ޝިންޖިއާންގައި މައިންބަފައިން ބަންދުކުރުމުން އުއިގޫރު ކުދިންގެ ޔަތީމުޚާނާތައް ހަދައި އެކުދިން އެތަންތާނގައި ގެންގުޅޭއިރު، އެފަދަ ޔަތީމުޚާނާތައް އިތުރު ވަމުން އަންނަ ކަމަށް ރޭޑިއޯ ފްރީ އޭޝިއާ އިން ބުނެ އެވެ.
ރޭޑިއޯ ފްރީ އޭޝިއާއިން ބުނަނީ އެންމެ ފުރަތަމަ ޔަތީމު ޚާނާތައް ފެށީ، 2017 ވަނަ އަހަރު އެވެ. އެއަށްފަހު ކޮންމެ އަހަރަކުން އެފަދަ ތަންތަން އިތުރުވާ ކަމަށެވެ.
މުސްލިމުން ބަންދުކޮށްގެން އިސްލާޙިއްޔާތަކުގައި ގެންގުޅޭ ކަމުގެ ތުހުމަތު ބައިނަލްއަގްވާމީ ފަރާތްތަކުން ޗައިނާއަށް ކުރެއެވެ. ނަމަވެސް ތަކުރާރުކޮށް ޗައިނާއިން ބުނެފައި ވަނީ އެއީ އަގު ވައްޓާލުމަށް ދައްކާ ވާހަކަތަކެއް ކަމަށެވެ.
ރޭޑިއޯ ފްރީ އޭޝިއާއިން ބުނަނީ، ލޯކަލް ޕޮލިސް އޮފިސަރުންނާއި ޓީޗަރުން ފޯރުކޮށްދޭ ހެކިތަކުން ކަށަވަރުވާ ގޮތުގައި މި ސްކޫލްތައް އަދިވެސް ހަރަކާތްތެރިވެ އިތުރު ވަމުން ދެއެވެ.
އަދި މިތަންތަން ހަދާފައި ވަނީ، ޔަރްކަންޑް، ކަޝްގަރު، އަކްސޫ، އަދި ހޯޓަން ފަދަ ސަރަހައްދުތަކުގައި ކަމަށްވެސް ބުނެފައި ވެއެވެ.
