ޗައިނާގެ އާބާދީ އިތުރު ނުވެ ހުއްޓުމަކަށް އަތުވެދާނެ ކަމުގެ އިންޒާރު ދެން ފަށައިފިއެވެ. މިއާއެކު ޗައިނާގެ ސަރަހައްދުތަކުގައި އަންހެނުން ދަރިމައިވުމަށް ސަރުކާރުން ދަނީ އާދޭސް ކުރަމުންނެވެ. ނަމަވެސް މުސްލިމުންގެ ބައިބޯ ޝިންޖިއާން ގައި ސަރުކާރުން ބާރުއަޅަނީ، އަންހެނުންގެ ދަރިމައިވާ ނިސްބަތް މަދު ކުރުމަށެވެ.
ނިއުޔޯރކްޓައިމްސްގައި ރިޕޯޓްކޯށްފައިވާ ގޮތުން، ޝިންޖިއާންގެ އަންހެނުންގެ ރަހުމުގައި ދަރިމައިވުން ކޮންޓްރޯލް ކުރުމަށް ސަރުކާރުން އާލާތެއް ހަރުކުރަން މަސައްކަތް ކުރުމުން ގަލްބޭ ނޫރު އެދުނީ އޭނާ އެކަމުން އިސްތިސްނާ ކޮށްދިނުމަށެވެ. އޭނާ ބުނި ގޮތުން އޭނާ ވަނީ ފަންސާހުން މަތިވެފައެވެ. އަދި ސަރުކާރުގެ އެދުމަށް އޭނާ ހޯދާފައި ވަނީވެސް އެންމެ ދަރިއެކެވެ.
އެމީ ޝިން ލިޔުނު ރިޕޯޓްގައި ބުނެފައި ވަނީ އޭނާ ދެކޮޅު ހަދައިފިނަމަ، ފުލުހަށް ގެންދާނެ ކަމުގެ އިންޒާރު މިކަން ކުރަން އުޅުނު ފޫޅުމާމައިން އޭނާއަށް ދިނެވެ. އެކަމަށް އޭނާ ރުހިއްޖެއެވެ.
2017ގެ ތަޖުރިބާ ކިޔައި ދެމުން، ގަލްބޭ ނޫރު ބުނާ ގޮތުން އޭނާގެ އަންހެން ވަންތަކަމުގެ އިހުސާސް މިހާރު ވަނީ ގެއްލިފައެވެ.
އެސޯސިއޭޓޭޑް ޕްރެސްއިންވެސް ރިޕޯޓް ކޮށްފައިވާ ގޮތުގައި ޝިންޖިއާންގައި އާބާދީ އާލާވާ ނިސްބަތް ވަނީ މަދުވެގެން ގޮސްފައެވެ. ސަރުކާރުން މިވާހަކަ ދޮގު ކުރެއެވެ. ނަމަވެސް ސަރުކާރުން ބުނާ އިތުވި އާބާދީއަކީ މުސްލިމުންގެ އާބާދީކަމެއް ނުވަތަ ޗައިނާގެ ދަރިކޮޅު ކަމެއް ސާފެއް ނުވެއެވެ.
ޝިންޖިއާންގައި ޝީޖިންގ ޕިންގެ ސިޔާސަތު ތަންފީޒު ކުރުމަށް ކޭމްޕްތަކާއި ޓްރޭނިންގ ސެންޓަރު ތަކާއި ދަނާލުތައް ހަދައިގެން އިސްލާހުޚާނާ ތަކުގައި މިލިއަނަކަށް ވުރެން ގިނަ މުސްލިމުން ބައިތިއްބާކަމާއި ގަދަކަމުން މަސައްކަތް ކުރުވުމާއި އެދުން ފުއްދުމުގެ މަސައްކަތް ކުރެވެމުންދާ ކަމަށް ބައިނަލްއަގްވާމީ މީޑިއާއާއި ޖަމުއިއްޔާތަކުން ރިޕޯޓް ކުރެއެވެ.
ޝީގެ ސިޔާސަތަކީ ޗައިނާގައި ޗައިނާވަންތަކަން އަށަގެންނެވުމެވެ. ޗައިނާ މުސްލިމުންގެ ސަގާފަތުގައި އަރަބި އަކުރުން ލިޔެފައި ހުންނަ ލިޔުންތަކާއި މިސާލަކަށް ރެސްޓޯރެންޓް ނަންތަކާއި އަރަބިން ހަލާލު ލިޔެފައި ބޭއްވުމާއި، މިސްކިތްތަކުގެ މުންނާރާއި ގުއްބުތަކަކީ، ޗައިނާ ވަންތަކަމާ ޚިލާފް ކަންތައްތަކެވެ. މިތަކެތި ވަނީ ކޮމިއުނިސްޓް ޕާޓީގެ ބޮޑު މަރުތޭލުގެ ދަށުވެފައެވެ.
ނިއުޔޯރކް ޓައިމްސްއިން ބުނިގޮތުގައި ދަރިމައި ނުވާ ޕްރޮގްރާމުގައި ބައިވެރިވުމަކީ ޗައިނާ ސަރުކާރުން ބުނާ ގޮތުގައި މީހާ ހިތުން ރުހުމުން ބައިވެރިވާން ޖެހޭ ކަމެކެވެ. މަޖުބޫރު ކަމެއް ނޫނެވެ. އެކަމަކު، ޝިންޖިއާން ގެ މުސްލިމުން މިކަމާ ދެކޮޅު ހަދައެވެ. ދަރިމައި ނުވާގޮތް ހެދުން ނުވަތަ ރަހިމަށް ޑިވައިސްއެއް ލެއްވުމަށް މަޖުބުރު ކުރުވާ ކަމަށް މުސްލިމު އަންހެނުން ބުނެއެވެ. މިފަދަ ޕްރޮސީޖާތައް ހަދާއިރު ލިބޭން ވޭނަށް ވުރެން ބޮޑަށް މިކަމުގައި އުޅޭ މީހުން މީހާގެ ކަރާމާތް ގެއްލޭ ގޮތަށް ގުނަވަންތަކާ ބެހި ހަދާކަމީ އިންތިހާއަށް އިހާނެތިކަން އިހުސާސް ކުރެވޭ ކަމެއް ކަމަށް މުސްލިމު އަންހެނުންނާ ހަވާލާދީ ޓައިމްސްއިން ރިޕޯޓް ކޮށްފައި ވެއެވެ. ރޭޕަކީ އާންމު ކަމެކެވެ. އެކަކު ކިޔައި ދިނެވެ.
