ޑިމޮކްރެޓްސް ޕާޓީގެ ލީޑާޝިޕުން ހުސްވެފައިވާ ޕާޓީގެ އައު ރައީސް އަދި ފިރިހެން ނާއިބު ރައީސްގެ މަގާމުތަކަށް އައު ބޭފުޅުން ރޭ އައްޔަންކޮށްފިއެވެ. އެ ގޮތުން ޕާޓީގެ ރައީސްގެ މަގާމަށް އިމްތިޔާޒު ފަހުމީ (އިންތި) އަދި ފިރިހެން ނާއިބު ރައީސްގެ މަގާމަށް މުހައްމަދު ވަހީދު (ވައްޑެ) އިންތިހާބުވެފައިވާ ކަމަށް އެ ޕާޓީން ވަނީ އިއުލާނުކޮށްފައެވެ.
ޑިމޮކްރެޓްސްގެ ރައީސާއި ނައިބު ރައީސް ހޮވާފައި މިވަނީ، އެ ޕާޓީގެ ރައީސްކަމުގެ މަގާމުގައި ހުންނެވި ހަސަން ލަތީފް އަދި ނާއިބު ރައީސް ކަމުގެ މަގާމުގައި ހުންނެވި މުހައްމަދު ޝިފާޒް އިސްތިއުފާ ދެއްވައި ޕާޓީ ދޫކޮށް ވަޑައިގަތުމާއި ގުޅިގެންނެވެ. އެ ދެބޭފުޅުން ޕާޓީން ވަކިވުމާ ގުޅިގެން ހުސްވި މަގާމުތަކަށް ކުރިމަތިލުމުގެ ފުރުސަތު ހުޅުވާލުމުން ކުރިމަތިލެއްވީ އިމްތިޔާޒު އަދި ވަހީދު އެކަންޏެވެ.
ދާދިފަހަކުން ޑިމޮކްރެޓްސް ޕާޓީއިން ހަސަން ލަތީފާއި ޝިފާޒުގެ އިތުރުން، ޑިމޮކްރެޓްސްގެ ޕާލިމެންޓްރީ ގްރޫޕުގެ ލީޑަރުކަން ކުރެއްވި އަލީ އާޒިމާއި އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު ވެސް ވަނީ އެމްޑީޕީއަށް ސޮއިކުރައްވާފައެވެ. ޑިމޮކްރެޓްސްއިން ބުނެފައިވަނީ އެ ބޭފުޅުން ޕާޓީ ދޫކޮށް ދިޔަނަމަވެސް ޕާޓީއަށް ކުރިމަގު އެބައޮތްކަމަށެވެ.
.
