔަށް އިސްކަންދީފައިވާނަމަވެސް، ކުރިޔަށް އޮތް ދުވަސްތަކުގައި އިތުރު ބައިތަކަށް ޚިދުމަތް ފުޅާކުރެވިގެންދާނެކަމަށް އާސަންދައިން ވިދާޅުވިއެވެ.
